இனி ஓடவும் முடியாது... ஒளியவும் முடியாது... டெல்லி போலீசாரின் கையில் 'AI' ஸ்மார்ட் கண்ணாடிகள்!

வருகிற 2026 குடியரசு தின விழாவை முன்னிட்டு, டெல்லி காவல்துறை முன் எப்போதும் இல்லாத வகையில் நவீன தொழில்நுட்பத்துடன் கூடிய பாதுகாப்பு ஏற்பாடுகளை செய்து வருகிறது. குறிப்பாக, கூட்ட நெரிசலில் குற்றவாளிகள் மற்றும் சந்தேக நபர்களை நிகழ்நேரத்தில் (Real-time) அடையாளம் காண, செயற்கை நுண்ணறிவு (AI) தொழில்நுட்பத்தில் இயங்கும் 'ஸ்மார்ட் கண்ணாடிகளை' போலீசார் பயன்படுத்த உள்ளனர்.

இந்தியா மீதான பல்வேறு வகையிலான அச்சுறுத்தல் எச்சரிக்கைகள் அதிகரித்து வரும் நிலையில் குடியரசு தினத்தை எவ்வித பாதிப்பும் இன்றி பாதுகாக்கும் பொருட்டு முன்னெச்சரிக்கை நடவடிக்கையாக முக அங்கீகாரம், மிகப்பெரிய சிசிடிவி பாதுகாப்பு மற்றும் 10,000 பணியாளர்களுடன் கூடிய AI-இயக்கப்பட்ட ஸ்மார்ட் கண்ணாடிகளை டெல்லி காவல்துறை களத்தில் செயல்படுத்த திட்டமிட்டுள்ளதாக தெரிகிறது.முக அங்கீகாரத் தொழில்நுட்பம் (FRS), ட்ரோன் கண்காணிப்பு மற்றும் அதிநவீன சிசிடிவி கேமராக்களுடன் கூடிய பல அடுக்கு பாதுகாப்பு வளையத்திற்குள் டெல்லி கொண்டு வரப்பட்டுள்ளது.

முகத்தில் அணியக்கூடிய இந்த சாதனங்கள் ஏற்கனவே அறியப்பட்ட குற்றவாளிகள், அறிவிக்கப்பட்ட குற்றவாளிகள் மற்றும் சந்தேக நபர்களின் உள்ளூர் காவல்துறையினரால் பராமரிக்கப்படும் நிகழ்நேர தரவுத்தளங்களுடன் இணைக்கப்படும், இதன் மூலம், களத்தில் உள்ள அதிகாரிகள் சந்தேகத்திற்கிடமான நபர்களை விரைவாக அடையாளம் கண்டு, தேவையான அளவு எச்சரிக்கைகளை உருவாக்க முடியும் என்று அதிகாரிகள் தெரிவித்துள்ளனர்.

அணிவகுப்புகள் நடைபெறும் கர்தவ்ய பாதையிலும் புது தில்லியிலும் அமைந்துள்ள குடியரசு தின விழாக்களின் ஒட்டுமொத்த பாதுகாப்பை மேம்படுத்துவதற்கான இந்த பல அடுக்கு அணுகுமுறையின் ஒரு பகுதியாக, 10000 க்கும் மேற்பட்ட காவல்துறை அதிகாரிகள் பணியில் ஈடுபடுத்தப்படுவார்கள் என்பது குறிப்பிடத்தக்கது.

"இந்தக் கண்ணாடிகள் நெரிசலான பகுதிகளில் முகங்களை ஸ்கேன் செய்து, மத்திய தரவுத்தளத்தில் சேமிக்கப்பட்ட பதிவுகளுடன் சில நொடிகளில் பொருத்த முடியும். ஒரு பொருத்தம் கண்டறியப்பட்டவுடன், இந்த அமைப்பு அணிந்திருப்பவரை எச்சரிக்கிறது, இது பொதுமக்களின் நடமாட்டத்திற்கு இடையூறு விளைவிக்காமல் உடனடி சரிபார்ப்பு மற்றும் நடவடிக்கையை அனுமதிக்க உதவுறது," என்று மூத்த காவல்துறை அதிகாரி ஒருவர் தெரிவித்துள்ளார்.

இந்த நவீன முயற்சி, சந்தேகத்திற்கிடமான நடத்தைகளை கண்டறியவும், கூட்டத்தை நிர்வகிக்கவும் பெரிதும் உதவும். காவல்துறையின் இந்த அதிரடி தொழில்நுட்பப் பயன்பாடு பொதுமக்களிடையே பெரும் வரவேற்பையும் பாராட்டையும் பெற்றுள்ளது.