சூப்பர் அப்டேட்! இனி வாட்ஸ்அப்பில் சாட் செய்ய மொழி ஒரு தடையல்ல..!

உலகம் முழுவதும் உள்ள மூன்று பில்லியனுக்கும் அதிகமான பயனர்கள் மொழியைக் கடந்து எளிதாக உரையாட உதவுவதற்காக, வாட்ஸ்அப் ஒரு புதிய மெசேஜ் மொழிபெயர்ப்பு அம்சத்தை அறிமுகப்படுத்துகிறது. இந்த அம்சம் உலகம் முழுவதும் உள்ள பயனர்கள் பல மொழித்தவர்களிடமும் ஆழமான உறவை உருவாக்க உதவும் என நிறுவனம் நம்புகிறது.

ஆண்ட்ராய்டு மற்றும் ஐபோன் பயனர்களுக்கான இந்த வெளியீடு படிப்படியாக நடைபெறும். இந்த அம்சம் கிடைத்தவுடன் அதைப் பயன்படுத்த, பயனர்கள் தங்கள் போனை அப்டேட்டில் வைத்திருக்க வேண்டும்.

தினமும் பல மொழிகளில் வாட்ஸ்அப்பில் பேசும் பயனர்களுக்கு, இந்த மொழிபெயர்ப்பு வசதி மிகவும் உதவும். இது சாட்டிங்கில் நடக்கும் தவறான புரிதல்களைக் குறைத்து, உரையாடலைத் தெளிவாக மாற்றும்.

வாட்ஸ்அப், சாட்கள், குழுக்கள் மற்றும் சேனல்களுக்குள்ளேயே மொழிபெயர்ப்பு வசதியைக் கொண்டு வந்ததன் மூலம், உலகெங்கும் உள்ள அதன் பயனர்கள் அனைவராலும் எளிதாகப் பயன்படுத்த முடியும் என்பதை உறுதிப்படுத்தியுள்ளது.

மொழிபெயர்ப்பு கருவியைப் பயன்படுத்துவது மிகவும் எளிது: ஒரு மெசேஜை நீண்ட நேரம் அழுத்தி (long-press) "Translate" என்பதைத் தட்ட வேண்டும். ஒருமுறை மொழிபெயர்ப்புக்கான மொழியைத் தேர்ந்தெடுத்து பதிவிறக்கம் செய்தால், மெசேஜ்களுக்கான மொழிபெயர்ப்பும் கிடைக்கும். இது பல மொழி உரையாடல்களை எளிதாக்கும். இந்த எளிமையான வடிவமைப்பு, தனியாக மொழிபெயர்ப்பு செயலிகளை பயன்படுத்த வேண்டிய தேவையையோ அல்லது மெசேஜை காபி பேஸ்ட் செய்ய வேண்டிய தேவையையோ நீக்கி, எளிதாக்குகிறது.

முதற்கட்டமாக, ஆண்ட்ராய்டு பயனர்கள் ஆறு மொழிகளில் மெசேஜ்களை மொழிபெயர்க்கலாம்: ஆங்கிலம், ஸ்பானிஷ், இந்தி, போர்த்துகீசியம், ரஷ்யன் மற்றும் அரபு. ஐபோன் பயனர்களுக்கு இந்த அம்சம் 19க்கும் மேற்பட்ட மொழிகளில் ஆதரவு அளிக்கிறது. இதன்மூலம், ஆப்பிள் தளத்தில் ஆரம்பத்தில் அதிக மொழிகள் கிடைக்கும்.

ஆண்ட்ராய்டு பயனர்களுக்கு முழு சாட் உரையாடலுக்கும் தானாகவே மொழிபெயர்க்கும் வசதி உள்ளது. இதை செயல்படுத்தும்போது, அந்த உரையாடலில் எதிர்காலத்தில் வரும் அனைத்து மெசேஜ்களும் தானாகவே மொழிபெயர்க்கப்படும். இது குழு சாட்கள் அல்லது தொழில்முறை விவாதங்களுக்கு மிகவும் பயனுள்ளதாக இருக்கும். இந்த தானியங்கி மொழிபெயர்ப்பு அம்சம் ஆண்ட்ராய்டில் மட்டுமே முதற்கட்டமாக அறிமுகப்படுத்தப்பட்டுள்ளது.

வாட்ஸ்அப் நிறுவனம் மொழிபெயர்க்கப்பட்ட உள்ளடக்கத்தைப் பார்க்கவோ அல்லது சேமிக்கவோ முடியாது. இந்த அணுகுமுறை வாட்ஸ்அப்பின் எண்ட்-டு-எண்ட் என்கிரிப்ஷன் கொள்கையுடன் ஒத்துப்போகிறது. கிளவுட் (இணைய சேமிப்பகம்) மூலம் தரவுகள் கையாளப்படுவதால் ஏற்படும் தனியுரிமை பற்றிய கவலை உள்ள பயனர்களுக்கு, இந்தச் சாதனத்திலேயே மொழிபெயர்ப்பு நடப்பது பெரும் நம்பிக்கையைத் தரும்.

இந்த அம்சம் படிப்படியாக வெளியிடப்படும், ஆரம்பத்தில் குறைந்த மொழிகளுடன் தொடங்கி காலப்போக்கில் விரிவுபடுத்தப்படும். இந்த அம்சம் அனைத்து பயனர்களுக்கும் எப்போது கிடைக்கும் என்று நிறுவனம் ஒரு குறிப்பிட்ட கால அட்டவணையை வெளியிடவில்லை.

வாட்ஸ்அப்பின் இந்த அப்டேட், மொழியியல் தடைகளைக் குறைத்து இணைப்புகளை மேம்படுத்தும் மெசேஜிங் தளங்களின் பெரிய முயற்சியின் ஒரு பகுதியாகும். பயனர்களின் விமர்சனங்களைத் தொடர்ந்து, எதிர்காலத்தில் இந்த மொழிபெயர்ப்பு வசதியில் மேலும் புதிய மாற்றங்கள் மற்றும் கூடுதல் மொழிகள் சேர்க்கப்படலாம்.