ஸ்ரீ சத்ய சாயி 100: "ஸ்வாமி! உங்களது பிறப்பு பிரசவமா? பிரவேசமா?"- பக்தரின் இந்த கேள்விக்கு கிடைத்த பதில்...

25 ஆண்டுகளுக்கு முன்னர், ஸ்ரீ சத்ய சாயிபாபாவின் 75-வது பிறந்தநாளைச் சிறப்பிக்கும் வகையில், கல்கி வார இதழ் சிறப்பு மலரை (26.11.2000) வெளியிட்டது. அந்த மலரில், சத்ய சாயிபாபாவின் சிறப்புகள் குறித்துத் தொகுக்கப்பட்ட பல கட்டுரைகள் இடம்பெற்றிருந்தன.

இப்போது, ஸ்ரீ சத்ய சாயிபாபாவின் நூற்றாண்டு (2025) விழாவையொட்டி, அந்த இதழிலிருந்து ஒரு சிறப்புக் கட்டுரை இப்போது உங்கள் பார்வைக்கு....

26.11.2000 அன்று வெளியிட்ட பாபாவின் சிறப்பு மலரை படிக்க கீழே உள்ள லிங்கை கிளிக் செய்யவும்.

"ஸ்வாமி! உங்களது பிறப்பு பிரசவமா? பிரவேசமா?"

பக்தர்கள் சூழ பகவான் சத்யசாயிபாபா இனிமையாய் உரையாடிக்கொண்டிருந்தபோது, வேத விற்பன்னர் ஒருவர் தொடுத்த கேள்வி இது. எதிர்பாராத இந்தக் கேள்வியால் அனைவரும் திகைத்தபோது, பகவான் பாபா மயக்கும் புன்னகையுடன் தம்முன் அமர்ந்திருந்த தமது தாய் ஈஸ்வரம்மாவைப் பார்த்து,

"உன் மாமியார் உன்னை எச்சரித்ததையும், கிணற்றில் நீர் இறைக்கும்போது உனக்கு நேர்ந்த அனுபவத்தையும் சொல்" என்று பணித்தார்.

பகவான் சத்ய நாராயணன் தன் கனவில் வந்ததால் 'உனக்கு எது நேர்ந்தாலும் பயப்படக்கூடாது' என்று மாமியார் சொன்னதையும் அன்றைய தினமே காலையில் கிணற்றில் நீர் இறைக்கும்போது நீல நிற ஒளிப் பந்து ஒன்று தன்னுள் கலந்ததையும் தான் மூர்ச்சையடைந்ததையும் விவரித்தாள் தாய்.

பரந்தாமன் நாராயணன் கருணைத் திருவுளம்கொண்டு சத்ய சாயி பாபாவாக மனித உருவெடுத்து அவதரிக்க தேர்ந்தெடுத்த தாய் ஈஸ்வரம்மா. சாட்சாத் ஈஸ்வரனுக்கே அன்னையாகப் போகிறாள் என்பதை அறிந்தே, கொண்டமராஜு (ஸ்வாமியின் தாத்தா) அவளுக்கு அந்தப் பெயரைச் சூட்டினார்.

எளிமையும், ஆழ்ந்த தெய்வ நம்பிக்கையும், இரக்கமும் இனிமையான சுபாவமும் கொண்ட ஈஸ்வரம்மா படித்தவரல்ல. எளிமையான கிராமத்துப் பெண்ணான அவர் தன் எட்டாவது மகன் பாரெல்லாம் போற்றும் ஒரு அவதார புருஷன் என்பதை உணரவில்லை. மற்ற தாய்மார்போல் தன் மகனைத் தன்னுடன் வைத்துக்கொண்டு சீராட்டி மகிழ வேண்டும். அவனுக்குப் பிடித்த பதார்த்தங்களை அளிக்கவேண்டும். தன் பாதுகாப்பில் பத்திரமாக வைத்துக்கொள்ள வேண்டும் என்று எண்ணினாள். மகனின் தெய்வீக ஆற்றலைக் கண்டு ஆச்சரியமும் பெருமையும் அடைந்தாலும், இது எதில் கொண்டு விடுமோ? தன் மகனுக்கு என்ன ஆபத்து நேரிடுமோ - என்று அஞ்சித் தவிப்பார். காண்போரைக் கவர்ந்திழுக்கும் தன் மகனின் மாயப்புன்னகையில் மற்றவர்கள் மயங்கி நிற்கும்போது தன் கண்மணிக்குக் கண்பட்டு விடக்கூடாதே என்று திருஷ்டி கழிக்கும் அவர் தாயுள்ளம்.

இறப்பதற்கு சில நாட்களுக்கு முன் 'பெத்த பொட்டு' என்றழைக்கப்படும் பக்தையிடம் (பெத்த பொட்டு, ஷீர்டி சாயிபாபாவின் காலத்தில் அவரை வணங்கி வழிபட்டு பின் ஸ்வாமியிடம் வந்தவர்), ''நான் ஒரு ரகசியம் சொல்கிறேன்.. யாரிடமும் சொல்லாதே... நம் ஸ்வாமி கடவுள்தான்..." என்றாராம்.

அதற்கு அவர் சிரித்துக்கொண்டே நீங்கள் இப்போதாவது இதை உணர்ந்தீர்களே... சந்தோஷம்... எப்படி உணர முடிந்தது?" என்று கேட்டாராம்.

"காய்ச்சலில் முடியாமல் தவித்தபோது பகவான்பாபா என்னிடம் வந்து 'எப்படி இருக்கிறது' என்று கேட்டார். தலை நிமிர்ந்தபோது தலையில் கிரீடமும் கையில் கோதண்டமும், உதடுகளில் மயக்கும் முறுவலும் பூண்ட இராமபிரானே தெரிந்தார். எழுந்திருக்க முயன்றேன் முடியவில்லை. பின் ஸ்வாமிதான் தெரிந்தார்" என்றாராம்.

இந்த அனுபவத்திற்குச் சில நாட்களுக்குப்பிறகு இறக்கும் தருவாயிலும் ஸ்வாமியின் பெயரை உச்சரித்தபடியே ஜோதியுள் கலந்தார்.

ஆர்ஜால்ட் ஹீல்மேன் என்ற வெளிநாட்டு பக்தரிடம், "என் மகன் சரியாகத் தூங்குவதில்லை.. சாப்பிடுவதில்லை. அவனுக்குத் தனிமையும் ஓய்வும் கொடுக்காமல் பக்தர்கள் சூழ்ந்துகொள்கிறார்கள். என் சமையலென்றால் அவனுக்கு இஷ்டம்... மற்றவர்கள் சமையல் பிடிக்காமல் என் மகன் சரியாக உண்பதில்லை." என்று அந்தத் தாயுள்ளம் வருந்தியபோது பாபாவுக்கு 44 வயது.

குழந்தைகளிடம் அளவு கடந்த பிரியம்கொண்ட ஈஸ்வரம்மாவின் விருப்பப்படியே பகவான் பாபா பள்ளிக்கூடம் நிறுவினார். இன்று இலவசக் கல்வியளிக்கும் சத்திய சாய் பல்கலைக்கழகம், உலகத்திற்கே முன்னுதாரணமாய்த் திகழ்கிறது. மருத்துவ வசதிகளில்லாத குக்கிராமமான புட்டபர்த்திக்கு மருத்துவமனை வேண்டும் என்று தன் தாய் கோரியதற்கிணங்க பகவான் பாபா ஆஸ்பத்திரி கட்டினார். இன்று எல்லோருக்கும் இலவச மருத்துவமளிக்கும் தரம் வாய்ந்த சத்யசாய் சூப்பர் ஸ்பெஷாலிட்டி மருத்துவமனை பகவானின் கருணையைப் பறை சாற்றுகிறது. குடிநீர் வசதி வேண்டும் என்ற ஈஸ்வரம்மாவின் மூன்றாவது ஆசையையும் நிறைவேற்றி வைத்தார் பசுவான் பாபா. வறண்ட அனந்தப்பூர் ஜில்லா முழுவதும் 300 கோடி செலவில் இன்று குடிநீர் கிடைக்க வசதி செய்திருக்கிறார்.

"எனது வாழ்க்கையே உங்களுக்கு நான் தரும் செய்தி" என்று கூறும் அன்பின் உருவமான ஸ்வாமி தன் தாயின் ஆசைப்படியே அறிவுக்கு கல்வி, இதயத்துக்கு மருத்துவம், உடலுக்கு நீர் ஆகிய மூன்றும் இலவசமாகக் கிடைக்கச் செய்தார்.

- ஜெயா சேகர் (கல்கி 26.11.2000)