டொனால்ட் ட்ரம்ப் கணக்கை முடக்கியதற்கு ரூ.217 கோடி நஷ்டஈடு வழங்கும் யூடியூப்..!

அமெரிக்க அதிபர் டொனால்ட் ட்ரம்ப், யூடியூப் நிறுவனத்தின் மீது போட்டிருந்த ஒரு வழக்கை முடிவுக்குக் கொண்டு வர, அந்த நிறுவனம் அவருக்கு $24.5 மில்லியன் (இந்திய மதிப்பில் ரூ.217 கோடி) பணம் கொடுக்க ஒப்புக்கொண்டுள்ளது.

2021-ல் ஜனவரி 6 அன்று அமெரிக்க கேபிடல் (நாடாளுமன்ற கட்டிடம்) மீது ட்ரம்ப்பின் ஆதரவாளர்கள் தாக்குதல் நடத்தினர். அதற்குப் பிறகு, யூடியூப் அவரது கணக்கை தற்காலிகமாக நிறுத்தி வைத்தது.

இதேபோல், ஃபேஸ்புக் மற்றும் X (முன்பு ட்விட்டர்) போன்ற நிறுவனங்களும் ட்ரம்ப்பின் கணக்குகளை நிறுத்தி வைத்திருந்தன. அந்த நிறுவனங்களும் ஏற்கனவே ட்ரம்ப்புக்கு இழப்பீடு கொடுத்து வழக்கை முடித்துவிட்டன.

ட்ரம்ப், இந்தத் தொழில்நுட்ப நிறுவனங்கள் மீது, தாங்கள் அரசியல் சாய்வுடன் செயல்படுவதாகவும், பழமைவாதக் கருத்துக்களைத் தணிக்கை செய்வதாகவும் குற்றம் சாட்டினார். வன்முறையைத் தூண்டலாம் என்ற காரணத்திற்காகவே கணக்குகள் நிறுத்தப்பட்டதாக அந்நிறுவனங்கள் அப்போது கூறின.

யூடியூப் கொடுக்க ஒப்புக்கொண்ட $24.5 மில்லியன் பணத்தில், முக்கியமாக இரண்டு பிரிவுகள் உள்ளன:

$22 மில்லியன் தொகை, "ட்ரஸ்ட் ஃபார் தி நேஷனல் மால்" என்ற தொண்டு நிறுவனத்திற்குச் செல்லும். இந்த நிறுவனம், வெள்ளை மாளிகையில் ஒரு புதிய பெரிய பால்ரூம் (Ballroom) கட்டுவதற்காக $200 மில்லியன் திரட்டி வருகிறது. மீதமுள்ள $2.5 மில்லியன் பணம், அமெரிக்கன் கன்சர்வேடிவ் யூனியன் உட்பட ட்ரம்ப் வழக்கில் இணைந்த மற்ற நபர்களுக்கும், அமைப்புகளுக்கும் பிரித்துக் கொடுக்கப்படும்.

ட்ரம்ப்புடன் சமரசம் செய்துகொண்ட கடைசி பெரிய நிறுவனம் யூடியூப் ஆகும். ஜனவரியில் ஃபேஸ்புக்கின் தாய் நிறுவனமான மெட்டா, ட்ரம்ப்பின் வழக்கைத் தீர்க்க $25 மில்லியன் கொடுத்தது. அதில் $22 மில்லியன் ட்ரம்ப்பின் அதிபர் நூலகத்திற்காக ஒதுக்கப்பட்டது.

பிப்ரவரியில் எலோன் மஸ்க்கிற்குச் சொந்தமான X நிறுவனம் (முன்பு ட்விட்டர்), ட்ரம்ப்புக்கு $10 மில்லியன் கொடுத்ததாகத் தெரிவிக்கப்பட்டது.

இப்போது, ட்ரம்ப்பின் அனைத்து சமூக ஊடகக் கணக்குகளும் திரும்பக் கொடுக்கப்பட்டுவிட்டன.

சமீப காலமாக, பெரிய தொழில்நுட்ப நிறுவனங்கள் ட்ரம்புடன் இணங்கிப் போகும் போக்கைக் காட்டுகின்றன. ஆல்ஃபபெட், மெட்டா, மற்றும் X நிறுவனங்களின் உயர் அதிகாரிகள் அனைவரும் ட்ரம்ப்பின் பதவியேற்பு விழாவில் முக்கிய இடத்தில் அமர்ந்திருந்தனர். இது, குடியரசுக் கட்சிக்கும் தொழில்நுட்பத் துறைக்கும் இடையில் உறவு மாறியிருப்பதைக் காட்டுகிறது. மேலும், இந்தக் குழுமங்கள் தங்கள் தளங்களில் உள்ளடக்கங்களை நீக்கும் தணிக்கை விதிகளைத் தளர்த்தியுள்ளன.

உதாரணமாக, கோவிட் மற்றும் 2020 தேர்தல் குறித்து தவறான தகவல்களைப் பரப்பியதற்காகத் தடை செய்யப்பட்ட பல கணக்குகளை மீண்டும் கொண்டு வரப்போவதாக யூடியூப் கூறியுள்ளது. இந்த முடிவை, யூடியூப் நாடாளுமன்றக் குழுவிடம் விளக்கும்போது, "யூடியூப் அதன் தளத்தின் உள்ளடக்கங்களை மதிக்கிறது, மேலும் அவர்கள் மக்களின் பொது விவாதத்தில் ஒரு முக்கியமான பங்கை வகிக்கிறார்கள் என்பதை உணர்கிறது" என்று கூறியுள்ளது.