பெர்முடா முக்கோணத்தின் மர்மம் முடிவுக்கு வந்தது? பூமிக்கு அடியில் சிக்கிய பிரம்மாண்டம்!

"பெர்முடா" என்ற வார்த்தையைக் கேட்டாலே நம் நினைவுக்கு வருவது மாயமாக மறைந்த கப்பல்களும், விமானங்களும்தான். அட்லாண்டிக் பெருங்கடலின் ஒரு குறிப்பிட்ட பகுதியில் நடக்கும் இந்த விசித்திர நிகழ்வுகளைப் பற்றிப் பல ஆண்டுகளாகப் பேசிக்கொண்டிருக்கிறோம். 

ஆனால், அந்த அமானுஷ்யக் கதைகளை எல்லாம் ஓரம் கட்டிவிட்டு, இப்போது ஒரு புதிய அறிவியல் கண்டுபிடிப்பு உலகைத் திரும்பிப் பார்க்க வைத்துள்ளது. பெர்முடா தீவு இத்தனை ஆண்டுகளாகக் கடலில் மூழ்காமல் இருப்பதற்கான புவியியல் காரணத்தை விஞ்ஞானிகள் தற்போது கண்டறிந்துள்ளனர். பூமிக்கு அடியில், யாரும் எதிர்பாராத ஆழத்தில் ஒரு பிரம்மாண்டமான பாறை அமைப்பு இருப்பதை உறுதி செய்திருக்கிறார்கள்.

தீவு மூழ்காமல் இருப்பது ஏன்?

பொதுவாக, கடலுக்கு நடுவே இருக்கும் எரிமலைத் தீவுகள் காலப்போக்கில் குளிர்ந்து, அரிப்பு ஏற்பட்டுச் சுருங்கி, இறுதியில் கடல் மட்டத்திற்கு கீழே சென்றுவிடும். ஆனால், பெர்முடா தீவு மட்டும் பல கோடி ஆண்டுகளாகத் திமிருடன் தலைநிமிர்ந்து கடலுக்கு மேலே நின்று கொண்டிருக்கிறது. "இது எப்படிச் சாத்தியம்?" என்ற கேள்விக்கு விடை தேடியபோதுதான், பூமித்தாயின் வயிற்றுக்குள் இருக்கும் ஒரு ரகசியம் வெளிவந்தது.

பெர்முடா தீவுக்கு நேர் கீழே, பூமியின் மேலோட்டிற்கும் ஆழமான பகுதிக்கும் இடையே, ஒரு வித்தியாசமான பாறை அடுக்கு இருப்பதை ஆய்வாளர்கள் கண்டறிந்துள்ளனர். இது சாதாரணப் பாறை அல்ல; படிகங்களால் ஆன, இதுவரை வேறெங்கும் காணப்படாத ஒரு தனித்துவமான பாறை. இது சுமார் 20 கிலோமீட்டர் தடிமன் கொண்டது என்றால் பார்த்துக் கொள்ளுங்கள். இந்தப் பாறைதான் ஒரு 'தூண்' போலச் செயல்பட்டு, பெர்முடா தீவை மேலே தாங்கிப் பிடித்துக் கொண்டிருக்கிறது.

எப்படிக் கண்டுபிடித்தார்கள்?

பூமிக்கு அடியில் யாரும் குழி தோண்டிப் போய்ப் பார்க்க முடியாது. அதனால், மருத்துவர்கள் எப்படி உடலை ஸ்கேன் செய்வார்களோ, அதேபோல விஞ்ஞானிகள் 'நிலநடுக்க அலைகளை' (Seismic Waves) வைத்துப் பூமியை ஸ்கேன் செய்தார்கள். பூமியின் ஒரு பகுதியில் நிலநடுக்கம் ஏற்படும்போது, அந்த அதிர்வலைகள் பூமிக்கு உள்ளே ஊடுருவிச் செல்லும். பாறையின் அடர்த்தியைப் பொறுத்து அந்த அலைகளின் வேகம் மாறும். பெர்முடாவுக்கு அடியில் அந்த அலைகள் வித்தியாசமாகப் பயணம் செய்ததை வைத்துத்தான், அங்கே ஒரு "சூப்பர் பாறை" இருப்பதை உறுதி செய்தார்கள்.

இந்தக் கண்டுபிடிப்புக்கும், விமானங்கள் காணாமல் போவதற்கும், பேய்க் கதைகளுக்கும் எந்தச் சம்பந்தமும் இல்லை என்று விஞ்ஞானிகள் திட்டவட்டமாகக் கூறிவிட்டார்கள். இது முழுக்க முழுக்க பூமியின் உருவாக்கம் மற்றும் பாறைகளின் தன்மையைப் பற்றிய புவியியல் ஆய்வு மட்டுமே. காந்தப்புல மாற்றம் பற்றியோ அல்லது வேற்றுகிரகவாசிகள் பற்றியோ இந்த ஆய்வு எதுவும் சொல்லவில்லை.

பெர்முடா முக்கோணத்தின் மர்ம முடிச்சுகள் அவிழ்ந்ததோ இல்லையோ, பூமியின் கட்டமைப்பு பற்றிய ஒரு புதிய அத்தியாயம் திறக்கப்பட்டுள்ளது. எரிமலைக் குழம்புகளிலிருந்து உருவான இந்தப் பாறை அமைப்பு, கண்டங்கள் எப்படி உருவானது என்பதைப் புரிந்துகொள்ள நமக்கு உதவும்.