அரிதாய் பயன்படுத்தும் ஆற்றல் மிக்க காய்கள்!

நமது  அன்றாட சமையலில் நாம் அரிதாக பயன்படுத்தி வரும் சில காய்கறிகள் ஆற்றல் மிக்க காய்கறிகள் பட்டியலில் இடம் பெற்றுள்ளது. அப்படிப்பட்ட காய்கறிகளுள் ஒன்று டர்னிப் மற்றொன்று நூல்கோல் காய்.

அமெரிக்காவின் புகழ்பெற்ற உடல் நல ஆலோசகர் டாக்டர் மைக்கேல் கிரேஜர். மரணத்தை தள்ளிப்போட உதவும் உணவுகள் என்பது பற்றி பேசுகையில் அன்றாடம் எடுத்துக்கொள்ள வேண்டிய காய்களுள் ஒன்று என்று  டர்னிப் பற்றியும் குறிப்பிடுகிறார்.

சுமார் 4000 ஆண்டுகளாக பயிரிடப்பட்டு வரும் கிழங்கு வகை காய்கறிதான் டர்னிப் . இது கிரேக்க நாட்டில் தோன்றியது. முட்டைக்கோஸ், காலிஃபிளவர் மற்றும் புரோக்கோலி போன்றே இதுவும் குருசிஃபெரே தாவரக்குடும்பத்தைச்சேர்ந்ததுதான். இதனால் தான் டர்னிப் காயிலும் ஒரு காரல் வாடை வருகிறது.

டர்னிப் குறைந்த கலோரியும், அதிக நார்ச்சத்தும்  கொண்ட காய். அதோடு முக்கிய வைட்டமின் களான  ஏ,பி1,பி3,பி5,பி6 மற்றும் போலோட், வைட்டமின் சி,இ மற்றும் கே யும் உள்ளது. அதே வேளையில் இரும்புச்சத்து, கால்சியம், மெக்னிசியம், மாங்கனிசு,பொட்டாசியம், காப்பர், பாஸ்பரஸ் போன்ற ஆற்றல் மிக்க தாதுக்களும். புரதச்சத்து மற்றும் பயன்தரும் ஒமேகா-3 கொழுப்பு அமிலம் உள்ளது. எனவேதான் டர்னிப் அதன் அனைத்து பகுதிகளிலும் ஆற்றலை கொண்ட சூப்பர் உணவு என்கிறார்கள்.

நடுத்தரமான ஒரு டர்னிப் காயில் உள்ளது 34 கலோரிகள்,4 கிராம் நார்ச்சத்து,1 கிராம் புரதம் மற்றும் ஒரு நாளைக்கு தேவையான வைட்டமின் சி யில் பாதியளவு உள்ளது இதிலுள்ள நார்ச்சத்து ஜீரணசக்தியை அதிகரித்து செரிமான பிரச்சனைகளையும் குடல் சம்பந்தப்பட்ட தொந்தரவுகளையும் தவிர்க்க உதவுகிறது , உடல் எடையை குறைக்கவும்  உதவுகிறது என்கிறார்கள்.

டர்னிப் காயிலுள்ள அதிகப்படியான வைட்டமின் சி குளிர் காலங்களில் வளர் சிதை மாற்றத்தை அதிகரித்து இருதயத்தையும், நுரையீரலையும் பாதுகாக்கிறது. டர்னிப்பிலுள்ள நைட்ரேட்ஸ் மற்றும் பொட்டாசியம் இரத்த அழுத்தத்தை சீராக வைக்க உதவுகிறது. அதிகப்படியான சோடியத்தை வெளியேற்றி ரத்த தமணிகள் சீராக செயல்பட உதவுகிறது.

டர்னிப்பில்  உள்ள சல்போர்பைன் மற்றும் இன்டோல் 3 வேதிப்பொருள்கள் பெண்கனின் மார்பக புற்றுநோய், ஆண்களின் புரோஸ்டேட் கேன்சர் மற்றும் பெருங்குடல், கணையம், உணவுக்குழாய், தோல் புற்றுநோய் செல்களை அழிக்கிறது என்கிறார்கள் ஆய்வாளர்கள்.

டர்ளிப்பிலுள்ள கால்சியம், மாங்கனிசு மற்றும் பாஸ்பரஸ் எலும்புகளின் பலத்திற்கு உதவுவதுடன், மூட்டு வலிகளையும் போக்குகிறது. குறிப்பாக மாங்கனிசு சரும இளமையை பாதுகாப்பதுடன், வயது முதிர்ச்சியால் ஏற்படும் சரும பாதிப்புகளை தவிர்க்கிறது குறிப்பாக குளிர்காலத்தில்.

டர்னிப்பிலுள்ள வைட்டமின் பி தொகுதிகளும், மெக்னிசியம் சத்தும் மூளையின்செயல்பாட்டை தூண்டுவதுடன் அதன் ஆரோக்கியம் காக்கவும் உதவுகிறது.

நூல்கோல்  வடமேற்கு ஐரோப்பாவை தாயகமாக கொண்ட ப்ராசிகாசி தாவரக்குடும்பத்தைச்சேர்ந்த காய் .டர்னிப் போன்றே இதிலும் அனைத்து முக்கியமான வைட்டமின்களும், தாது உப்புக்களும் உள்ளது. எனவே தான் நூல்கோலை "ஜெர்மன் டர்னிப்' என்கிறார்கள். ஆனால் நூல்கோல் குறுச்செடி தாவரம் இதன் தண்டுப்பகுதியே நூல்கோல் காய்.

ஒரு கப் (135கிராம்) நூல்கோலில் கலோரி 36,நார்ச்சத்து 5 கிராம் ,கார்போஹைட்ரேட் 8 கிராம்,புரதம் 2 கிராம் உள்ளது. ஒரு நாள் தேவையான வைட்டமின் சி 93% உள்ளது. இதிலுள்ள வைட்டமின் சி ஆரஞ்சு பழத்தை விட 5 மடங்கு அதிகம். 10 ஆப்பிள் பழங்களில் இருக்கும் சத்து 100 கிராம் நூல்கோலில் உள்ளது.

நூல்கோலில் உள்ள அதிகப்படியான வைட்டமின் சி உடலுக்கு தேவையான நோய் எதிர்பாற்றலை தருகிறது, பிரிரேடிக்கலை தவிர்க்கவும், உடலில் இரும்புச்சத்து உறியப்படவும் உதவுகிறது. நூல்கோலில் உள்ள அதிகப்படியான வைட்டமின் கே இதயக்கோளாறுகள் வராமல் தடுக்கும். வாரம் இரு முறை நூல்கோல் சாப்பிடுவது  பெண்களின் இதயநோய் அபாயத்தை 13% குறைப்பதாக ஆய்வில் கண்டறியப்பட்டுள்ளது.

நூல்கோலில் உள்ள வைட்டமின் பி தொகுதிகள் வெள்ளை அணுக்களின் மற்றும் டி செல்களின் உற்பத்தியை அதிகரித்து நோய் எதிர்பாற்றலையும் அதிகரிக்கும். இதில் வளர்சிதை மாற்றத்தை அதிகரிக்கும் "லிப்பிடுகள்' உள்ளது இவை உடலில் தேவையற்ற கொழுப்பை கரைக்கும், ரத்த சர்க்கரை அளவை குறைக்கும், கல்லீரலிலுள்ள "பைட்ரோ ஜெனல்'எனும் திசக்களை பாதுகாத்து கல்லீரலின் ஆரோக்கியத்தையும் காக்கும்.

அதிகப்படியான சர்க்கரை உள்ளவர்கள் நூல்கோல் ஜூஸ்யை தொடர்ந்து 7 நாட்கள் சாப்பிட அதிகப்படியான சர்க்கரை அளவு 64% குறையும் எள்பதை ஆய்வில் கண்டறிந்துள்ளனர்..மேலும் இதிலுள்ள நார்ச்சத்தும், நீர் சத்தும் உடல் எடை குறைக்கும், வயிற்றில் எரிச்சல் மற்றும் அல்சர் புண்களையும் ஆற்றும்.

குழந்தை பெற்ற பெண்கள் பிஞ்சு நூல்கோல் மூன்று நாட்கள் தொடர்ந்து சாப்பிட்டால் தாய்ப்பால் நன்கு சுரக்கும். வாரத்தில் 100 கிராமாவது நூல்கோல் சாப்பிட வேண்டும் அப்படி சாப்பிட நரம்பு தளர்ச்சி ஏற்படாது, குடல் நாளங்கள் உறுதிபடும், மார்பக புற்றுநோய், பெருங்குடல் மற்றும் மலக்குடல் புற்றுநோய் தடுக்கலாம் என்கிறார்கள். குளிர் காலங்களில் நன்மை பயக்கும் சில காய்கறிகளில் நூல்கோலும் ஒன்று.