ஹனிமூன் போக பிளானா.. வெளிநாடு ரேஞ்சுக்கு ஃபீல் கொடுக்கும் இந்தியாவின் டாப் 5 இடங்கள் இதோ!

திருமணம் முடிந்த கையோடு புதுமணத் தம்பதிகள் எங்கு தேனிலவு செல்வது என குழம்பிப் போவது வழக்கம். வெளிநாடுகளுக்குச் சென்று ரொமான்ஸாக நேரத்தைச் செலவிட வேண்டும் என்ற ஆசை பலருக்கும் இருக்கும். 

ஆனால், நம் இந்தியாவிலேயே ஐரோப்பிய நாடுகளுக்கு இணையான அழகைக் கொண்ட பல அட்டகாசமான இடங்கள் கொட்டிக்கிடக்கின்றன. பட்ஜெட்டிலும் அதிக கைவைக்காமல், அதே சமயம் வாழ்நாள் முழுவதும் மறக்க முடியாத இனிய நினைவுகளைத் தரும் சிறந்த 5 சுற்றுலாத் தலங்களைப் பற்றி  இந்தப் பதிவில் பார்க்கலாம்.

மேகாலயாவின் ஷில்லாங்!

வடகிழக்கு மாநிலமான மேகாலயாவில் உள்ள ஷில்லாங், பனிப்போர்வை போர்த்திய ஒரு அழகிய சொர்க்கமாகும். பழமையான காலனித்துவக் கட்டடங்கள், ரம்மியமான ஏரிகள் மற்றும் சலசலக்கும் நீர்வீழ்ச்சிகள் என இங்குள்ள ஒவ்வொன்றும் உங்களை ஒரு ஐரோப்பிய நாட்டிற்குள் நுழைந்தது போன்ற உணர்வைக் கொடுக்கும். குளிர்காற்று முகத்தில் வீச, துணையோடு அந்த அமைதியான சாலைகளில் நடப்பது ஒரு அலாதியான சுகம். காதல் தம்பதிகளுக்கு இது ஒரு மிகச் சிறந்த தேர்வாக இருக்கும்.

சாகசம் நிறைந்த லடாக்!

அமைதியையும் சாகசத்தையும் ஒரே நேர்கோட்டில் ரசிக்க நினைக்கும் தம்பதிகளுக்கு லடாக் ஒரு பெஸ்ட் சாய்ஸ். பிரம்மாண்டமாக உயர்ந்து நிற்கும் மலைகள், நீல நிறத்தில் மின்னும் ஏரிகள் என இந்த இடத்தின் ஒவ்வொரு அசைவும் உங்களைப் பிரம்மிக்க வைக்கும். பைக் ரைடிங் பிடிக்கும் கப்பிள்ஸ் என்றால், இங்கிருக்கும் கரடுமுரடான மலைப்பாதைகளில் ஒரு ரவுண்ட் செல்வது உங்கள் ட்ரிப்பை வேற லெவலுக்குக் கொண்டு செல்லும். உங்களின் முதல் காதல் பயணத்தை இந்த மலைகளின் அமைதியோடு தொடங்குவது மிகவும் த்ரில்லான அனுபவத்தைத் தரும்.

காபி மணக்கும் கூர்க்!

கர்நாடகாவில் உள்ள கூர்க் பகுதியை இந்தியாவின் ஸ்காட்லாந்து என்று செல்லமாக அழைப்பார்கள். எங்கு திரும்பினாலும் கண்ணைப் பறிக்கும் பசுமையான காபி தோட்டங்கள், சில்லென்ற பனிமூட்டம் மற்றும் அழகிய தங்கும் விடுதிகள் என இது ஒரு கனவு உலகம் போலவே காட்சியளிக்கும். மழைக்காலங்களில் இங்குள்ள நீர்வீழ்ச்சிகள் பெருக்கெடுத்து ஓடுவதைப் பார்ப்பதே கண்களுக்குப் பெரிய விருந்தாக அமையும். காற்றில் கலந்திருக்கும் காபியின் நறுமணத்தோடு கைகோர்த்து நடப்பது உங்கள் காதலை மேலும் அழகாக்கும்.

தண்ணீரில் மிதக்கும் குமரகம்!

கேரளாவின் தனித்துவமான அழகை ரசிக்க குமரகம் சிறந்த இடமாகும். அங்குள்ள அமைதியான காயல் நீரில், தனியான ஒரு படகு வீட்டில் தங்குவது வெனிஸ் நகரம் போன்ற வெளிநாட்டு நீர்நிலைகளில் மிதக்கும் ஒரு பிரத்யேக ஃபீலைக் கொடுக்கும். சுற்றிலும் தென்னை மரங்கள் சூழ, மாலையில் சூரியன் மறையும் அழகை ரசித்தபடி படகில் செல்வது தம்பதிகளுக்கு மிகச் சிறந்த ரொமான்டிக் தருணங்களை உருவாக்கும்.

மலைகளின் ராணி ஊட்டி!

நம்ம ஊர் தமிழ்நாட்டில் எவர்கிரீன் தேனிலவு ஸ்பாட் என்றால் அது ஊட்டிதான். பச்சைப் பசேல் என விரிந்துகிடக்கும் தேயிலைத் தோட்டங்கள், ரோஜாப் பூக்கள் நிறைந்த தாவரவியல் பூங்கா, மற்றும் ஏரியில் செய்யும் படகு சவாரி என இங்கு ரசிப்பதற்கு எக்கச்சக்கமான விஷயங்கள் உள்ளன. மலை ரயிலில் பயணம் செய்து இயற்கையின் அழகை அணு அணுவாக ரசிப்பது எந்த ஒரு வெளிநாட்டுப் பயணத்திற்கும் சளைத்தது அல்ல. குளிரான தட்பவெப்பமும் இதமான சூழலும் உங்கள் தேனிலவை மிகவும் ஸ்பெஷலாக மாற்றிவிடும்.

வாழ்க்கையில் தேனிலவு, ஒருமுறை மட்டுமே வரும் மிக இனிமையான காலகட்டம். அந்தப் பொன்னான நாட்களை சாதாரண இடங்களில் கழிக்காமல், இயற்கை எழில் கொஞ்சும் இந்த மாதிரி அற்புதமான ஸ்பாட்களுக்குச் சென்று கொண்டாடுங்கள்.