கவிதைகள்: கார்த்திகை தீபம் ஆன்மீகம், அறிவியல், விவசாயம் - உழைப்பின் ஒளி தரும் திருநாள்!

இருள் நீக்கும் சுடருக்குப் பின்னால் மறைந்திருக்கும் இயற்பியல், ஆன்மீகம் மற்றும் விவசாயத்தின் உன்னதக் கதை.
கார்த்திகை தீபம் - Karthigai Deepam,
கார்த்திகை தீபம் - Karthigai Deepam,
இந்திராணி தங்கவேல்

தஞ்சாவூரைச் சேர்ந்த இந்திராணி தங்கவேல், மங்கையர் மலரில் வெளியான முதல் கட்டுரை மூலம் எழுத்துப் பயணத்தைத் தொடங்கியவர், இன்று கல்கி ஆன்லைனில் தொடர்ந்து எழுதி வருகிறார். அருமையான சிறுகதைகளும் பயனுள்ள பல கட்டுரைகளும் எழுத வல்லவர்.

Updated on: 

உழைத்து வாழும் குணமே உலகிற்கு தந்திடும் பேரழகு!

அகல்விளக்கு வரிசைகள் அழகாக சிரித்திட

​இருள் சூழ்ந்த உலகினில் இன்ப விளக்கேற்றி,

தெருவெங்கும் புன்னகை பூக்கும் திருநாளாம்!

மருள் நீக்கி மனத்தினில் ஞானம் நிலைநிறுத்தும்,

துமாரம் விலகிய தூயதோர் வானம்போல்,

சுடரொளி சிந்தும் எழில்காட்சி கண்கொள்ளா!

​அன்பெனும் திரையிட்டு அறிவெனும் எண்ணெயிட்டு,

துன்பமெனும் இருள்சாயத் தூண்டுகோல் கோலமிட்டு,

​பொன்னிறச் சுடரேந்தி இருள் கீறும் ஒளியே,

பூமிக்கு நீ காட்டும் பொக்கிஷம் கலையே!

மண்ணிலே பிறந்தாலும் விண்ணை நோக்கும் விரலே,

மாசற்ற ஜோதியால் எம்மை ஈர்ப்பாய்!

​மண்ணால் ஆனதொரு சின்னஞ்சிறு விளக்கே:

மகிழ்ச்சியை அள்ளித்தரும் தெய்வீக இருப்பே :

பஞ்சுத் திரிகளிலே பற்றிக்கொள்ளும் கனலே,

பயங்களைப் போக்குகின்ற பரந்த வெளியின் அருளே!

எண்ணெய் நனைந்திருக்கும் எளியதொரு வாழ்க்கை,

ஏற்றிவிட்ட கணத்திலோ எல்லையற்ற மகிழ்ச்சி!

கண்ணிமைக்கும் நேரத்தில் இருளைத் துரத்திவிட்டு,

கற்பனைக்கெட்டாத அழகைக் கொடுத்துவிட்டு ,

​காற்றோடு போராடிச் சாய்ந்துவிடாமல் நின்று,

காலத்தின் கரம்பிடித்துத் தன் ஒளியைத் தந்து,

ஊற்றெடுக்கும் உத்வேகத்தை உணர்த்தியே எரிவாய்,

உண்மையின் ஒளியாக உலகைக் காப்பாய்!

கோவிலின் கருவறையில் அமைதியாய்ச் சிரிப்பாய்,

குடில்களின் முற்றத்தில் குளுமையாய் ஒளிர்வாய்!

பூஜை அறையினிலே பூவாய் மலர்வாய் ,

புனிதத்தின் வடிவமாய் எங்குமே ஜொலிப்பாய்!

​கார்த்திகை திருநாளில் கண்டங்கள் கடப்பாய் !

கண்ணுக்குக் குளிர்ச்சியூட்டும் பொன்னாக மிளிர்வாய்!

வாழ்வின் இருள் நீக்கி வழிநடத்தும் தீபம்,

வார்த்தைக்கு அடங்காத வனப்பான ரூபம்!

​சுயம் எரிந்து தன்னைத் தந்துவிடும் தியாகம்,

சுடராய் ஒளிரும் அதன் உன்னதத்தின் யோகம்!

உயிர் வாழும் காலம் வரை உழைத்து வாழும் குணமே

நீ உலகிற்குத் தந்திடும் பேரழகின் மகுடம்!

​தீபம் ஒரு அழகு! தீபம் ஒரு தவம்!

தீபம் தந்திடும் ஒளியே இவ்வுலகின் வரம்!

கார்த்திகை தீபம் - Karthigai Deepam,
கார்த்திகை தீபம் - Karthigai Deepam,

ஆன்மீகப் பரிமாணம்!

அமைதியான கருவறையில் அகல்விளக்கு ஒளிர்கிறது,

ஆத்மாவின் இருள் போக்கும் அருட்ஜோதி மலர்கிறது!

பண்பாட்டின் வழியூட்டும் பரந்த வெளிப்பரிசாக,

பக்திமிகு வழிபாட்டில் பரம்பொருளின் சுடராக!

மண்ணுடலை நீத்தாலும் புண்ணியத்தின் மகத்துவமாய்,

மங்களத்தைக் கூட்டிவிடும் தெய்விகத்தின் சொரூபமாய்!

கற்பூரப் புகையினில் காணாத மெய்ஞ்ஞானம்,

கார்த்திகையின் திருநாளில் காட்டும் நல் தியானம்!

அறிவியல் பரிமாணம்:

எண்ணெயும் திரியும் சேர்ந்து ஆற்றலினை மாற்றுவதோ,

எரியும் அந்தச் சுடரினில் இயற்பியல் நிகழ்வதோ!

தந்துகை ஈர்ப்பு விசை (Capillary Action) மூலம் எண்ணெய் மேலே ஏறுவதே,

தடையில்லாமல் தொடர்ச்சியாய் சுடரொளியைத் தருவதே!

ஆக்ஸிஜன் மூலக்கூறுகள் அணைக்காமல் காப்பதினால்,

அணுக்களின் வினையாலே ஒளி எங்கும் பாய்வதினால்!

வெப்பமும் ஒளியுமாய் ஆற்றல் உருமாறுவதின் தத்துவம்,

வியக்க வைக்கும் அறிவியலின் விழிமூடும் தத்துவம்!

​விவசாயப் பரிமாணம்:

உழவனின் வியர்வைசிந்தி உருவாக்கிய செந்நிலத்தில்,

உயிர்ப்பூட்டும் நல்லெண்ணெய் விளைந்ததந்தப் பயிரினத்தில்!

ஆமணக்கும் எள்ளும் தந்து அழகு செய்யும் பூமித்தாய்,

அறுவடையின் பலனாய் நமக்குத் தரும் அமுதமாய்!

பருத்திச்செடி விளைவித்துத் திரிதிரியாய்க் கிழித்தெடுத்து, அழகான மண் அகல் செய்துளங்கள் மகிழ்வித்து!

விவசாயியின் உழைப்பாலே விளக்கேற்றும் நல்வாய்ப்பு,

வேளான்மைத் தொழில்தான் இந்நிலத்தின் மூப்பு!

ஆன்மீகம் காட்டும் ஆன்மாவின் நல்வெளிச்சம்,

அறிவியல் சொல்லும் ஆற்றலின் வியத்தகு மூச்சு!

விவசாயம் தரும் வியர்வையின் உயிர்விதைப்பு,

மூன்றும் சேர்ந்திங்கு ஒளிர்கிறது தீபச் சிரிப்பாய்!

ஏற்றுவோம் ஒளியை; போற்றுவோம் கார்த்திகைத் திருநாளை!

இதையும் படியுங்கள்:
ஆண்கள் விளக்கேற்றலாமா? தீப வழிபாட்டில் நீங்கள் அறியாத ரகசியங்கள்!
கார்த்திகை தீபம் - Karthigai Deepam,