தொலைந்து போன செல்போன்களை கண்டுபிடிக்கும் ‘APP’- இதுவரை 7.13 லட்சம் செல்போன்கள் மீட்பு..!!

அதிக விலை கொடுத்து வாங்கிய செல்போன்கள் திடீரென திருடு போனாலோ, தொலைந்து போய்விட்டாலோ அதனை மீண்டும் மீட்டெடுப்பது மிகப்பெரிய சவாலாகும். அந்த சமயத்தில் என்ன செய்றதுனு தெரியாம நமக்கு கையும் ஓடாது, காலும் ஓடாது. ஏன்னா போனில் உள்ள முக்கியமான தகவல், contacts, bank appsனு எல்லாமே அதுலதான் இருக்கும். திருடப்பட்ட போனை வைத்து நம்முடைய அனைத்து தரவுகளும் திருடப்படுமோ என்ற கவலையில் தவிக்கும் மக்களுக்கு உதவத்தான், இந்திய அரசாங்கம் சஞ்சார் சாத்தி (Sanchar Saathi) போர்ட்டலை ஆரம்பிச்சிருக்காங்க.

அதாவது தொலைந்து போன மற்றும் திருடப்பட்ட செல்போன்களை கண்டுபிடிக்கவும், போலியான மற்றும் மோசடியான அழைப்புகள் குறித்து புகார் அளிக்கவும் ‘சஞ்சார் சாத்தி' என்ற இணையதளம் மற்றும் செயலியை மத்திய தொலைதொடர்பு அமைச்சகம் அறிமுகப்படுத்தி உள்ளது. இந்த இணையதளம் கடந்த 2023-ம் ஆண்டு மே மாதம் 16-ந்தேதியும், செயலி கடந்த ஜனவரி மாதம் 17-ந்தேதியும் செயல்பாட்டுக்கு வந்தது.

இந்த போர்ட்டல் ரொம்ப பாதுகாப்பானது. இதுல, காணாம் போன உங்க போனை Block செய்ய, track செய்ய, அல்லது மீட்டு எடுக்கக்கூட முடியும். CEIR (Central Equipment Identity Register)-ஆல் இயக்கப்படும் இந்தத் திட்டம், ஏற்கெனவே லட்சக்கணக்கான பேருக்கு அவங்க போனைத் திரும்பக் கிடைக்க உதவி செஞ்சிருக்கு.

இந்த தளத்தில், செல்போன் தொலைந்துபோவது அல்லது திருடப்பட்டது குறித்து சம்பந்தப்பட்ட நபர் புகார் அளித்தால், உடனடியாக அந்த செல்போன் முடக்கப்படும். பின்னர் அந்த செல்போனில் ஏதாவது சிம் கார்டு போட்டால் நிகழ்நேர தரவு தொழில்நுட்பத்தின் அடிப்படையில், IMEI எண் உதவியோடு குறிப்பிட்ட அந்த செல்போனை பறிகொடுத்தவர்களுக்கும், புகார் கொடுக்கப்பட்ட போலீஸ் நிலைய போலீசாருக்கும் தகவல் வரும்.

தொழில்நுட்ப அமைச்சக டிஜிட்டல் நுண்ணறிவு பிரிவு, மாநில போலீசாரோடு இணைந்து துரிதமாக செயல்பட்டு தொலைந்த, திருடுபோன செல்போன்களை கண்டுபிடித்து உரியவர்களிடம் ஒப்படைத்து வருகிறது. செல்போன் திருடு மற்றும் தொலைந்துபோனதாக ‘சஞ்சார் சாத்தி’க்கு 41 லட்சத்து 84 ஆயிரத்து 558 புகார்கள் வந்துள்ளன. இவற்றில் 7 லட்சத்து 13 ஆயிரத்து 673 செல்போன்கள் கண்டுபிடிக்கப்பட்டு, அதன் உரிமையாளர்களிடம் ஒப்படைக்கப்பட்டுள்ளன. கடந்த ஜூன் முதல் அக்டோபர் வரை காணாமல் போன 47% செல்போன்கள் மீட்கப்பட்டுள்ளது, இதனால் நாடு முழுவதும் ஒவ்வொரு நிமிடமும் ஒன்றுக்கு மேற்பட்ட செல்போன்கள் மீட்கப்பட்டுள்ளதாகவும் மத்திய தொலைதொடர்பு அமைச்சகம் தெரிவித்துள்ளது.

தமிழகத்தை பொறுத்தமட்டில் 1 லட்சத்து 88 ஆயிரத்து 120 பேர் செல்போன் திருடு மற்றும் தொலைந்துபோனதாக புகாரை பதிவு செய்துள்ளனர். இதில், 42 ஆயிரத்து 814 செல்போன்கள் கண்டுபிடிக்கப்பட்டு, உரிமையாளர்களிடம் ஒப்படைக்கப்பட்டுள்ளது. கடந்த மாதம்(அக்டோபர்) மட்டும் நாடு முழுவதும் மாயமான 50 ஆயிரத்துக்கும் மேற்பட்ட செல்போன்கள் கண்டுபிடிக்கப்பட்டுள்ளன.

‘சஞ்சார் சாத்தி’ இணையதளத்தில், செல்போன் இணைப்பு தங்கள் பெயரில் இருக்கிறதா? என்ற தகவலை 2 கோடியே 85 லட்சத்து 80 ஆயிரத்து 924 பேர் கேட்டுள்ளனர். இதில் 2 கோடியே 50 லட்சத்து 75 ஆயிரத்து 416 கோரிக்கைகள் தீர்த்து வைக்கப்பட்டுள்ளன.

அந்த வகையில், தமிழகத்தில் செல்போன் இணைப்பு தங்கள் பெயரில் இருக்கிறதா? என்று 14 லட்சத்து ஆயிரத்து 75 பேர் கேட்டிருக்கிறார்கள். இவர்களில் 12 லட்சத்து 46 ஆயிரத்து 846 பேரின் கோரிக்கைகள் தீர்த்து வைக்கப்பட்டுள்ளன. இதில், செல்போன் இணைப்பு தங்களது பெயரில் இல்லை என்று 6 லட்சத்து 81 ஆயிரத்து 903 பேரும், 2 லட்சத்து 26 ஆயிரத்து 745 பேரும் இணைப்பு வேண்டாம் என்று துண்டித்துள்ளனர்.

தொலைந்து போன அல்லது திருடப்பட்ட செல்போன்களை பற்றி புகாரளிக்கவும், வாங்குவதற்கு முன் புதிய அல்லது பழைய செல்போன்களின் நம்பகத்தன்மையைச் சரிபார்க்கவும், சந்தேகிக்கப்படும் மோசடி அழைப்புகள் அல்லது செய்திகளைப் புகாரளிக்கவும் சஞ்சார் சாத்தி ஆப்பை பதிவிறக்கம் செய்யுமாறு பொதுமக்களுக்கு மத்திய தொலைதொடர்பு அமைச்சகம் வலியுறுத்தியுள்ளது.