தீபாவளி சிறப்பு சிறுகதை - மத்தாப்புச் சிரிப்புகள்..!

“பாண்டி எந்திரியா… குளிச்சிட்டு புது ட்ரஸ் போடணும்ல்ல.. எந்திரி செல்லம்…”

போர்வையை போர்த்தி தூங்கிக்கொண்டிருந்த பாண்டி, அம்மாவின் சத்தத்தைக் கேட்டு சட்டென்று எழுந்தான்.

பாண்டியின் வாயில் வந்த முதல் வார்த்தையே, “அம்மா வெடி எப்ப வரும்?”

“சுகுமாரு மாமாகிட்ட சொல்லி இருக்கேன்… கொஞ்ச நேரத்துல வெடி வந்துரும்யா..! முதல்ல காட்டுக்கு போயி காலைக்கடனை முடிச்சிட்டு வா”

நல்லெண்ணையை பாண்டியின் தலை ஒழுக வசந்தி தேய்த்துவிட்டார்.

பாண்டி எண்ணெய் வழியும் முகத்தோடு, பல்லைத் துலக்கியபடி வெளியங்காட்டை நோக்கிச் சென்றான்.

அப்போதுதான், பார்வதி குளித்து முடித்துவிட்டு வீட்டிற்குள் வந்தாள்.

“அம்மா என்னோட புது டிரஸ்ச எங்க வச்ச?”

“பீரோக்குள்ள ஒரு மஞ்சக் கட்டப்பைகுள்ள இருக்கும்..! இப்ப போடாத நைட்டிய போட்டுக்கோ.. தம்பி குளிச்சிட்டு வரட்டும் சாமி கும்புட்டுட்டு போட்டுக்கலாம்!”

“சரிமா”

“என்ன பார்வதி முகம் சரியில்லையே.. ஆரம்பிச்சிருக்கா?”

“ஆமா..லேசா பட்ருக்கும்மா..!”

“சரி, அதெல்லாம் ஒன்னும் இல்ல.. நைட்டிய போடு போ..!”