'சிரிப்பு, இதன் சிறப்பை சீர்தூக்கிப் பார்ப்பதே நமது பொறுப்பு...'

சிரிப்பு, இதன் சிறப்பை சீர்தூக்கிப் பார்ப்பதே

நமது பொறுப்பு

துன்ப வாழ்விலும் இன்பம் காணும்

விந்தை புரிவது சிரிப்பு - இதைத்

துணையாய்க் கொள்ளும் மக்கள் மனதில்

துலங்கிடும் தனி செழிப்பு!

ஒவ்வொரு ஆண்டும் ஜனவரி 10-ம் தேதி ‘உலக சிரிப்பு தினம்’ (World Laughter Day) கொண்டாடப்படுகிறது. சிரிப்பு என்பது வெறும் உணர்ச்சியின் வெளிப்பாடு மட்டுமல்ல, அது உடல் மற்றும் மன ஆரோக்கியத்திற்கான ஒரு மிகச்சிறந்த இயற்கை மருந்து.

சிரிப்பு (Laughter) தினத்தின் பின்னணி:

ஒரு இந்திய டாக்டரின் முன்னெடுப்பு உலக சிரிப்பு தினத்தைத் தொடங்கி வைத்தவர் இந்தியாவைச் சேர்ந்த டாக்டர் மதன் கடாரியா ஆவார். மும்பையைச் சேர்ந்த இவர், 1998-ஆம் ஆண்டு ஜனவரி 1௦-ம் தேதி முதல் உலக சிரிப்பு தினத்தைக் கொண்டாடினார். டாக்டர் மதன் கடாரியாதான் உலகப்புகழ் பெற்ற "சிரிப்பு யோகா" (Laughter Yoga) இயக்கத்தைத் தோற்றுவித்தவர்.

சிரிப்பு என்பது தன்னிச்சையாக வராவிட்டாலும், அதை ஒரு பயிற்சியாகச் செய்வதன் மூலம் ஆரோக்கியம் பெறலாம் என்பது இவருடைய கொள்கை. ‘உலகமே ஒரு குடும்பம்’ என்ற தத்துவத்தின் அடிப்படையில் மக்கள் அனைவரும் சிரிப்பால் இணைய வேண்டும் என்பதே இவரது நோக்கம்.

சிரிப்பால் விளையும் உடல்நல நன்மைகள்

நாம் சிரிக்கும் போது நமது உடலில் பல்வேறு ஆரோக்கியமான வேதி மாற்றங்கள் நிகழ்கின்றன. அவை,

மகிழ்ச்சி ஹார்மோன்கள்: சிரிக்கும்போது மூளையில் ‘எண்டோர்பின்கள்’ சுரக்கின்றன. இவை இயற்கையாகவே மன அழுத்தத்தைக் குறைத்து, உற்சாகத்தைத் தருகின்றன.

இதய ஆரோக்கியம்: வாய்விட்டுச் சிரிக்கும்போது ரத்த ஓட்டம் சீராகிறது. இது ரத்த அழுத்தத்தைக் குறைப்பதோடு, இதயத் தசைகளை வலுப்படுத்துகிறது.

நோய் எதிர்ப்பு சக்தி: ஆழ்ந்த சிரிப்பு உடலில் உள்ள செல்களை தூண்டி, நோய் எதிர்ப்பு மண்டலத்தை வலுப்படுத்துகிறது. இதனால் அடிக்கடி சளி, காய்ச்சல் போன்ற தொற்றுகள் ஏற்படுவது குறைகிறது.

மன அழுத்தத்திற்கு முற்றுப்புள்ளி: இன்றைய சூழலில் மன அழுத்தம் என்பது ஒரு பெரும் சுமையாக உருவெடுத்துள்ளது. சிரிக்கும்போது மன அழுத்தத்தை உண்டாக்கும் 'கார்டிசோல்' ஹார்மோனின் அளவு கணிசமாகக் குறைகிறது. ஒருமுறை நன்றாகச் சிரிப்பது, பல மணிநேரம் தியானம் செய்வதற்கு சமமான அமைதியை மனதிற்குத் தரும். இது எதிர்மறை எண்ணங்களை நீக்கி, நேர்மறையான கண்ணோட்டத்தை வளர்க்கிறது.

சிறந்த உடற்பயிற்சி: உடல் எடையைக் குறைக்க விரும்புபவர்களுக்குச் சிரிப்பு ஒரு எளிய பயிற்சி. நாம் வாய்விட்டுச் சிரிக்கும்போது, நமது முகத்தசைகள் மட்டுமல்லாமல் வயிறு மற்றும் உதரவிதானம் ஆகியவையும் வேலை செய்கின்றன. ஒரு நிமிடம் நன்றாகச் சிரிப்பது, 10 நிமிடங்கள் உடற்பயிற்சி இயந்திரத்தில் வேலை செய்வதற்குச் சமமான பலனைத் தரும் என்று ஆய்வுகள் கூறுகின்றன.

சமூக உறவுகளின் இணைப்புப் பாலம்: புன்னகையும், சிரிப்பும் மனித உறவுகளை மேம்படுத்தும் வலிமையான கருவிகள். கோபத்தில் இருப்பவர்களைக் கூட ஒரு சிறு புன்னகை சாந்தப்படுத்திவிடும். பணிபுரியும் இடங்களிலும், குடும்பங்களிலும் சிரித்த முகத்துடன் இருப்பது வேலைப்பளுவை குறைப்பதோடு, மற்றவர்களுடன் இணக்கமாகச் செயல்பட உதவும்.

நாம் என்ன செய்யலாம்?

இந்த உலக சிரிப்பு தினத்தில் நாம் சில எளிய மாற்றங்களைச் செய்யலாம். காலையில் எழுந்தவுடன் கண்ணாடி முன் நின்று ஒரு முறை புன்னகைக்கலாம். நண்பர்கள் மற்றும் உறவினர்களுடன் பழைய நகைச்சுவை நினைவுகளைப் பகிர்ந்து கொள்ளலாம். தினமும் 10 நிமிடம் நகைச்சுவை நிகழ்ச்சிகள் பார்க்கலாம். முடிந்தால் 'சிரிப்பு கிளப்களில்' இணைந்து பயிற்சி செய்யலாம்.

சிரிப்பு என்பது கட்டணமில்லாத மருந்து. அது அனைவருக்கும் பொதுவான மொழி. பிரச்சனைகளைக் கண்டு அஞ்சுவதை விட, அவற்றைச் சிரித்த முகத்துடன் எதிர்கொள்ளப் பழகுவோம். ஜனவரி 10-ம் தேதி மட்டுமல்லாமல், வருடம் முழுவதும் ஒவ்வொரு நாளையும் சிரிப்புடன் தொடங்குவோம்.