ரயில் பயணிகளுக்கு குட் நியூஸ்! இனி ஏசி அல்லாத பெட்டிகளிலும் படுக்கை விரிப்புகள்..!

தெற்கு ரயில்வேயின் சென்னை பிரிவு, ஸ்லீப்பர் கிளாஸ் பயணிகளுக்கான சேவைகளை மேம்படுத்தும் எண்ணத்துடன் ஒரு புதிய அறிவிப்பை அறிவித்துள்ளது. அதன்படி 2026 ஜனவரி 1 முதல் ஸ்லீப்பர் கிளாஸ் பயணிகளுக்கு படுக்கை விரிப்புகளை வழங்கும் வசதியை அறிமுகப்படுத்துகிறது. ரயில் பயணிகளின் வசதியை கருத்தில் கொண்டு ரயில்வே நிர்வாகம் சமீப காலமாக பல அதிரடிகளை செய்து வருகிறது. அவற்றில் ஒன்றுதான் இந்த ஸ்லீப்பர் கிளாஸில் பயணிகளுக்கு படுக்கை விரிப்புகள் என்பது.

பயணிகள் ஏசி அல்லாத ஸ்லீப்பர் பெட்டிகளில் ஆன்லைனில் டிக்கெட் முன்பதிவு செய்யும் பொழுதே தங்களுக்கு படுக்கை விரிப்பு வசதி வேண்டுமென்றால் அதனை தேர்வு செய்து கொள்ளலாம் அல்லது ரயிலில் பயணம் செய்யும்போது உரிய கட்டணம் செலுத்தி படுக்கை விரிப்புகளை பெற்றுக் கொள்ளலாம். படுக்கை விரிப்பு மற்றும் தலையணைக்கு 50 ரூபாய் கட்டணமும், தலையணைக்கு மட்டும் 30 ரூபாய் கட்டணமும், படுக்கை விரிப்பு மட்டும் வேண்டும் என்றால் 20 ரூபாய் கட்டணம் செலுத்த வேண்டும். இதன் மூலம் தெற்கு ரயில்வேக்கு ஆண்டுக்கு 28.27 லட்ச ரூபாய் வருவாய் கிடைக்கும் என சொல்லப்படுகிறது. இந்த வசதி முதல் கட்டமாக 10 ரயில்களில் கொண்டு வரப்பட உள்ளது.

கட்டண விவரம்:

• படுக்கை விரிப்பு (பெட் ஷீட்) மற்றும் தலையணை: ₹50

• தலையணை மட்டும்: ₹30

• படுக்கை விரிப்பு மட்டும்: ₹20

பொதுவாக ரயில்வேயை பொறுத்தவரை ஏசி பெட்டிகளில் பயணிப்பவர்களுக்கு இரவில் தூங்குவதற்கு வசதியாக வெள்ளை படுக்கை விரிப்புகள், போர்வைகள், தலையணைகள், கம்பளி போன்றவற்றை வழங்குவது வழக்கம். ஏசி பெட்டிகளில் பயணிப்பவர்கள் பெரும்பாலும் நீண்ட தூரம் பயணிப்பவர்களாக இருப்பார்கள். எனவே அவர்கள் தூங்குவதற்கு வசதியாக இவையெல்லாம் வழங்கப்படுகின்றன.

ஆனால் வெள்ளை நிற படுக்கை பெட்ஷீட்கள் கறை படிந்து விடுவதால் அவற்றை எவ்வளவு சுத்தப்படுத்தினாலும் கறைகள் போவதில்லை. அதனால் பயணிகள் அதனை மீண்டும் பயன்படுத்துவதற்கு தயங்குகிறார்கள். அத்துடன் அவற்றைப் பார்த்தாலே மருத்துவமனை நினைவு வந்துவிடுதாகவும் கருத்து நிலவுகிறது. இதனால் ஏசி பெட்டிகளில் பயணிப்பவர்களுக்கு வெள்ளை படுக்கை விரிப்புகளுக்கு பதிலாக பருத்தி துணியால் செய்யப்பட்ட டிசைனிங் போர்வைகள் வழங்க முடிவாகியுள்ளது.

இதன் முதல் கட்டமாக ஜெய்ப்பூர்-அசர்வா சூப்பர்ஃபாஸ்ட் எக்ஸ்பிரஸ்ஸில் செல்லும் பயணிகளுக்கு பருத்தி துணி போர்வைகள் வழங்கும்படி உத்தரவிடப்பட்டிருந்தது.விரைவில் இந்த நடைமுறை மற்ற மாநிலங்களுக்கும் விரிவுபடுத்தப்பட உள்ளது.

முதற்கட்டமாக 10 ரயில்களில் படுக்கை விரிப்புகள் வழங்கும் வசதி செயல்படுத்தப்படும் என்று தெற்கு ரயில்வே அறிவித்துள்ளது. இந்த அறிவிப்பு ரயில் பயணிகளுக்குப் பெரும் மகிழ்ச்சியை அளித்துள்ளன. காரணம் பொதுவாக படுக்கை விரிப்புகள் ஏசி வகுப்புகளுக்கு மட்டுமே வழங்கப்பட்டு வந்தது. இப்போது ஸ்லீப்பர் வகுப்பிற்கும் இந்த வசதி வந்துள்ளதால் நீண்ட தூரம் பயணம் செய்யும் பயணிகளுக்கு இது மிகவும் வசதியாக இருக்கும் என்பதால் பெரும் வரவேற்பை பெற்றுள்ளது.

ஜனவரி 1 முதல், ஏசி அல்லாத ஸ்லீப்பர் வகுப்புப் பயணிகள் கட்டண அடிப்படையில், கிருமி நீக்கம் செய்யப்பட்ட படுக்கை விரிப்புகளைப் அதற்கென நிர்ணயிக்கப்பட்ட கட்டணத்தை செலுத்தி பெற்றுக்கொள்ளலாம் என்பது மகிழ்ச்சியான செய்தி தானே!