சரஸ்வதி நதி உற்பத்தி ஸ்தலம் எங்குள்ளது தெரியுமா?

51 சக்தி பீடங்களில் ஒன்றான அம்பாஜி கோயிலுக்கு எட்டு கிலோமீட்டர் தொலைவில் கோடீஷ்வரர் எனும் சிறு கிராமத்தில் அமைந்துள்ளது இந்த ஆலயம்.

சுவாமி பெயர் கோடீஷ்வரர். கிராமத்தின் பெயர் இந்த ஈசனின் பெயரை வைத்து அழைக்கப்படுகிறது.

இங்கு சிவபெருமான் சுயம்பு லிங்கமாக காட்சி தருகிறார். அருகிலேயே சரஸ்வதி நதி உற்பத்தி ஸ்தலம் உள்ளது.

இந்தியாவின் கடைசி கிராமமான (பத்ரிநாத்துக்கு மேல் அமைந்துள்ள) மானா வில்லேஜில் (Mana village) மறைந்திருந்த சரஸ்வதி நதி ‘ஹோ’ என்ற இரைச்சலுடன் இங்கு வெளிப்படும்.

சுற்றிலும் பெரும் பாறைகள் அமைந்துள்ள இந்த மலைப்பகுதியில் வெளிப்படும் இந்நதியானது எங்கிருந்து வருகிறது என்று தெரியாமலே இங்கு தண்ணீர் கொட்டுகிறது.

இந்த சரஸ்வதி நதியிலிருந்து தண்ணீர் எடுத்து அருகில் உள்ள சிவனுக்கு அபிஷேகிக்கலாம்.

அருகிலேயே வில்வ பத்திரம், ஊமத்தங்காய், மலர்கள் எல்லாம் கிடைக்கின்றன. அவற்றை வைத்து பூஜையும் செய்ய முடிகிறது.

மிகவும் அமைதி ததும்பும் அழகான சூழ்நிலையில் அமைந்துள்ள கோடீஸ்வரர் லிங்கத்தையும், சரஸ்வதி நதியையும் வழிபாட்டலாம்.

மிகவும் புகழ்பெற்ற பழமையான சிவன் கோயில் இது. இந்த இடம் அதிகம் பேருக்கு தெரியாததால் கூட்டம், நெரிசல் இல்லாமல் அமைதியாக தரிசனம் செய்ய முடிகிறது.

இங்கிருந்து மூன்று கிலோமீட்டர் தூரத்தில் காமாட்சி அம்மன் கோயில் உள்ளது. இங்கு கோயிலைச் சுற்றி 51 சக்தி பீடங்களின் சிலைகளும் நிறுவப்பட்டுள்ளன. இது காஞ்சிபுரம் சங்கர மடத்தால் பராமரிக்கப்படுகிறது.

சரஸ்வதி ஆற்றின் தண்ணீர் மலையிலிருந்து தோன்றி வருவதால் மிகவும் ருசியாகவும், சில்லென்று ஐஸ் போலும் உள்ளது.

கோயிலுக்கு அருகில் ராமாயணத்தை எழுதிய வால்மீகியின் ஆசிரமம் உள்ளது. இவர் இங்கு சில காலம் தங்கி இருந்ததாக கூறப்படுகிறது.