இந்த கோடைக்கு சுற்றுலா போக சில குளிர்ச்சியான இடங்கள்!

கோடை காலம் வந்துவிட்டாலே வெயிலின் தாக்கம் அதிகமாக இருக்கும். பள்ளி விடுமுறையும் சேர்ந்து வர, குடும்பத்துடன் எங்காவது சுற்றுலா செல்லலாம் என்ற எண்ணம் வரும். ஆனால், இந்த அனலில் இருந்து தப்பித்து, குளிர்ச்சியான இடங்களைத் தேடுவதுதான் பலரது விருப்பமாக இருக்கும். 

தமிழ்நாட்டில் ஊட்டி, கொடைக்கானல் போன்ற இருந்தாலும், இந்தியாவின் பிற பகுதிகளில் ஆண்டு முழுவதும் இதமான குளிர் நிலவும் சில அற்புதமான இடங்கள் உள்ளன. இந்த கோடை விடுமுறையை மறக்க முடியாத அனுபவமாக்க, சில குளிர் பிரதேசங்களைப் பற்றிப் பார்க்கலாம்.

லடாக் (Ladakh), அதன் பிரமிக்க வைக்கும் நிலப்பரப்புகளுக்காக அறியப்படுகிறது. இங்கே ஆண்டின் பெரும்பாலான நாட்கள் கடுமையான குளிர் நிலவும். உயரமான மலைகளும், வறண்ட அழகும் சாகசப் பயணிகளுக்கு மிகச் சிறந்த அனுபவத்தைத் தரும். அழகிய ஏரிகள், புத்த மடாலயங்கள், மற்றும் தனித்துவமான கலாச்சாரம் என லடாக் பயணம் நிச்சயம் ஒரு புதுமையான அனுபவமாக இருக்கும்.

சிக்கிம் (Sikkim), கோடை காலத்திலும் இதமான குளிரைத் தரும் மற்றொரு அற்புதமான இடம். இமயமலையின் அழகிய காட்சிகளுக்கு மத்தியில், இயற்கையின் மடியில் தங்கிப் புத்துணர்ச்சி பெற ஏற்ற இடம் இது. இங்குள்ள பனி மூடிய சிகரங்கள், அமைதியான ஏரிகள், மற்றும் வண்ணமயமான புத்த மடாலயங்கள் மனதிற்கு நிம்மதியை அளிக்கும்.

காஷ்மீரின் சொர்க்க பூமியாகக் கருதப்படும் சோனாமார்க் (Sonamarg), ஸ்ரீநகருக்கு அருகிலுள்ள ஓர் அழகிய பள்ளத்தாக்கு. கோடை காலத்திலும் இங்கு வெப்பநிலை 10 முதல் 20 டிகிரி செல்சியஸுக்குள் இருப்பதால், இதமான சூழ்நிலை நிலவும். பனிமலைகளில் சறுக்குதல், குதிரைச் சவாரி போன்ற செயல்பாடுகளும், இங்கு பாயும் ஆறுகளின் அழகும் கண்கொள்ளாக் காட்சி. இயற்கை விரும்பிகளுக்கும், காதல் ஜோடிகளுக்கும் இது மிகச் சிறந்த தேர்வாக அமையும்.

இமாச்சலப் பிரதேசத்தின் அழகை முழுமையாக உணர ரெகாங் பியோ (Reckong Peo) ஒரு சிறந்த இடம். சுமார் 7,500 அடி உயரத்தில் அமைந்துள்ள இந்த நகரம், சுத்தமான காற்றையும், பிரமிக்க வைக்கும் இயற்கைக் காட்சிகளையும் கொண்டுள்ளது. இங்குள்ள பழமையான கோவில்கள், புத்த மடாலயங்கள், மற்றும் புகழ்பெற்ற ஆப்பிள் தோட்டங்கள் பயணிகளை ஈர்க்கும் அம்சங்கள். இங்கு கிடைக்கும் பாரம்பரிய உணவுகளும் பயண அனுபவத்தை மேலும் இனிமையாக்கும்.

இந்த கோடை விடுமுறையில் வெயிலின் தாக்கத்திலிருந்து தப்பித்து, புதிய அனுபவங்களைத் தேடுபவர்களுக்கு லடாக், சிக்கிம், காஷ்மீர் மற்றும் இமாச்சலப் பிரதேசத்தின் இந்த இடங்கள் சிறந்த தேர்வுகளாக அமையும். குடும்பத்துடன் அல்லது நண்பர்களுடன் சென்று இந்த அழகிய குளிர் பிரதேசங்களை ரசித்து, புத்துணர்ச்சியுடன் திரும்புங்கள்.