வக்கீலாக மாறிய ChatGPT… செயற்கை நுண்ணறிவால் மீட்கப்பட்ட 2 லட்சம்!

செயற்கை நுண்ணறிவு (AI) தொழில்நுட்பத்தின் வளர்ச்சி இன்றைய காலகட்டத்தில் விஸ்வரூபம் எடுத்துள்ளது. மனிதர்களின் அன்றாடப் பணிகளை எளிதாக்குவது முதல், சிக்கலான சவால்களுக்குத் தீர்வு காண்பது வரை இதன் பங்களிப்பு அதிகம். அத்தகைய ஒரு நவீன தொழில்நுட்பமான ChatGPT, சமீபத்தில் ஒருவருக்கு சட்டரீதியான உதவியை வழங்கி, அவர் இழக்கவிருந்த பெருந்தொகையை மீட்டுக் கொடுக்க உதவியுள்ளது.

ஒரு தனிநபர், தென்னமெரிக்க நாடான கொலம்பியாவிற்குப் பயணம் மேற்கொள்ள அனைத்து ஏற்பாடுகளையும் செய்திருந்தார். விமானப் பயணச் சீட்டுகள் மற்றும் தங்குமிடத்திற்கான முன்பதிவுகள் செய்யப்பட்டிருந்த நிலையில், திடீரென ஏற்பட்ட மனநலன் சார்ந்த மருத்துவ அவசரநிலை (Generalised Anxiety Disorder - GAD) காரணமாக, மருத்துவரின் அறிவுறுத்தலின் பேரில் அவர் தனது பயணத்தை முழுவதுமாக ரத்து செய்ய வேண்டிய கட்டாயம் ஏற்பட்டது.

இதற்கான உரிய மருத்துவச் சான்றிதழையும் அவர் சமர்ப்பித்தார். ஆயினும், விமான நிறுவனம் மற்றும் அவர் முன்பதிவு செய்திருந்த ஹோட்டல் நிர்வாகம், தங்களது "No-Cancellation Policy” காரணம் காட்டி, சுமார் இரண்டு லட்சம் ரூபாய் மதிப்பிலான முன்பணத்தைத் திருப்பித் தரமுடியாது என திட்டவட்டமாக மறுத்துவிட்டன.

இந்த இக்கட்டான சூழ்நிலையில், வழக்கறிஞரை அணுகி செலவு செய்வதற்குப் பதிலாக, அந்த நபர் நூதனமாக சாட்ஜிபிடியின் உதவியை நாடினார். தனது நிலை, மருத்துவச் சான்றிதழ், மற்றும் சம்பந்தப்பட்ட நிறுவனங்களின் கொள்கை விதிகள் ஆகியவற்றை சாட்ஜிபிடிக்கு உள்ளீடாக வழங்கினார். அதனைப் பகுப்பாய்வு செய்த சாட்ஜிபிடி, ஒரு முறையான மற்றும் தாக்கத்தை ஏற்படுத்தக்கூடிய கோரிக்கை கடிதத்தை அவருக்காக வரைவு செய்து கொடுத்தது. அந்தக் கடிதத்தை ஹோட்டல் நிர்வாகத்திற்கு அனுப்பியதன் விளைவாக, அவர்கள் பணத்தைத் திரும்ப அளிக்கச் சம்மதித்தனர்.

ஆனால், விமான நிறுவனம் தங்களது கடுமையான கொள்கையை மேற்கோள் காட்டி, மரணம் அல்லது மிகத் தீவிரமான உடல்நலக் குறைபாடு ஏற்பட்டால் மட்டுமே பணத்தைத் திரும்பப் பெற இயலும் எனக் கூறி, அவரது கோரிக்கையை நிராகரித்தது. மனம் தளராத அவர், விமான நிறுவனத்தின் பதிலை மீண்டும் சாட்ஜிபிடியிடம் சமர்ப்பித்து, இன்னும் வலுவான வாதங்களுடன் ஒரு பதில் கடிதத்தை உருவாக்கக் கேட்டுக்கொண்டார். 

இம்முறை சாட்ஜிபிடி, விமான நிறுவனத்தின் கொள்கைகளில் உள்ள ஓட்டைகளையும், மனநலப் பிரச்சினைகளைப் புறக்கணிப்பது எவ்வாறு ஒரு வகையான பாரபட்சமான அணுகுமுறை ஆகக்கூடும் என்பதையும் நுட்பமாகச் சுட்டிக்காட்டி, மிக ஆணித்தரமான ஒரு கடிதத்தை வடிவமைத்தது. ஆச்சரியப்படும் விதமாக, இந்தக் கடிதம் அனுப்பப்பட்ட ஒரு மணி நேரத்திற்குள், விமான நிறுவனம் தனது முந்தைய முடிவை மாற்றிக்கொண்டு, முழுப் பணத்தையும் உடனடியாகத் திருப்பி அளிப்பதாக உறுதியளித்தது.

சாட்ஜிபிடி-4.0 என்னும் அந்த மேம்பட்ட செயற்கை நுண்ணறிவு அமைப்பின் உதவியால், அந்த நபர் தனக்கு ஏற்படவிருந்த பெரும் நிதி இழப்பிலிருந்து மீண்டார். இனிவரும் காலங்களில், இது போன்ற AI கருவிகள் பல்வேறு துறைகளில் மனிதர்களுக்குப் பேருதவியாக இருக்கும் என்பதில் ஐயமில்லை.