யாரங்கே... உடனடியாக எனக்கு ஒரு நைட்டி ரெடி பண்ணுங்கள்!

"மகாராணியாரே… சுயம்வரத்தில் எதை வைத்து, நம் மன்னரை தேர்ந்தெடுத்தீர்கள்?"

"ம்க்கும். நான் எங்கே தேர்ந்தெடுத்தேன்..! நான் கால் இடறிக்கீழே விழப் போனபோது, என் கையில் இருந்த மாலை பறந்துபோய் இவர் கழுத்தில் விழுந்து தொலைத்துவிட்டது.

***********************************

"மன்னா, நம் நாட்டைக் கைப்பற்றிய எதிரி, குழந்தைகளையும், பெண்களையும் மன்னித்து விடுவதாக அறிவித்துள்ளானாம்"

"அப்படியா.!  யாரங்கே... உடனடியாக என் சைசுக்கு ஒரு நைட்டி ரெடி பண்ணுங்கள்..!"

***********************************

 "என்ன, எதிரி மன்னனுக்கு, தங்க குண்டூசி பரிசாக வழங்கியதில் நம் மன்னரின் ராஜதந்திரம் அடங்கியுள்ளதா..? எப்படி சொல்கிறீர்,?"

"கேட்போரிடம், எதிரி 'பின்'வாங்கிவிட்டான் என்று சொல்லிக்கொள்ளலாமே..."

***********************************

"மன்னா.. சாது மிரண்டால் காடு கொள்ளாதாம்..!"

"அதெல்லாம் நல்லா கொள்ளும்.. சாதுவான என்னை உசுப்பேத்திவிட்டு, போர்க்களத்தில் குதிக்க வைக்கலாம் என்று மனப்பால் குடிக்காதீர் மந்திரியாரே...!"

***********************************

'விற்போர்' என்றால் நம் மன்னருக்கு கொள்ளை பிரியம்...

'அந்தளவுக்கு வில் வித்தையில் கை தேர்ந்தவரோ..?"

"அட நீ வேற, தள்ளுவண்டியில் வைத்து, நொறுக்குத்தீனிகள் விற்போரை சொன்னேன்."

***********************************

"நம் மன்னர் போர்க்களத்தில் எல்லாருக்கும் முன்னோடியாக திகழ்ந்தாராமே?"

 " அட நீ வேற.. .புறமுதுகிட்டு ஓடிவரும்போது எல்லாருக்கும் 'முன் ஓடி'யாத்தான் திகழ்ந்தாரு!"