பிரிந்த இதயங்களை இணைக்கும் புத்தாண்டு - உலக குடும்ப தினம்!

ஒவ்வொரு ஆண்டும் ஜனவரி முதல் தேதியை நாம் புத்தாண்டு தினமாகக் கொண்டாடுகிறோம். பழைய கசப்புகளை மறந்து, புதிய நம்பிக்கைகளுடன் வாழ்க்கையைத் தொடங்கும் ஒரு தினமாக இது பார்க்கப்படுகிறது. ஆனால், காலண்டர் மாறும் இந்தத் தருணம் வெறும் கொண்டாட்டத்திற்கானதாக மட்டும் இல்லாமல், உலகளாவிய அமைதி மற்றும் ஒற்றுமைக்கான ஒரு வாய்ப்பாகவும் இருப்பதை 'உலக குடும்ப தினம்' (Global Family Day) நமக்கு உணர்த்துகிறது.

புத்தாண்டு: நம்பிக்கையின் திருவிழா:

புத்தாண்டு என்பது ஒரு காலச்சுழற்சியின் முடிவு மற்றும் ஒரு புதிய பயணத்தின் தொடக்கம். உலகெங்கிலும் உள்ள மக்கள் பட்டாசுகள், வண்ண விளக்குகள் மற்றும் இனிப்புகளுடன் இதனை வரவேற்கின்றனர். தனிப்பட்ட ரீதியில் நாம் பல புதிய தீர்மானங்களை (New Year Resolutions) எடுக்கிறோம். ஆரோக்கியம், கல்வி, தொழில் என நம்மை மேம்படுத்திக்கொள்ள திட்டமிடுகிறோம். ஆனால், இந்தத் தனிப்பட்ட முன்னேற்றங்களைத் தாண்டி, சமூகமாகவும், உலகமாகவும் நாம் எப்படி முன்னேற வேண்டும் என்பதற்கான விடையே உலக குடும்ப தினம்.

உலக குடும்ப தினத்தின் வரலாறு:

உலக குடும்ப தினம் உருவான வரலாறு மிகவும் சுவாரசியமானது. 1996-இல் ஸ்டீவ் டயமண்ட் மற்றும் ராபர்ட் ஆலன் சில்வர்ஸ்டீன் ஆகியோர் எழுதிய 'One Day in Peace - January 1, 2000' என்ற குழந்தைகள் புத்தகம் இந்த மாற்றத்திற்கு வித்திட்டது. 2000 millenium ஆண்டின் முதல் நாளை அமைதி தினமாகக் கொண்டாட வேண்டும் என்ற அந்தப் புத்தகத்தின் கருத்து பெரும் வரவேற்பைப் பெற்றது.

இதன் தொடர்ச்சியாக, 1997-ஆம் ஆண்டு ஐக்கிய நாடுகளின் பொதுச் சபை, புத்தாண்டின் முதல் நாளை உலக அமைதிக்கான தினமாக அறிவிக்க முடிவெடுத்தது. சமூக ஆர்வலர் லிண்டா குரோவர் அவர்களின் விடாமுயற்சியால், 2001-ஆம் ஆண்டு முதல் ஐக்கிய நாடுகள் சபையின் ஆதரவுடன் இது 'உலக குடும்ப தினம்' என்று உலகெங்கும் அதிகாரப்பூர்வமாகக் கடைபிடிக்கப்பட்டு வருகிறது.

அமைதியும் பகிர்தலும்: அடிப்படைத் தேவைகள்

புத்தாண்டின் முதல் நாளில் நாம் எதைச் செய்கிறோமோ அதுவே ஆண்டு முழுவதும் தொடரும் என்பது ஒரு நம்பிக்கை. அந்த வகையில், முதல் நாளை அமைதியுடனும், பிறருக்கு உதவும் குணத்துடனும் தொடங்குவது சிறப்பானது.

உலகமே ஒரு குடும்பம்: நம் நாடு, மொழி, இனம் ஆகியவற்றைக் கடந்து நாம் அனைவரும் இந்தப் பூமியின் குடிமக்கள் என்பதை உணர வேண்டும். கணியன் பூங்குன்றனாரின் "யாதும் ஊரே யாவரும் கேளிர்" இதைத் தான் வலியுறுத்துகின்றது. போர்களும், வன்முறைகளும் இல்லாத ஒரு உலகத்தைப் படைக்க, தனிமனிதர்களாகிய நாம் முதலில் நம் குடும்பத்தில் அமைதியைப் பேண வேண்டும்.

புத்தாண்டில் நாம் செய்ய வேண்டியவை

குடும்ப நேரம்: தொழில்நுட்பச் சாதனங்களைத் தள்ளி வைத்துவிட்டு, குடும்ப உறுப்பினர்களுடன் தரமான நேரத்தைச் செலவிட வேண்டும். இது உறவுகளுக்கிடையிலான பிணைப்பை வலுப்படுத்தும்.

பகிர்ந்து கொள்ளுதல்: 'அமைதி மற்றும் பகிர்தல்' என்பதே இந்த நாளின் மையக்கருத்து. தேவையுள்ளவர்களுக்கு உணவு அல்லது ஆடைகளை வழங்குவதன் மூலம் சமூகத்தின் மீதான நம் அக்கறையை வெளிப்படுத்தலாம்.

மன்னிப்பு: கடந்த கால மனக்கசப்புகளை மறந்து, பிறரை மன்னிப்பதன் மூலம் நம் மனதிற்கு அமைதியைத் தேடலாம்.

ஒரே குடும்பம்:

புத்தாண்டு என்பது வெறும் கொண்டாட்டங்கள் அடங்கிய ஒரு விடுமுறை நாள் மட்டுமல்ல, அது மனிதாபிமானத்தை வளர்க்கும் ஒரு புனிதமான நாள். ஜனவரி 1-ஆம் தேதியை உலக குடும்ப தினமாகக் கொண்டாடுவதன் மூலம், "நாமெல்லாம் ஒரே குடும்பம்" என்ற உணர்வு மேலோங்குகிறது. நம் குடும்பத்தில் தொடங்கும் அன்பு, மெல்ல மெல்ல உலகம் முழுவதும் பரவி, ஒரு புதிய விடியலை உருவாக்கட்டும்.