அதிசய இரட்டையர்கள்: 10 முதல் MBBS வரை ஏறக்குறைய ஒரே மாதிரியான மதிப்பெண்கள்!

10 முதல் எம்.பி.பி.எஸ் வரை ஏறக்குறைய ஒரே மாதிரியான மதிப்பெண்களை பெற்று அசத்திய இரட்டை சகோதரிகள்..!

உலகில் இரட்டை சகோதரிகள் பல பகுதிகளில் தங்களது பொதுத்தேர்வுகளில் ஒரே மதிப்பெண் பெற்று அசத்தி உள்ளனர். ஆனால் தங்களது 10 வது பொதுத் தேர்வு முதல் எம்.பி.பி.எஸ் இறுதித்தேர்வு வரை கிட்டத்தட்ட ஒரேமாதிரியான மதிப்பெண்கள் பெற்று சாதிக்க முடியுமா? அதை சாதித்து காட்டியுள்ளார்கள் சூரத் நகரில் உள்ள இரட்டை சகோதரிகள்.

குஜராத் மாநிலத்தில் சூரத்தைச் சேர்ந்த 24 வயது இரட்டை சகோதரிகளான ரிபா மற்றும் ரஹின் ஹஃபீஸ்ஜி ஆகியோர் தங்கள் இறுதி MBBS தேர்வுகளில் ஒரே மாதிரியான மதிப்பெண்களைப் பெற்று அண்மையில் அரிய சாதனை படைத்துள்ளனர். இருவரும் வதோதராவில் உள்ள GMERS மருத்துவக் கல்லூரியில் 935/1400 மதிப்பெண்களுடன் (66.8%) பட்டம் பெற்றனர், இது மருத்துவர்களாக மாறுவதற்கான அவர்களின் பயணத்தில் ஒரு மறக்கமுடியாத மைல்கல்லாக அமைந்துள்ளது.

குல்ஷாத் பானு என்ற ஆசிரியராகவுள்ள ஒற்றை தாயால் வளர்க்கப்பட்ட இந்த சகோதரிகள், நிதி நெருக்கடிகளை எதிர்கொண்டாலும், அவர்களது நெருங்கிய குடும்பத்தில் முதல் மருத்துவர்களாக வேண்டும் என்ற பொதுவான இலக்கிலிருந்து ஒருபோதும் பின்வாங்கவில்லை. அரசாங்க உதவித்தொகைகள் மற்றும் தகுதி அடிப்படையிலான உதவிகள் மூலம் அவர்களின் பயணம் தொடர்ந்தது. இது தேவையற்ற நிதிச் சுமை இல்லாமல் அவர்களின் கல்வியை முடிக்க உதவியது.

"நாங்கள் குடும்பத்தில் முதல் மருத்துவர்கள். எங்கள் பெரிய குடும்பத்தில், என் தாய்வழி மாமா ஒரு மருத்துவர், மருத்துவம் படிக்க எங்களைத் தூண்டினார். வளர்ந்த பிறகு, நாங்கள் எப்போதும் ஒன்றாகத் தேர்வுகளுக்குத் தயாராக இருந்ததால், ஒரே மாதிரியான மதிப்பெண்களைப் பெற்றோம்," என்கிறார் ரஹின்.

"நாங்கள் எப்போதும் ஒன்றாகப் படித்து ஒருவருக்கொருவர் ஆதரவளித்துள்ளோம். பள்ளியிலிருந்து எம்பிபிஎஸ் வரை, எங்கள் பாதைகள் ஒரே மாதிரியாகவே இருந்தன," என்று ரஹின் கூறியுள்ளார். சகோதரிகள் தொடர்ந்து சமமான மதிப்பெண்களைப் பெற்றுள்ளனர், 10 வது பொது தேர்வில் ரிபா 99 சதவீதத்திலும், ரஹின் 98.5 சதவீதத்திலும் தேர்ச்சி பெற்றனர். அவர்கள் 12வது வகுப்பில் ரிபா 98.2 சதவீதமும், ரஹின் 97.3 சதவீதமும் பெற்றனர்; நீட்-யுஜியிலும் ரிபா 97 சதவீதமும், ரஹின் 97.7 சதவீதம் மதிப்பெண்களைப் பயிற்சி நிறுவனங்களின் உதவியின்றி பெற்றனர்.

2019 ம் ஆண்டு GMERS கோத்ரி வளாகத்தில், இருவரும் ஒரே விடுதி அறையைப் பகிர்ந்து கொண்டு ஒன்றாக வகுப்புகளில் கலந்து கொண்டனர்.

வீட்டிற்கு அருகில் தங்கி ஒன்றாக இருக்க ஜாம்நகர் அல்லது பாவ்நகர் போன்ற பிற அரசு கல்லூரிகளை விட வதோதராவைத் தேர்ந்தெடுத்தனர்.

சகோதரிகள் தங்கள் வெற்றிக்கு தங்கள் தாய் மற்றும் தாய்வழி தாத்தா பாட்டிகளின் உறுதியான ஆதரவைக் காரணம் காட்டுகிறார்கள். "நாங்கள் பல ஏற்ற தாழ்வுகளைக் கடந்து வந்துள்ளோம், மேலும் என் அம்மாவும் தாத்தா பாட்டிகளும் எங்களுக்கு நிலையான பலம் மற்றும் உத்வேகமாக இருந்து வருகின்றனர். அவர்களின் கனவுகளை நிறைவேற்ற முடிந்ததில் நாங்கள் மகிழ்ச்சியடைகிறோம்," என்கிறார் ரஹின்.

அரசாங்க உதவித்தொகைகள் மற்றும் பிற தகுதி அடிப்படையிலான நிதி உதவி மூலம், நாங்கள் அதிக கவலை இல்லாமல் கல்லூரியில் சேர முடிந்தது. நான் மகப்பேறியல் மற்றும் மகளிர் மருத்துவம் போன்ற அறுவை சிகிச்சை பிரிவைத் தொடர விரும்புகிறேன், அதே நேரத்தில் ரிபா உள் மருத்துவத்தில் ஆர்வமாக உள்ளார். ஆனால் முதுகலை படிப்புகளுக்கும் அதே கல்லூரியில் சேர்க்கை பெற விரும்புகிறோம்," என்று ரஹின் மேலும் கூறியுளாளார்.

மருத்துவம் படிக்கும் பெண்கள் மிகக் குறைவாக உள்ள சிந்தி ஜமாதி சமூகத்தைச் சேர்ந்த இந்த சகோதரிகள், தங்கள் வேர்களைப் பிரதிநிதித்துவப்படுத்துவதில் பெருமை கொள்கிறார்கள். "இந்தப் பயணம் முழுவதும், குடும்பம், சமூகம் மற்றும் உதவித்தொகைகளின் ஆதரவை நாங்கள் பெற்றுள்ளோம். இப்போது மக்களுக்கு சேவை செய்வதன் மூலம் திருப்பித் தர வேண்டிய முறை இது," என்று ரிபா கூறியுள்ளார்.