இனி இஷ்டத்துக்கு தாய்லாந்தில் தங்கி ஊர் சுற்ற முடியாது... முட்டுக்கட்டை போடும் புதிய நடைமுறை இதோ!

நண்பர்களோடு சேர்ந்து பட்ஜெட்டில் ஒரு வெளிநாட்டு ட்ரிப் செல்லலாம் என நாம் நினைக்கும்போதெல்லாம் சட்டென நினைவுக்கு வரும் முதல் நாடு தாய்லாந்து தான். மிகக் குறைந்த செலவு, அற்புதமான கடற்கரைகள், மசாஜ் சென்டர்கள் மற்றும் மனதை மயக்கும் உணவு என அனைத்தையும் கொண்ட இந்த நாடு இந்தியர்களின் ஆல் டைம் ஃபேவரைட் சுற்றுலாத் தலமாக எப்போதுமே இருந்து வருகிறது. 

இப்படிப்பட்ட ஊருக்கு எந்த ஒரு விசா டென்ஷனும் இல்லாமல் ஈஸியாக சென்று வந்த நமக்கு ஒரு சின்ன செக் வைக்கும் வகையில் அங்குள்ள அரசாங்கம் விதிகளில் ஒரு புதிய மாற்றத்தை கொண்டு வர முடிவு செய்துள்ளது. அந்த அதிரடியான மாற்றம் என்ன, அதனால் பயணிகளுக்கு ஏற்படப்போகும் விளைவுகள் என்னென்ன என்பதை இந்தப் பதிவில் பார்க்கலாம்.

திடீர் மாற்றத்தின் பின்னணி!

இதுவரை இந்தியர்கள் அங்கு விசா இல்லாமல் தொடர்ந்து அறுபது நாட்கள் வரை ரிலாக்ஸாக தங்கி ஊர் சுற்றலாம் என்ற ஒரு சூப்பரான சலுகை நடைமுறையில் இருந்தது. இதை பயன்படுத்தி பலரும் அங்குள்ள அழகிய தீவுகளில் வாரக்கணக்கில் ஓய்வெடுப்பதும், லேப்டாப்பை வைத்துக்கொண்டு ரிமோட் ஒர்க் மூலம் அலுவலக வேலைகளை கவனிப்பதும் என ஜாலியாக நாட்களைக் கழித்து வந்தார்கள். 

ஆனால் தற்போது அந்த அறுபது நாள் சலுகையை முப்பது நாட்களாகப் பாதியாக குறைக்க தாய்லாந்து அரசு அதிரடியாக திட்டமிட்டுள்ளது. அதாவது இனிமேல் ஆரம்பகட்டமாக ஒரு மாதம் மட்டுமே எந்த ஒரு விசாவும் இல்லாமல் அங்கு செலவிட முடியும். ஒருவேளை முப்பது நாட்களை தாண்டி அங்கு தங்க நினைப்பவர்கள், முறையான அரசாங்க அலுவலகங்களை அணுகி தங்களது விசா காலத்தை சட்டப்பூர்வமாக நீட்டித்துக் கொள்ள வேண்டும்.

விதிமுறைக்கான காரணம்!

கொரோனா ஊரடங்கு முடிந்த காலகட்டத்தில் தங்கள் நாட்டு சுற்றுலாத்துறையை மீண்டும் உச்சத்திற்கு கொண்டு செல்லவே அந்த பிரம்மாண்டமான விசா சலுகையை தாய்லாந்து வழங்கியது. அவர்கள் நினைத்தது போலவே சுற்றுலாத்துறை பெரிய அளவில் வளர்ச்சி அடைந்தது. 

ஆனால் இதில் ஒரு சின்ன சிக்கல் என்னவென்றால், சிலர் இந்த நீண்ட கால அவகாசத்தை தங்களுக்கு சாதகமாக பயன்படுத்தி சுற்றுலா என்ற எல்லையை தாண்டி வேறு சில சட்டவிரோத வேலைகளிலும் ஈடுபட தொடங்கிவிட்டனர். விசா இல்லாமல் அளவுக்கு அதிகமாக தங்குபவர்களின் எண்ணிக்கையும் நாளுக்கு நாள் அதிகரித்தது. இதை முழுமையாக கட்டுப்படுத்தி நாட்டை பாதுகாப்பான சுற்றுலா தளமாக மாற்றுவதற்காகவே இந்த சட்ட திருத்தத்தை அவர்கள் கையில் எடுத்துள்ளனர்.

இந்தியர்களுக்கு என்ன சிக்கல்?

இந்த புதிய அறிவிப்பை கேட்டவுடன் இந்தியப் பயணிகள் யாரும் பயப்பட வேண்டிய அவசியமே கிடையாது. சாதாரணமாக ஒரு வாரம் அல்லது பத்து நாட்கள் சுற்றுலா செல்பவர்களுக்கு இந்த புதிய விதியால் எந்த ஒரு சின்ன பாதிப்பும் வராது. நீங்கள் வழக்கம் போல உங்களின் பயணத்தை சந்தோஷமாக மேற்கொள்ளலாம். 

ஆனால் மாதக்கணக்கில் அங்கு தங்கி வேலை செய்யவோ அல்லது நீண்ட தூர பயணம் செய்யவோ பிளான் போட்டிருந்தால் மட்டும், விசா நீட்டிப்புக்கான ஆவணங்களை முன்கூட்டியே தயார் செய்து கொள்வது கட்டாயம். இது சுற்றுலாப் பயணிகளை தடுப்பதற்கான முடிவு கிடையாது, அனைத்தையும் ஒரு முறையான கட்டுப்பாட்டுக்குள் கொண்டு வரும் வழக்கமான ஒரு அரசாங்க நடவடிக்கை மட்டுமே.

தாய்லாந்து அரசு இப்போதும் சுற்றுலாப் பயணிகளை இரு கரம் கூப்பி வரவேற்க தயாராகவே இருக்கிறது. ஆசிய கண்டத்தில் உள்ள பெரும்பாலான நாடுகளும் தற்போது இதே போன்ற கடுமையான கட்டுப்பாடுகளை தான் பின்பற்றி வருகின்றன. சுற்றுலா செல்வது அந்த நாட்டின் சட்ட திட்டங்களுக்கு உட்பட்டு நடக்கும் வரை யாருக்கும் எந்த ஒரு பிரச்சனையும் வராது. 

அதனால் எந்த ஒரு வீண் கவலையும் இல்லாமல் உங்களின் அடுத்த தாய்லாந்து ட்ரிப்புக்கான பிளானை தைரியமாகத் தொடங்கி உங்களின் விடுமுறையை பாதுகாப்பாகவும் சந்தோஷமாகவும் கொண்டாடுங்கள்.