மெரினாவில் இனி பாதுகாப்பான உறக்கம்: புத்தாண்டுக்குள் திறக்கப்படும் மாநகராட்சி காப்பகம்..!

மெரினா கடற்கரை பொதுமக்களின் மிக முக்கியமான பொழுதுபோக்கு இடமாக விளங்குவதால், நாள்தோறும் லட்சக்கணக்கான மக்கள் அங்கு வந்து செல்கின்றனர். மெரினாவை உலகத் தரத்திற்கு உயர்த்தவும், பொதுமக்கள் அனைவரும் முறையாகப் பயன்படுத்தவும் ஏதுவாக மேம்பாட்டுப் பணிகளைச் சென்னை மாநகராட்சி தற்போது தீவிரப்படுத்தியுள்ளது.

சாலைகளில் பிச்சை எடுப்பவர்கள், ஆதரவற்ற முதியவர்கள் மற்றும் வீடற்றவர்கள் இரவு நேரங்களில் மெரினா மணற்பரப்பின் ஒதுக்குப்புறங்களில் தங்குவது ஒரு வாடிக்கையான நிகழ்வாக உள்ளது. இவ்வாறு திறந்தவெளியில் தங்குவது அவர்களுக்குப் பாதுகாப்பற்ற சூழலை உருவாக்குவதுடன், குறிப்பாகப் பெண்களுக்குப் பல்வேறு அச்சுறுத்தல்களை ஏற்படுத்தி வந்தது.

இந்தச் சிக்கலுக்குத் தீர்வுகாணும் வகையில், மெரினாவில் தங்குவோருக்காகத் தனி இரவு நேரக் காப்பகம் ஒன்றை அமைக்கச் சென்னை மாநகராட்சி திட்டமிட்டது. அதன்படி, அண்ணா சதுக்கம் அருகே உள்ள காலி இடத்தில் 2,400 சதுர அடி பரப்பளவில், ரூ.86 லட்சத்து 20 ஆயிரம் மதிப்பீட்டில் ஒரு நவீனக் காப்பகத்தைப் மாநகராட்சி கட்டியுள்ளது.

தற்போது இந்தக் காப்பகத்தைச் சுற்றியுள்ள சுற்றுச்சுவர் கட்டும் பணிகள் விறுவிறுப்பாக நடைபெற்று வருகின்றன. இந்தப் பணிகள் அனைத்தும் விரைந்து முடிக்கப்பட்டு, நடப்பு ஆண்டின் இறுதிக்குள்ளேயே காப்பகத்தைப் பொதுமக்களின் பயன்பாட்டிற்குத் திறக்க மாநகராட்சி நிர்வாகம் முடிவு செய்துள்ளது.

புதிதாகக் கட்டப்பட்டுள்ள இந்தக் காப்பகத்தில் ஒரே நேரத்தில் சுமார் 80 பேர் வரை தங்க முடியும். தங்குபவர்களுக்குத் தேவையான பாய், தலையணை மற்றும் போர்வை உள்ளிட்ட அடிப்படைப் பொருட்கள் வழங்கப்படுவதுடன், நவீனக் கழிவறை மற்றும் சுகாதார வசதிகளும் இங்கு ஏற்படுத்தப்பட்டுள்ளன.

அண்ணா சதுக்கம் பேருந்து நிலையத்திற்குப் பின்புறம் அமைந்துள்ள இந்தக் காப்பகம், தனியார் தொண்டு நிறுவனங்கள் மூலம் பராமரிக்கப்பட உள்ளது. மேலும், இங்கு தங்குபவர்களுக்கு 'அம்மா உணவகம்' மூலம் இரவு நேர உணவு வழங்கவும் திட்டமிடப்பட்டுள்ளதால், மெரினாவை வாழ்விடமாகக் கொண்ட ஆதரவற்ற மக்கள் மகிழ்ச்சி அடைந்துள்ளனர்.