‘குறுவை நெற்பயிரையும் தமிழக விவசாயிகளையும் காக்க வேண்டும்’ பிரதமருக்கு முதல்வர் ஸ்டாலின் கடிதம்!

‘தமிழக காவிரி டெல்டா பகுதிகளில் குறுவை சாகுபடிக்காகக் காத்திருக்கும் நெற்பயிரையும் தமிழக விவசாயிகளையும் காப்பாற்ற காவிரியிலிருந்து உரிய நீரை திறந்துவிட கர்நாடக அரசுக்கு உத்தரவிட வேண்டும் என்று பிரதமர் நரேந்திர மோடிக்கு, தமிழக முதல்வர் மு.க.ஸ்டாலின் இன்று கடிதம் எழுதி இருக்கிறார்.

அந்தக் கடிதத்தில், "தமிழகம், குறிப்பாக காவிரி டெல்டா பகுதிகள் தென்மேற்கு பருவ மழையின்போது மிகக் குறைவான மழைப்பொழிவையே பெறுகின்றன. குறுவை சாகுபடியும், சம்பா நெல் விதைப்பும், மேட்டூர் அணையில் இருந்து திறந்து விடப்படும் தண்ணீரை, குறிப்பாக கர்நாடகாவிலிருந்து வரும் தண்ணீரை மட்டுமே சார்ந்துள்ளது. மாதாந்திர அட்டவணைப்படி, பிலிகுண்டுலுவில், தமிழகத்துக்கு வழங்க வேண்டிய நீரின் பங்கை உச்ச நீதிமன்றம் நிர்ணயித்து உள்ளது. துரதிர்ஷ்டவசமாக, இந்த உத்தரவை கர்நாடகம் முழுமையாக மதிக்கவில்லை. காவிரி நீர் மேலாண்மை ஆணையத்தின் வழிகாட்டுதல்களையும் கடைபிடிக்கவில்லை.

2023 - 2024ம் ஆண்டில், 2023 ஜூன் 1 முதல் ஜூலை 31 வரை கர்நாடகாவிலிருந்து பிலிகுண்டுலுவுக்கு 40.4 டி.எம்.சி. தண்ணீர் வந்து சேர வேண்டிய நிலையில், 11.6 டி.எம்.சி. தண்ணீர் மட்டுமே வந்துள்ளது. கர்நாடகாவில், நான்கு முக்கிய நீர்த்தேக்கங்களின் முழு கொள்ளளவான 114.6 டி.எம்.சி.யில், 91 டி.எம்.சி. அளவுக்கு மொத்த நீர் இருப்பு தற்போது உள்ளபோதிலும், கர்நாடக அரசு 28.8 டி.எம்.சி. அளவுக்கு பற்றாக்குறையாக தமிழகத்துக்கு தண்ணீர் திறந்து விட்டுள்ளது பெரும் நெருக்கடியை ஏற்படுத்தி உள்ளது.

டெல்டாவின் உயிர்நாடியாக விளங்கும் மேட்டூர் அணையில் 2023, ஆகஸ்ட் 2ம் நாளன்று நிலவரப்படி 26.6 டி.எம்.சி. அளவுக்கு மட்டுமே தண்ணீர் உள்ளது. இது குடிநீர் மற்றும் இதர அத்தியாவசிய தேவைகளுக்கு 15 நாட்களுக்கு மட்டுமே போதுமானதாக இருக்கும். குறுவை நெற்பயிர் முதிர்ச்சியடைந்து, அதிக மகசூல் பெற இன்னும் 45 நாட்கள் தண்ணீர் தேவைப்படுகிறது. இத்தகைய ஆபத்தான சூழ்நிலையைக் கருத்தில் கொண்டு, மத்திய ஜல்சக்தித் துறை அமைச்சரிடம் கடந்த ஜூலை 5 மற்றும் 19 தேதிகளில் இந்தப் பிரச்னையை எடுத்துச் சென்று, உச்ச நீதிமன்றம் நிர்ணயித்த விநியோக அட்டவணையைக் கடைப்பிடிக்க கர்நாடக அரசுக்கு உரிய அறிவுரைகளை வழங்கிடுமாறும், இதனை முறையாகக் கண்காணிக்க காவிரி நீர் மேலாண்மை ஆணையத்தினை அறிவுறுத்துமாறும் வலியுறுத்தினேன். ஆனாலும், கர்நாடக அரசு இதை எதையும் கருத்தில் கொள்ளாமல், முழுமையாக நிரம்பிய கபினி அணையில் இருந்து மட்டுமே தண்ணீரைத் திறந்து விட்டதாகவும், கர்நாடகாவின் முக்கிய நீர்த்தேக்கங்கள் 80 விழுக்காடு அளவுக்கு நிரம்பியுள்ள நிலையிலும், அவற்றுக்குத் தொடர்ந்து நல்ல நீர்வரத்து உள்ள சூழ்நிலையிலும், அந்த நீர்த்தேக்கங்களிலிருந்து தண்ணீர் ஏதும் திறந்து விடப்படவில்லை.

தமிழகத்தின் நெற்களஞ்சியமாக விளங்கும் காவிரி டெல்டா, மாநிலத்தின் நெல் தேவையைப் பெருமளவு பூர்த்தி செய்கிறது. ஏற்கெனவே அரிசித் தட்டுப்பாட்டால் பாசுமதி அல்லாத அரிசி ஏற்றுமதிக்கு மத்திய அரசு தடை விதித்துள்ள சூழலில், காவிரி டெல்டாவில் தற்போது உள்ள குறுவை நெல் பயிரையும், தமிழக விவசாயிகளின் வாழ்வாதாரத்தையும் பிரதமர் நரேந்திர மோடி உடனடியாகத் தலையிட்டுக் காப்பாற்ற வேண்டும்.

மேலும், உச்ச நீதிமன்றம் நிர்ணயித்துள்ளபடி, தமிழகத்துக்கு வழங்க வேண்டிய தண்ணீரை உடனடியாகத் திறந்துவிடவும், ஜூன் மற்றும் ஜூலை மாதங்களில் ஏற்பட்ட பற்றாக்குறையைத் தீர்க்கவும் கர்நாடக அரசுக்கு பிரதமர் உரிய அறிவுரைகளை வழங்குவதோடு, இதனை உறுதி செய்வதற்குத் தேவையான அறிவுரைகளை மத்திய ஜல்சக்தி அமைச்சகத்துக்கும் வழங்கிட வேண்டும்" என்று முதல்வர் அந்தக் கடிதத்தில் குறிப்பிட்டு இருக்கிறார்.