நிலவொளியில் ஒளிரும் பளிங்குப் பாறைகள்! பேடாகாட் சுற்றுலா வழிகாட்டி!

நாம் சில இடங்களுக்கு ஒரே ஒருமுறை சுற்றுலா சென்றால் அது நாற்பது ஆண்டுகள் ஆனாலும் கூட பௌர்ணமி நிலவு போல் பிரகாசமாக மனதில் நிலைத்து நின்று விடுவது உண்டு. அப்படிப்பட்ட ஓர் இடம்தான் இது. அது எந்த இடம் என்றால் மத்தியப் பிரதேச மாநிலம், ஜபல்பூர் நகரில் இருந்து சுமார் 25 கி.மீ தொலைவில், நர்மதை நதிக்கரையில் அமைந்துள்ள பேடாகாட் (Bhedaghat) என்ற இடமாகும். ​இயற்கை அன்னைக்கு நர்மதை நதி சூட்டிய அழகிய ஆபரணம் போலத் திகழும் இந்த இடத்தின் மிகச் சிறப்பான அம்சங்கள் இதோ:

​பேடாகாட் சுற்றுலா வழங்கும் பிரம்மாண்ட பளிங்குப் பாறைகள்

பேடாகாட்டின் முதன்மை அடையாளமே நர்மதை நதியின் இருபுறமும் நூற்றுக்கணக்கான அடிகள் உயரத்திற்கு கம்பீரமாக நிமிர்ந்து நிற்கும் இயற்கையான பளிங்குப் பாறைகள்தான். இந்தப் பாறைகள் வெறும் வெள்ளை நிறத்தில் மட்டும் இல்லாமல், நர்மதை நதியின் நீரோட்டத்திற்கு ஏற்ப இளஞ்சிவப்பு (Pink), நீலம் மற்றும் சாம்பல் நிறக் கலவைகளில் மின்னுவது பார்ப்போரைக் சொக்க வைக்கும் ஆனந்த நிகழ்வாகும். இதை காணும்பொழுது கன்னியாகுமரியில் முக்கடல் சங்கமிக்கும் அந்த மூன்று நிற கலவைகள் மனதிற்குள் வந்து சென்றதுண்டு.

நிலவொளிப் படகு சவாரி: பௌர்ணமி இரவில், பளிங்குப் பாறைகளின் நடுவே அமைதியாக ஓடும் நர்மதை நதியில் படகில் செல்வது உலகத்தரம் வாய்ந்த ஒரு மாயாஜால அனுபவமாகும். நிலவின் ஒளி பளிங்குப் பாறைகளில் பட்டுப் பிரதிபலிக்கும் காட்சி கண்கொள்ளாக் காட்சி. இது நிலவொளியில் தாஜ்மஹாலை பார்த்தது போன்ற ஒரு பிரமிப்பை ஏற்படுத்தியது.

​தூவாந்தார் நீர்வீழ்ச்சி:

​"தூவா" (Dhuan) என்றால் இந்தியில் 'புகை' என்று பொருள். நர்மதை நதி பளிங்குப் பாறைகளின் வழியே பாய்ந்து வந்து, திடீரென 30 மீட்டர் உயரத்தில் இருந்து கீழே குதிக்கும் காட்சி "புகைப் மூட்டம்" போலத் தோன்றுவதால் இதற்குத் 'தூவாந்தார்' என்று பெயர் வந்தது. நீர்வீழ்ச்சியின் நீர் வீச்சால் எழும் நுரை அலைகளும், நீர் திவலைகளின் புகைப்படலமும், அதன் பிரம்மாண்டமான கர்ஜனை ஒலியும் பார்வையாளர்களை சிலிர்க்க வைத்து, சிந்தனையை கவரும் அற்புதக் காட்சியாகும்.

கேபிள் கார்: நீர்வீழ்ச்சியின் குறுக்கே செல்லும் ரோப்வேயில் பயணித்தால், தூவாந்தாரின் முழுப் பிரம்மாண்டத்தையும் வான்வழியாகக் கண்டு ரசிக்கலாம்.

வரலாற்று சிறப்புமிக்க சௌசத் யோகினி கோயில்:

பேடாகாட் இயற்கை அழகிற்கு மட்டுமல்ல, வரலாற்றுப் பெருமைக்கும் பெயர்பெற்றது.​10-ஆம் நூற்றாண்டில் கல்சூரி அரசர்களால் கட்டப்பட்ட இந்த சிவன் மற்றும் யோகினிகள் கோயில், ஒரு சிறு குன்றின் மீது அமைந்துள்ளது.​ இங்கு வட்ட வடிவிலான மண்டபத்தில் 64 யோகினிகளின் (64 Yoginis) தனித்துவமான சிற்பங்கள் செதுக்கப்பட்டுள்ளன.​ இதன் நடுநாயகமாகச் சிவன் மற்றும் பார்வதி தேவி நந்தியின் மீது அமர்ந்திருக்கும் அரிய வகைச் சிற்பத்தைக் காணலாம்.

​பாலிவுட்டின் செல்லமான படப்பிடிப்புத் தளம் :

​பேடாகாட்டின் பளிங்குப் பாறைகளும் நீர்வீழ்ச்சியும் இந்தியத் திரைப்படத்துறையை பெரிதும் ஈர்த்தவை. ஷாருக்கானின் புகழ்பெற்ற 'அசோகா' படத்தில் வரும் "ரோஷ்னி சே" பாடல் மற்றும் ஹிருத்திக் ரோஷனின் 'மொகஞ்சதாரோ' திரைப்படத்தின் முதன்மைக் காட்சிகள் இங்குதான் படமாக்கப்பட்டனவாம்.

​சுற்றுலா வழிகாட்டி:

சுற்றுலா செல்ல சிறந்த காலம் நவம்பர் முதல் மே வரையிலான மாதங்கள். மழைக்காலத்தில் மட்டும் பாதுகாப்பு கருதி படகு சவாரி நிறுத்தப்படும்.

நாம் எங்காவது சுற்றுலா சென்றால் அக்கம் பக்கத்தில், நண்பர்களுக்கு, உறவினர்களுக்கு கொடுப்பதற்காக ஏதாவது பரிசு பொருட்களை அதன் நினைவாக வாங்கி வருவது உண்டு அப்படிவாங்கி வர வேண்டிய பொருட்கள்:

பேடாகாட்டில் உள்ளூர் கைவினைஞர்களால் பளிங்குப் பாறைகளில் செதுக்கப்பட்ட கைவினைப் பொருட்கள், சாமி சிலைகள் மற்றும் பெயர் பொறிக்கப்பட்ட நினைவுப் பரிசுகள் மிகவும் புகழ்பெற்றவை.

​இப்படி இயற்கை, ஆன்மீகம், வரலாறு என மூன்றும் சங்கமிக்கும் பேடாகாட், மத்தியப் பிரதேசத்திற்குச் செல்பவர்கள் தவறவிடக் கூடாத ஒரு சொர்க்கபுரியாகும்!

மேலும், அங்கு சென்று இந்த இயற்கை அழகைப் பார்த்து பிரமித்து ரசிப்பது ஒரு சுகம் என்றால், அதைப் பார்க்க வரும் சுற்றுலா பயணிகள் ரசித்து வியந்து ஒவ்வொன்றையும் பற்றி அழகுற எடுத்துக் கூறிக் கொண்டே செல்வதைப் பார்த்து கேட்டு ரசிப்பது மற்றொரு சுகம்.

இது ரசனையின் உச்சகட்டம். இந்த இரண்டையும் அதாவது இயற்கை அழகோடு சுற்றுலா பயணிகளின் ரசனையையும் சேர்த்து ஒரு சேர அனுபவிக்க இந்த இடத்திற்கு சமயம் கிடைக்கும் பொழுது ஒருமுறை சுற்றுலா சென்று வாருங்கள். அதற்கு இது  ஒரு நல்ல வழிகாட்டியாக அமையும்.

இந்த வழிகாட்டியைக் வாசிப்பதன் மூலம், மத்தியப் பிரதேசத்தின் மிகவும் புகழ்பெற்ற பேடாகாட் பகுதிக்குச் செல்லும் போது பார்க்க வேண்டிய முக்கிய இடங்கள், சரியான நேரம் மற்றும் பயணத் திட்டங்களைத் துல்லியமாகத் தெரிந்துகொண்டு, உங்களின் விடுமுறைப் பயணத்தைச் மறக்க முடியாத அனுபவமாக மாற்ற முடியும்.