அவசர சிகிச்சைப் பிரிவிலேயே திருமணம்..! கேரள புதுமணத் தம்பதிகளுக்கு உதவிய UAE தொழிலதிபர்..!!

கேரளாவில், திருமணத்திற்கு சில மணி நேரத்திற்கு முன்பு விபத்தில் சிக்கிய மணப்பெண்ணுக்கு, ஐக்கிய அரபு அமீரகத்தை (UAE) சேர்ந்த தொழிலதிபர் ஒருவர் எதிர்பாராத வகையில் உதவிக்கரம் நீட்டியுள்ளார். 

கொச்சியில் உள்ள வி.பி.எஸ். லேக்சோர் மருத்துவமனையின் அவசர சிகிச்சைப் பிரிவில் (Emergency Ward) நடந்த இந்தத் திருமணம் சமூக வலைத்தளங்களில் வைரலான நிலையில், தற்போது இந்த புதிய உதவி செய்தியில் இடம்பிடித்துள்ளது.

வி.பி.எஸ். லேக்சோர் மருத்துவமனையின் தலைவரும், அபுதாபியைத் தளமாகக் கொண்ட பர்ஜீல் ஹோல்டிங்ஸின் தலைவருமான டாக்டர் ஷம்ஷீர் வயலில் (Dr Shamsheer Vayalil) அவர்கள், மணமகள் அவனியின் முழு மருத்துவச் செலவையும், முதுகுத்தண்டு அறுவை சிகிச்சை மற்றும் புனர்வாழ்வுக்கான (Rehabilitation) செலவையும் தானே ஏற்றுக்கொள்வதாக அறிவித்துள்ளார்.

மணப்பெண் அவனிக்கு முக்கிய முதுகுத்தண்டு அறுவை சிகிச்சை நடைபெறுவதற்கு சில மணி நேரத்திற்கு முன்பு, டாக்டர் ஷம்ஷீரின் இந்த உதவி அறிவிப்பு வெளியானது. 

இந்த நெகிழ்ச்சியான சம்பவம் குறித்து அறிந்ததும் சனிக்கிழமை காலை மருத்துவமனை நிர்வாகத்தை டாக்டர் ஷம்ஷீர் தொடர்பு கொண்டுள்ளார். 

இது குறித்து டாக்டர் ஷம்ஷீர் கூறுகையில், “இந்தத் தம்பதியினர் சில மணி நேரங்களில் எதிர்கொண்ட சவால்கள் கற்பனை செய்ய முடியாதவை.

அவர்களின் துணிச்சல் அனைவரையும் நெகிழ வைத்துள்ளது. அவனி தனது முழு கவனத்தையும் குணமடைவதில் செலுத்துவதை நாங்கள் உறுதி செய்ய விரும்புகிறோம். 

அவரது சிகிச்சைக்கான அனைத்து கவனிப்பும் வழங்கப்படும். மருத்துவமனையும், மருத்துவர் குழுவும் அவர்களுக்கு ஒரு நீட்டிக்கப்பட்ட குடும்பமாக ஆதரவளிக்கும்” என்று தெரிவித்தார்.

கோட்டயம் மாவட்டத்தில் உள்ள குமரகம் என்ற சுற்றுலாத் தலத்தில், வெள்ளிக்கிழமை அதிகாலை 3 மணியளவில் அவனி, தனது திருமணத் தயாரிப்புகளுக்காகச் சென்று கொண்டிருந்தபோது விபத்தில் சிக்கினார். 

அவருக்கு முதுகுத்தண்டு மற்றும் இடுப்புப் பகுதியில் பலத்த காயம் ஏற்பட்டது. முதலில் கோட்டயம் மருத்துவக் கல்லூரிக்கு அழைத்துச் செல்லப்பட்ட அவர், பின்னர் கொச்சி வி.பி.எஸ். லேக்சோர் மருத்துவமனைக்கு சிறப்பு சிகிச்சைக்காக மாற்றப்பட்டார்.

விபத்து காரணமாக திருமணத் திட்டங்கள் தடம் புரண்டதால், மணமகன் ஷரோன், மணமகள் அவனியை அவசர சிகிச்சைப் பிரிவில் வைத்து வெள்ளிக்கிழமை மதியம் திருமணம் செய்துகொண்டார்.

வெற்றிகரமாக நடந்த அறுவை சிகிச்சை

விரிவான பரிசோதனைக்குப் பிறகு, மருத்துவக் குழு வெள்ளிக்கிழமை காலை 9.35 மணிக்கு அறுவை சிகிச்சையைத் தொடங்கியது. 

நரம்பியல் அறுவை சிகிச்சைத் துறைத் தலைவர் டாக்டர் சுதீஷ் கருணாகரன் தலைமையிலான நிபுணர் குழு இந்தச் சிக்கலான அறுவை சிகிச்சையை வெற்றிகரமாக முடித்தது. 

அசைவு மற்றும் ஸ்திரத்தன்மைக்கு முக்கியமான L4 முதுகுத்தண்டுப் பகுதியில் அவனிக்குக் கடுமையான காயம் ஏற்பட்டிருந்தது.

“இது ஒரு சிக்கலான வழக்கு. ஆனால் அறுவை சிகிச்சை திட்டமிட்டபடி நடந்தது. அவரது முதுகுத்தண்டு உறுதிப்படுத்தப்பட்டுள்ளது, நரம்பின் அழுத்தம் அகற்றப்பட்டுள்ளது. 

அவர் தற்போது நரம்பியல் தீவிர சிகிச்சைப் பிரிவில் (ICU) கண்காணிக்கப்பட்டு வருகிறார்,” என்று டாக்டர் சுதீஷ் கருணாகரன் தெரிவித்தார்.

மணமகன் ஷரோன், "இன்று கிடைத்த ஆதரவு நாங்கள் சற்றும் எதிர்பார்க்காத ஒன்று. அவரது அறுவை சிகிச்சை சிறப்பாக முடிந்தது எங்களுக்கு நம்பிக்கையை அளிக்கிறது" என்று உருக்கத்துடன் கூறினார். 

அவனி மேலும் சில நாட்களுக்குத் தீவிர சிகிச்சைப் பிரிவில் இருப்பார் என்றும், அதன்பிறகு மறுவாழ்வுப் பணிகளைத் தொடங்குவார் என்றும் மருத்துவர்கள் தெரிவித்தனர்.