நீரிழிவு நோயாளிகள் கவனத்திற்கு...

* ஊருக்குச் செல்வதற்கு முன்பாக டாக்டரிடம் மருந்து, மாத்திரைகள் போன்ற விவரங்களை எழுதி வாங்கி வைக்கவும்.

* டாக்டர் தரும் மருந்துச் சீட்டை இரண்டு நகல் எடுத்து வெவ்வேறு பெட்டிகளில் போட்டு வையுங்கள்.

* உங்கள் மருந்துகளுக்காகவே ஒரு சிறிய கைப் பையை அவசியம் வைத்திருங்கள். அதில் வெளியூருக்குச் செல்லும் நாட்களுக்குத் தேவையான அனைத்து மருந்து மாத்திரைகளையும் வைத்துக்கொள்ளவும்.

* இன்சுலின் போன்ற மருந்துகளை அதற்கு உண்டான பெட்டியோடு எடுத்துச் செல்ல வேண்டும். தவறி கீழே விழுந்தால் எளிதில் உடையாமல் இது பாதுகாக்கும். இது போன்ற மருந்துகளை சரியான குளிர் நிலையில் முடிந்தவரை வைத்திருத்தல் அவசியம்.

* ஒரே பையில் அனைத்து மருந்துகளையும் வைக்க வேண்டாம். ஒரு பை தவறினாலும் அடுத்த பையில் உள்ள மருந்துகள் ஆபத்துக் காலத்தில் நமக்கு கை கொடுக்கும்.

*பிரயாணத்தின்போது பயன்படுத்திய வேண்டாத ஊசிகளைப் போட்டுவைக்க, ஒரு தனி மூடி போட்ட பாக்ஸை வைத்துக்கொள்ளுங்கள். நம் இடத்தை அடைந்ததும் இதனை அப்புறப்படுத்தலாம்.

*அனைத்து தகவல் அடங்கிய ஒரு டைரியை எடுத்துச் செல்வது அவசியம். அதில் உங்கள் இன்ஷ்யூரன்ஸ் பாலிஸி எண், மற்றும் தொடர்பு கொள்ள வேண்டிய தொலைபேசி எண்கள் போன்றவற்றை எழுதி வைத்துக்கொள்ளுங்கள்.

* தற்போது தாங்களே குளுக்கோமீட்டர் என்ற சின்ன கருவியைப் பயன்படுத்தி சர்க்கரையின் அளவை சரி பார்க்கிறார்கள். அப்படி பயன்படுத்துபவர்கள் அதை மறக்காமல் எடுத்துச் செல்ல வேண்டும். டைரியில் சர்க்கரையின் அளவு, கருவியின் ஐடிஎண், தொலைபேசி எண்களையும் குறித்து வைத்துக் கொள்வது நல்லது.

* எக்காரணம் கொண்டும் நீண்ட நேரம் எதுவும் சாப்பிடாமல் இருக்கக்கூடாது. விமான பயணத்தின்போது சாப்பிட இலவசமாக எதுவும் தர மாட்டார்கள். ரயில் பயணத்தில் வாங்க முடி யாமலும் போகலாம். அதனால் எப்போதும் ஏதேனும் தின்பண்டத்தை கையிருப்பாக வைத்துக்கொள்ளவும். கைப்பையில் வைத்துக்கொள்ளுங்கள்.

* ஒரு சிலருக்கு திடீரென சர்க்கரை குறையும்போது மயக்கம் ஏற்படலாம். அதற்காக குளுகோஸ் மருந்துகளை கைப்பையில் மேலாக வைத்தால் எடுக்க எளிதாக இருக்கும்.

* உங்கள் பொன்னான பாதங்களைப் பாதுகாக்க சாக்ஸ் மற்றும் கை உறைகளை எடுத்துச் செல்வது நல்லது. கால் பாதம் வலிக்காமல் இருக்க 'சிலிப்ஆன்' வகை ஷூக்களைப் பயன்படுத்தலாம்.

* விமானத்தில் நீண்ட தூரம் தனியாக நீங்கள் செல்வதாக இருந்தால், பணிப்பெண்ணிடம் உங்களுக்கு நீரிழிவு நோய் உள்ள தகவலை முன்கூட்டியே தெரியப்படுத்துங்கள்.

* வெளிநாட்டுக்குச் செல்வோர், ஆங்கிலம் தெரிந்த மருத்துவரைப் பார்ப்பது நல்லது. அல்லது தனக்கு சர்க்கரை நோய் உள்ளது என்பதை அந்த நாட்டு மொழியில் எப்படி சொல்வது என்பதை முன்கூட்டியே கேட்டுத் தெரிந்து எழுதி வைத்துக்கொள்ளுங்கள்.

*நாடுவிட்டு நாடு செல்லும்போது கடிகார நேரத்தில் மாற்றம் இருக்கும். எனவே அந்த நாட்டு நேரத்துக்கு ஏற்றார்போல் ஊசி, மருந்து. மாத்திரைகளைத் தவறாமல் உட்கொள்ள வேண்டும்.

* நீண்ட நேரம் உட்கார்ந்து இருந்தாலோ அல்லது நடந்தாலோ, மூட்டு வலி வரலாம். ஆகவே மூட்டு வலிக்கு போட்டுக் கொள்ள கிரிப் பேண்டுகளையும் எடுத்துச் செல்ல வேண்டும். இவை ஃபார்மஸியில் சைஸ் வாரியாகக் கிடைக்கின்றன.

*சருமத்தைப் பாதுகாக்க நீங்கள் செல்லும் இடம் அல்லது நாட்டின் சீதோஷ்ண நிலைக்கு ஏற்ப, பிரத்யேக லோஷன்களை வாங்கி எடுத்துச் செல்லுங்கள்.

* ஒரு சிறிய முதலுதவி கிட் ஒன்றையும் தயார் செய்து, மருந்துப் பையில் போட்டு வைக்கவும். இதில் காட்டன், சிறுகத்திரி, 'பேண்ட் எய்ட் போன்றவற்றை அவசியம் வைத்திருங்கள்.

இப்போது எதைப் பற்றியும் கவலையே படாமல், ரிலாக்ஸாக ட்ராவல் பண்ணுங்க.