பிரபலமாகிய பிரதமர் மோடி அணிந்திருந்த கேமோப்ளாஜ் டீ- ஷர்ட்!

முதுமலை சென்ற பிரதமர் நரேந்திர மோடி அணிந்திருந்த கேமோப்ளாஜ் டீ- ஷர்ட் தற்போது இணையத்தில் வைரலாகி பேசு பொருளாகியது. திருப்பூரில் தயாரிக்கப்பட்ட இந்த டி-சர்ட்டை மோடி அணிந்தது பெருமையாக உள்ளது என்று பெருமை கொள்கிறார் அதன் தயாரிப்பு நிறுவன உரிமையாளர்.

பொதுவாகவே பிரதமர் நரேந்திர மோடி அணியும் உடைகள் அவ்வப்போது சமூக வலைத்தளங்களில் பரபரப்பாக பேசப்பட்டு வருவதும் வழக்கம் தான் . அந்த வகையினில் இந்த கேமோப்ளாஜ் டீ- ஷர்ட் குறித்தும் பலவேறு செய்திகள் இணையத்தில் வைரலாகி வருகிறது. இந்த கேமோப்ளாஜ் டீ- ஷர்ட் எங்கு தயாரானது? அதன் விலை என்ன? என்பதைத் தெரிந்து கொள்ள பலரும் ஆர்வமாக உள்ளனர்.

தமிழகத்திற்கு வருகை தந்த பிரதமர் மோடி முதுமலைக்கு சென்று ஆஸ்கர் புகழ் பொம்மன்-பெள்ளி தம்பதியரை பார்க்கச் சென்றார். அப்போது அவர் அணிந்திருந்த கேமோப்ளாஜ் டி-சர்ட் அனைவரையும் கவர்ந்து சமூகவலைதளங்களில் பேசுபொருளாகவும் ஆனது. சூழலுக்கேற்ற நிறத்தில் தயாரிக்கப்படும் இந்த கேமோப்ளாஜ் டீ- ஷர்ட் திருப்பூரில் உற்பத்தி செய்யப்பட்டது என்ற தகவல் அனைவரையும் வியப்பில் ஆழ்த்தியுள்ளது.

திருப்பூரைத் தலைமையகமாக கொண்ட தனியார் ஆடை நிறுவனம் இந்த டீ-ஷர்ட்டினை வடிவமைத்தது. இதுதொடர்பாக பேசிய எஸ்.சி.எம் நிறுவனத்தின் நிர்வாக இயக்குனர் பரமசிவம், தங்கள் நிறுவனம் தயாரித்த ஆடையை பிரதமர் அணிந்தது தங்களுக்கு மிகுந்த பெருமை என்று கூறினார்.

பருத்தி இழைகள் கொண்டு இந்த டீ-சர்ட் தயாரிக்கப்பட்டதாகவும், மலையேற்றம், அட்வெஞ்சர் போன்றவற்றிற்கு மிகவும் ஏற்றது எனவும், வியர்வை உறிஞ்சும் தன்மை மற்றும் குளிர்தாங்கும் திறன் போன்றவை நிறைந்துள்ளதாகவும் தெரிவித்தார். இத்தனை அம்சங்கள் நிறைந்த பிரதமர் அணிந்திருந்த டீ-ஷர்டின் விலை 699 ரூபாய் மட்டுமே என்று தெரிவிக்கிறார் இதன் தயாரிப்பாளர்.