உலகத்தலைவர்களில் நம்பர்-1 இடத்தை பிடித்த பிரதமர் மோடி..! டிரம்ப் எந்த இடம் தெரியுமா..?

உலக அளவில் நடத்தப்பட்ட சமீபத்திய கருத்துக் கணிப்பு முடிவுகளின்படி, இந்தியாவின் பிரதமர் நரேந்திர மோடி மீண்டும் உலகின் மிகவும் நம்பகமான தலைவராக உருவெடுத்துள்ளார். அமெரிக்காவைச் சேர்ந்த 'மார்னிங் கன்சல்ட்' (Morning Consult) என்ற முன்னணி வணிக நுண்ணறிவு நிறுவனம் வெளியிட்ட இந்த அறிக்கையில், பிரதமர் மோடி 75% ஒப்புதல் மதிப்பைப் பெற்று முதலிடத்தைப் பிடித்துள்ளார். இது அவரது தொடர்ச்சியான மக்கள் செல்வாக்கையும், உலகளாவிய அங்கீகாரத்தையும் பறைசாற்றுகிறது.

ஜூலை 4 முதல் 10, 2025 வரையிலான தரவுகளின் அடிப்படையில் இந்த ஆய்வு மேற்கொள்ளப்பட்டுள்ளது. பல்வேறு நாடுகளில் உள்ள வயதுவந்தோரிடம் நடத்தப்பட்ட இந்தக் கருத்துக் கணிப்பில், சுமார் நான்கில் மூன்று பங்கு மக்கள் பிரதமர் மோடியின் தலைமைத்துவத்திற்கு நேர்மறையான பார்வையை வெளிப்படுத்தியுள்ளனர். வெறும் 18% பேர் மட்டுமே அவரது தலைமையுடன் உடன்படவில்லை என்றும், 7% பேர் கருத்து தெரிவிக்கவில்லை என்றும் இந்த அறிக்கை சுட்டிக்காட்டுகிறது.

இது பிரதமர் மோடி உலகின் மிகவும் நம்பகமான தலைவராக முதலிடம் பெறுவது இது முதல் முறையல்ல. உண்மையில், அவர் செப்டம்பர் 2021 ஆம் ஆண்டு முதல் இந்த பட்டியலில் தொடர்ந்து முதலிடத்தில் இருந்து வருகிறார். அப்போது அவரது ஒப்புதல் மதிப்பீடு 70% ஆக இருந்தது.

2022 ஆம் ஆண்டின் தொடக்கத்தில் இது 71% ஆக உயர்ந்தது. பின்னர் 2023 ஆம் ஆண்டில் பலமுறை 76% ஐ எட்டி தனது மக்கள் செல்வாக்கை உறுதிப்படுத்தினார். பிப்ரவரி 2024 இல், அவரது ஒப்புதல் இதுவரை இல்லாத அளவுக்கு 78% ஐ தொட்டு புதிய உச்சத்தை அடைந்தது. இது பிரதமர் மோடியின் மீது மக்கள் வைத்திருக்கும் அசைக்க முடியாத நம்பிக்கையையும், அவரது தலைமைக்கு உலக அளவில் கிடைக்கும் தொடர்ச்சியான அங்கீகாரத்தையும் தெளிவாகக் காட்டுகிறது.

இந்த பட்டியலில் தென்கொரிய அதிபர் லீ ஜே மியுங் 59% ஒப்புதலுடன் இரண்டாவது இடத்தைப் பிடித்துள்ளார். அவருக்கு அடுத்தபடியாக அர்ஜென்டினா அதிபர் ஜேவியர் மிலேய் 57% ஒப்புதலுடன் மூன்றாவது இடத்திலும், கனடாவின் புதிய பிரதமர் மார்க் கார்னி 56% ஒப்புதலுடன் நான்காவது இடத்திலும் உள்ளனர்.

அமெரிக்க அதிபர் டொனால்ட் ட்ரம்ப் இந்த பட்டியலில் எட்டாவது இடத்தில் உள்ளார். அவரது ஒப்புதல் மதிப்பு 44% ஆக உள்ளது. இந்த சமீபத்திய தரவுகள், இந்தியாவிற்குள் மட்டுமல்லாமல் உலக அரங்கிலும் பிரதமர் மோடியின் தலைமைக்குள்ள வலுவான ஆதரவை உறுதிப்படுத்துகின்றன. இந்தியாவின் வெளியுறவுக் கொள்கைகள் மற்றும் உள்நாட்டு வளர்ச்சி திட்டங்கள் உலக நாடுகளின் கவனத்தை ஈர்த்து, நம்பிக்கையைப் பெற்றுள்ளன என்பதற்கு இந்த ஆய்வு ஒரு சான்றாக அமைந்துள்ளது.