SIR கால அவகாசம் நீட்டிப்பு – களப்பணியாளர்களுக்கு மகிழ்ச்சி செய்தி..!!

தமிழக சட்டமன்றத் தேர்தல் அடுத்த ஆண்டு ஏப்ரல் அல்லது மே மாதங்களில் நடைபெற வாய்ப்புள்ள நிலையில், வாக்காளர் பட்டியலைச் செம்மைப்படுத்தும் சிறப்புத் தீவிர திருத்தப் பணிகள் (Special Intensive Revision - SIR) தமிழகத்தில் முழுவீச்சில் நடைபெற்று வந்தன.

தேர்தல் ஆணையத்தின் இந்த எஸ்.ஐ.ஆர். நடைமுறை புதியதல்ல. சமீபத்தில் பீகார் சட்டமன்றத் தேர்தலின்போதும் இந்தத் திட்டம் செயல்படுத்தப்பட்டது. 

அப்போது பல தரப்பினரின் கடுமையான எதிர்ப்புகள் எழுந்தபோதும், திருத்தப் பணிகள் சிறப்பாகச் செயல்படுத்தப்பட்டு, தேர்தல் நிறைவுற்றது. 

இதன் தொடர்ச்சியாகவே, நாடு முழுவதும் இந்த வாக்காளர் சிறப்புத் தீவிர திருத்தப் பணிகள் மேற்கொள்ளப்படும் என்று தேர்தல் ஆணையம் அறிவித்தது.

தமிழகத்தில் நவம்பர் மாத தொடக்கத்தில் இருந்து வாக்கு மைய நிலை அலுவலர்கள் (BLO) வீடு வீடாகச் சென்று விண்ணப்பப் படிவங்களை விநியோகம் செய்து, பூர்த்தி செய்யப்பட்ட படிவங்களைத் திரும்பப் பெறும் பணியைத் தீவிரமாக மேற்கொண்டனர்.

இந்த விண்ணப்பங்களைப் பூர்த்தி செய்து திரும்ப ஒப்படைக்க முதலில் டிசம்பர் 4 வரை மட்டுமே கால அவகாசம் வழங்கப்பட்டிருந்தது. 

ஆனால், இவ்வளவு குறுகிய காலத்திற்குள் இவ்வளவு பெரிய பணியைச் செய்து முடிப்பது என்பது களத்தில் பெரும் சவால்களை ஏற்படுத்தும் என்று தமிழக அரசு மற்றும் கேரள அரசு தரப்பில் எதிர்ப்பு தெரிவிக்கப்பட்டது.

குறிப்பாக, இந்தப் பணிகளுக்காக நியமிக்கப்பட்ட ஊழியர்கள், கடுமையான காலக்கெடு நெருக்கடி, வேலைப்பளு மற்றும் மன அழுத்தம் போன்ற காரணங்களால் தற்கொலை செய்துகொண்ட துயரச் சம்பவங்களும் நடந்து அதிர்ச்சியை ஏற்படுத்தியது. 

மேலும், 'டிட்வா புயல்' மற்றும் கனமழை போன்ற இயற்கைச் சீற்றங்களால் பல இடங்களில் படிவங்களைச் சேகரிக்கும் பணி பாதிக்கப்பட்டது. எனவே, கால அவகாசம் நீட்டிக்கப்பட வேண்டும் என்று கோரிக்கைகள் வலுத்தன.

இந்தச் சூழல்களைக் கருத்தில் கொண்ட தேர்தல் ஆணையம், இறுதிக் கால அவகாசம் டிசம்பர் 4-ஆம் தேதியுடன் முடிவடைய இருந்த நிலையில், அதை ஒரு வார காலத்திற்கு நீட்டித்து அறிவிப்பு வெளியிட்டுள்ளது.

புதிய அறிவிப்பின்படி, பூர்த்தி செய்யப்பட்ட வாக்காளர் சிறப்புத் திருத்தப் படிவங்களை ஒப்படைக்க டிசம்பர் 11 வரை அவகாசம் நீட்டிக்கப்பட்டுள்ளது.

இதற்குப் பிந்தையப் பணிகளுக்கான தேதிகளும் அறிவிக்கப்பட்டுள்ளன:

வரைவு வாக்காளர் பட்டியல் வெளியீடு: டிசம்பர் 16.

ஆட்சேபனை தெரிவிக்கக் கால அவகாசம்: டிசம்பர் 16 முதல் ஜனவரி 16 வரை.

இறுதி வாக்காளர் பட்டியல் வெளியீடு: பிப்ரவரி 14.

தமிழகம் மற்றும் கேரளாவின் கோரிக்கைகளையும், பணியில் ஈடுபட்ட ஊழியர்கள் எதிர்கொண்ட நெருக்கடியான சூழலையும் கருத்தில் கொண்டு தேர்தல் ஆணையம் வெளியிட்ட இந்த நீட்டிப்பு அறிவிப்பு, களப்பணியாளர்களுக்கு ஒரு நிம்மதியை அளித்துள்ளது.