வாட்ஸ்அப்பில் மெசேஜை தப்பா அழிச்சிட்டீங்களா? பதறாதீங்க... அதைத் திரும்பக் கொண்டுவர ஒரு மேஜிக் இருக்கு!

காலையில் கண் விழித்ததும் நாம் முதலில் தேடுவது பல் துலக்கும் பிரஷ்ஷை அல்ல, தலையணைக்கு அடியில் இருக்கும் போனைத்தான். அதிலும் குறிப்பாக 'வாட்ஸ்அப்'பைத் தான் முதலில் திறக்கிறோம். உலகம் முழுவதும் கோடிக்கணக்கான மக்கள் பயன்படுத்தும் இந்தச் செயலியை, நாம் வெறும் குட் மார்னிங் மெசேஜ் அனுப்பவும், ஸ்டேட்டஸ் வைக்கவும் மட்டும்தான் பயன்படுத்துகிறோம். 

ஆனால், வாட்ஸ்அப் ஒரு சாதாரண ஆப் இல்லை; அது ஒரு தொழில்நுட்பச் சுரங்கம். 97 சதவீத மக்களுக்குத் தெரியாத, நம் வேலையை எளிதாக்கும் பல ரகசிய வசதிகள் அதில் ஒளிந்து கிடக்கின்றன. அவற்றை ஒவ்வொன்றாகத் தோண்டி எடுப்போம் வாருங்கள்.

1. ஏஐ (AI) எனும் புதிய நண்பன்! இனிமேல் கூகுளில் சென்று தேட வேண்டிய அவசியமே இல்லை. வாட்ஸ்அப்பிற்குள்ளேயே 'மெட்டா ஏஐ' (Meta AI) வந்துவிட்டது. நீங்கள் சாட் செய்யும் இடத்திலேயே, அதனிடம் கேள்விகள் கேட்கலாம், சந்தேகங்களைத் தீர்க்கலாம். ஏன், "எனக்கு ஒரு கவிதை எழுது", "ஒரு படம் வரைந்து கொடு" என்று கேட்டால் கூட, அடுத்த நொடியில் அது செய்து கொடுக்கும். இது ஒரு டிஜிட்டல் உதவியாளன் போலச் செயல்படும்.

2. ஒரே போன்... இரண்டு நம்பர்! முன்பெல்லாம் இரண்டு சிம் கார்டு வைத்திருப்பவர்கள், இரண்டு வாட்ஸ்அப் பயன்படுத்த 'பேராலல் ஸ்பேஸ்' (Parallel Space) போன்ற ஆப்களைத் தேடுவார்கள். இனி அந்தத் தலைவலியே வேண்டாம். ஒரே வாட்ஸ்அப் செயலியில், ஃபேஸ்புக் போலவே இரண்டு அக்கவுண்ட்களை லாகின் செய்து, தேவைப்படும்போது மாற்றிக்கொள்ளும் வசதி வந்துவிட்டது.

3. எச்டி (HD) குவாலிட்டி போட்டோஸ்! வாட்ஸ்அப்பில் போட்டோ அனுப்பினால் பிக்சல் உடைந்து தெளிவாக இல்லை என்று புலம்புவோம். இனி கவலை வேண்டாம். போட்டோ அனுப்பும்போதே மேலே 'HD' என்றொரு பட்டன் இருக்கும். அதைத் தட்டிவிட்டால், போட்டோ மற்றும் வீடியோ அசல் தரத்தில், கண்ணாடி போலத் துல்லியமாகச் சென்று சேரும்.

4. 'டிலீட் ஃபார் மீ' ! குரூப்பில் அனுப்பிய மெசேஜை 'Delete for Everyone' கொடுப்பதற்குப் பதில், பதற்றத்தில் தவறுதலாக 'Delete for Me' கொடுத்துவிடுவோம். "ஐயோ! எனக்கு மட்டும் அழிஞ்சுடுச்சே, மத்தவங்களுக்குத் தெரியுமே" என்று பதறுவோம். அந்தப் பதற்றத்தைத் தவிர்க்க, மெசேஜை அழித்த அடுத்த 5 விநாடிகளுக்குள் 'Undo' பட்டன் வரும். அதை அழுத்தினால், அழித்த மெசேஜ் மீண்டும் வந்துவிடும். அப்புறம் நிதானமாக அனைவருக்கும் அழிக்கலாம்.

5. ரகசியமான குரல் பதிவுகள்! போட்டோக்களுக்கு மட்டும் இருந்த 'View Once' வசதி இப்போது வாய்ஸ் மெசேஜுக்கும் வந்துவிட்டது. நீங்கள் அனுப்பும் ரகசியக் குரல் பதிவை, எதிரில் இருப்பவர் ஒரே ஒருமுறை மட்டுமே கேட்க முடியும். அதன் பிறகு அது தானாகவே அழிந்துவிடும். பாதுகாப்புக்கு இது செம கேரண்டி.

6. Pin செய்யும் வசதி! குரூப் சாட்டிங்கில் முக்கியமான தகவல் மேலே போய்விடும். அதைத் தேடிக் கண்டுபிடிக்க நேரம் ஆகும். இனிமேல் முக்கியமான மெசேஜை நீண்ட நேரம் அழுத்திப் பிடித்து 'Pin' செய்துவிட்டால், அது எப்போதும் சேட்டின் மேலேயே இருக்கும். யாரும் தேட வேண்டியதில்லை.

7. அவதார் மற்றும் ஸ்டிக்கர்! இனிமேல் மற்றவர்கள் அனுப்பும் ஸ்டிக்கருக்காகக் காத்திருக்க வேண்டாம். ஏஐ உதவியுடன் நீங்களே உங்களுக்குப் பிடித்த ஸ்டிக்கர்களை உருவாக்கலாம். அதேபோல, உங்கள் முகத்தைப் போலவே ஒரு கார்ட்டூன் அவதாரையும் உருவாக்கி, அதை DP ஆகவோ அல்லது ஸ்டிக்கராகவோ பயன்படுத்தலாம்.

வாட்ஸ்அப் பழைய முறையிலேயே பயன்படுத்தாமல், இந்தப் புதிய வசதிகளை இன்றே முயற்சித்துப் பாருங்கள். ஸ்மார்ட் போன் வைத்திருந்தால் மட்டும் போதாது, நாமும் ஸ்மார்ட்டாக இருக்க வேண்டும்!