மனைவியின் காயமும் ஒரு கணவனின் காதலும்: ‘பேண்ட்-எய்ட்’ பிறந்த சுவாரசியக் கதை!

அன்றாட வாழ்வில் நமக்கு ஏற்படும் சிறிய வெட்டுக் காயங்கள் மற்றும் கீறல்களுக்கு நாம் உடனே தேடுவது ‘பேண்ட்-எய்ட்’ (Band-Aid) எனப்படும் ஒட்டும் பாண்டேஜைத்தான். இன்று உலகெங்கும் உள்ள முதலுதவிப் பெட்டிகளில் தவிர்க்க முடியாத ஒரு அங்கமாக இருக்கும் இந்த எளிய, மருத்துவக் கண்டுபிடிப்பை உருவாக்கியவர் ஏர்ல் டிக்சன் (Earle Dickson) ஆவார். 1920 ஆம் ஆண்டில் அமெரிக்காவில் உருவான இந்த கண்டுபிடிப்பு, மருத்துவத்துறையில் சாமானியர்களுக்கான ஒரு புரட்சியாக அமைந்தது.

கண்டுபிடிப்பின் பின்னணி: ஒரு கணவனின் அன்பு: ஏர்ல் டிக்சன் அமெரிக்காவின் நியூ ஜெர்சி மாகாணத்தில் வசித்து வந்தார். அவர் உலகப் புகழ்பெற்ற ஜான்சன் & ஜான்சன் நிறுவனத்தில் பருத்தி வாங்கும் மேலாளராகப் பணிபுரிந்து வந்தார்.

ஜோசபின் டிக்சனின் துயரமும் பேண்ட்-எய்ட் வரலாறு தொடக்கமும்;

அவருடைய மனைவி ஜோசபின் டிக்சன் (Josephine Dickson) ஒரு இல்லத்தரசி. அவருக்குச் சமையல் செய்யும்போதும், வீட்டு வேலைகளைச் செய்யும்போதும் கத்தரிக்கோல் அல்லது கத்தியால் கைகளில் அடிக்கடி சிறிய காயங்கள் ஏற்படுவது வழக்கமாக இருந்தது. அக்காலத்தில் சிறிய காயங்களுக்குப் போடுவதற்குத் தனியாக ஒட்டும் பாண்டேஜ்கள் இல்லை.

ஒரு பெரிய துணியைச் சுருட்டி, அதை ஒரு நூல் அல்லது பெரிய டேப் கொண்டுதான் கட்ட வேண்டியிருந்தது. கணவர் வீட்டில் இல்லாத நேரத்தில், ஜோசபின் தனியாகத் தன் கைகளில் பாண்டேஜ் கட்டிக்கொள்ள மிகவும் சிரமப்பட்டார்.

சிந்தனையும் புதிய உருவாக்கமும்: தன் மனைவியின் துயரத்தைக் கண்ட ஏர்ல் டிக்சன், அவராகவே எளிதாக, யாருடைய உதவியும் இன்றி காயத்திற்குப் போட்டுக் கொள்ளும் வகையில் ஒரு புதிய வழியை யோசித்தார்.

வடிவமைப்பு: அவர் ஜான்சன் & ஜான்சன் நிறுவனத்தின் தயாரிப்புகளான அறுவை சிகிச்சைக்குப் பயன்படுத்தும் ஒட்டும் நாடா (Adhesive Tape) மற்றும் ஒரு சிறிய பருத்தித் துணி (Gauze) ஆகிய இரண்டையும் எடுத்துக்கொண்டார்.

நீண்ட ஒட்டும் நாடாவின் நடுவே, சிறிய இடைவெளிகளில் பருத்தித் துணிகளை ஒட்டினார். அந்த நாடாக்கள் ஒன்றோடு ஒன்று ஒட்டிக்கொள்ளாமல் இருக்கவும், காயம் இல்லாத பகுதி சுத்தமாக இருக்கவும் அதன் மேல் ‘க்ரினோலின்’ (Crinoline) என்ற துணி போன்ற பாதுகாப்பு அடுக்கை ஒட்டி வைத்தார். பின்னர் அவரது மனைவிக்குக் காயம் ஏற்படும் போதெல்லாம், அந்த நீண்ட நாடாவிலிருந்து தேவையான அளவு பகுதியை மட்டும் கத்தரித்து, பாதுகாப்பு அடுக்கை நீக்கிவிட்டு எளிதாகக் காயத்தில் ஒட்டிக்கொண்டார். இதுவே உலகின் முதல் பேண்ட்-எய்ட் ஆகும்.

உலகை வென்ற வணிகமும் இன்று உலகளாவிய பேண்ட்-எய்ட் வரலாறு சாதனையும்;

வணிகரீதியான வெற்றி: தன் வீட்டில் பயன்படுத்திய இந்த எளிய முறையை ஏர்ல் டிக்சன் தான் வேலை செய்த ஜான்சன் & ஜான்சன் நிறுவனத்தின் மேலாளர்களிடம் காண்பித்தார். நிறுவனத்தின் தலைவரான ஜேம்ஸ் வுட் ஜான்சன் (James Wood Johnson) இந்த யோசனையைப் பாராட்டி, இதனைப் பெருமளவில் உற்பத்தி செய்ய முடிவு செய்தார். 1921 ஆம் ஆண்டில், இந்தத் தயாரிப்பு “Band-Aid” என்ற பெயரில் சந்தைக்கு வந்தது. ஆரம்பத்தில் சாரணர் இயக்கக் குழந்தைகளுக்கு (Boy Scouts) இலவசமாக இதை வழங்கி விழிப்புணர்வை ஏற்படுத்திய பின், இதன் விற்பனை உலகளவில் பல மடங்கு அதிகரித்தது.

அங்கீகாரமும் சிறப்பும்: இந்த மகத்தான கண்டுபிடிப்பின் மூலம் ஜான்சன் & ஜான்சன் நிறுவனம் உலகப் புகழ் பெற்றது. ஏர்ல் டிக்சனின் திறமையைப் பாராட்டி, நிறுவனம் அவருக்குப் பதவி உயர்வு அளித்து, பின்னாளில் அவரை நிறுவனத்தின் துணைத் தலைவராக (Vice President) மாற்றியது.

ஏர்ல் டிக்சன் 1961 ஆம் ஆண்டு மறைந்தார். அவரது கண்டுபிடிப்பைப் போற்றும் வகையில், 2006 ஆம் ஆண்டில் அமெரிக்காவின் “தேசிய கண்டுபிடிப்பாளர்கள் புகழரங்கில்” (National Inventors Hall of Fame) அவரது பெயர் சேர்க்கப்பட்டது.ச

தன் மனைவியின் மீது கொண்ட அன்பினாலும், அக்கறையினாலும் ஏர்ல் டிக்சன் உருவாக்கிய ஒரு சிறிய யோசனை, இன்று நூறு ஆண்டுகளைக் கடந்தும் உலகம் முழுவதும் கோடிக்கணக்கான மக்களின் காயங்களை குணப்படுத்தி வருகிறது. அவசரக் கால முதலுதவியில் பேண்ட்-எய்ட் என்பது மனிதகுலத்திற்கு கிடைத்த மிக உன்னதமான கொடையாகும்.

அன்றாட வாழ்வில் ஏற்படும் திடீர் சிறு விபத்துக்களை யாருடைய உதவியுமின்றி நொடியில் கையாள்வதோடு, அவசரக் காலங்களில் பதற்றமின்றி சுய முதலுதவி செய்துகொள்ளும் தன்னம்பிக்கையையும், மன அமைதியையும் பெறமுடியும்.