15 புள்ளிகள்... சில நொடிகள்! வாள்வீச்சு ஆட்டத்தில் வெற்றி தீர்மானிக்கப்படுவது எப்படி?

வாள் என்றாலே போர் வீரர்களும், அரண்மனைகளும், வீரதீரக் கதைகளும்தான் நம் நினைவுக்கு வரும். ஆனால், அதே வாள்வீச்சு இன்று ஒலிம்பிக் போட்டிகளில் இடம்பெறும் ஒரு நவீன விளையாட்டாகத் திகழ்கிறது. எதிராளியைத் தாக்குவதும், அவரது தாக்குதலைத் தடுப்பதும், கண நேரத்தில் முடிவெடுப்பதும் இவ்விளையாட்டின் சிறப்பம்சங்கள். வாள்வீச்சில் புள்ளிகள் எவ்வாறு வழங்கப்படுகின்றன என்பதைத் தெரிந்துகொள்வோம்.

வாள்வீச்சு விதிகள்: வாள்வீச்சு (Fencing) என்பது இரண்டு வீரர்கள் பாதுகாப்பு உடைகளையும் முகக்கவசங்களையும் அணிந்து கொண்டு, குறிப்பிட்ட விதிகளின்படி வாள்களால் எதிராளியைத் தொட்டு புள்ளிகள் பெறும் விளையாட்டு. நவீன ஒலிம்பிக் போட்டிகளின் தொடக்க காலமான 1896 ஏதென்ஸ் ஒலிம்பிக் முதலே இவ்விளையாட்டு இடம்பெற்று வருகிறது.

மூன்று வகை வாள்கள்!

வாள்வீச்சில் ஃபாயில் (Foil), எப்பி (Épée), சாபர் (Sabre) என மூன்று வகைகள் உள்ளன. ஒவ்வொரு வகைக்கும் தனித்தனி விதிகள் உண்டு.

ஃபாயில் போட்டியில் எதிராளியின் உடற்பகுதியைக் குறிவைத்து வாளின் நுனியால் தொடவேண்டும். எப்பி போட்டியில் தலை முதல் பாதம் வரை உடலின் எந்தப் பகுதியைத் தொட்டாலும் புள்ளி கிடைக்கலாம்.

சாபர் போட்டியில் இடுப்புக்கு மேலுள்ள குறிப்பிட்ட பகுதிகளில் வாளின் நுனியாலோ வெட்டும் விளிம்பாலோ தொடலாம். எனவே, எந்த வகைப் போட்டி நடைபெறுகிறது என்பதைப் பொறுத்தே புள்ளிகள் வழங்கப்படும் முறை மாறுகிறது.

மின்னல் வேகத்தில் புள்ளிகள்!

போட்டி நடைபெறும் நீண்ட செவ்வகப் பாதையில் வீரர்கள் எதிரெதிரே நின்று ஆட்டத்தைத் தொடங்குவார்கள். எதிராளியின் வாளைத் தடுத்து, அவருக்குக் கிடைக்கும் வாய்ப்பைக் குறைத்து, சரியான தருணத்தில் தாக்குவது வெற்றிக்கு அவசியம். தாக்குதல், தற்காப்பு, எதிர்த்தாக்குதல் ஆகிய மூன்றிலும் வீரர்கள் தேர்ச்சி பெற்றிருக்க வேண்டும்.

ஃபாயில் மற்றும் சாபர் போட்டிகளில் யார் முதலில் தாக்குதலைத் தொடங்கினார், எதிராளியின் தாக்குதலைச் சரியாகத் தடுத்து உடனடியாக எதிர்த்தாக்குதல் செய்தாரா போன்ற அம்சங்கள் நடுவரின் முடிவில் முக்கியப் பங்கு வகிக்கின்றன. இதனைத் தாக்குதலுக்கான முன்னுரிமை (Right of Way) என்கிறார்கள்.

எப்பி போட்டியில் இத்தகைய முன்னுரிமை விதி கிடையாது; இருவரும் ஒரே நேரத்தில் செல்லுபடியாகும் வகையில் தொட்டால் இருவருக்கும் புள்ளிகள் கிடைக்கலாம்.

தொழில்நுட்பத்தின் பங்கு

வீரர்களின் உடையிலும் வாளிலும் பொருத்தப்பட்டுள்ள மின்னணு இணைப்புகள், செல்லுபடியாகும் தொடுதல்களைப் பதிவு செய்ய உதவுகின்றன.

இதனால் மிக வேகமாக நடைபெறும் தாக்குதல்களையும் நடுவர்கள் துல்லியமாகக் கண்காணிக்க முடிகிறது. எனினும், ஒளிரும் விளக்கு மட்டும் புள்ளியை உறுதிப்படுத்தாது; போட்டியின் விதிகளின்படி நடுவரும் முடிவெடுக்க வேண்டும்.

தனிநபர் போட்டிகளில் பொதுவாக 15 புள்ளிகளை முதலில் எட்டுபவர் வெற்றி பெறுவார். ஆட்ட நேரம் முடிந்தும் அந்த இலக்கை யாரும் எட்டவில்லை என்றால், அதிகப் புள்ளிகளைப் பெற்றவர் வெற்றி பெறுவார். அணிப் போட்டிகளில் ஒன்பது சுற்றுகள் நடைபெற்று, மொத்தம் 45 புள்ளிகளை முதலில் எட்டும் அணி வெற்றி பெறும் முறையும் உள்ளது.

வீரர்களுக்கு தேவைப்படும் திறன்கள்:

வாள் வீச்சில் வெற்றி பெறுவதற்கு வேகம் மட்டுமே போதாது.. கால்களைச் சரியாக நகர்த்துதல்,, உடலைச் சமநிலையில் வைத்திருத்தல், எதிராளியின் அசைவு களைக் கவனித்தல் ஆகியவை முக்கியம். வீரர்கள் தினமும் தொடர்ந்து பயிற்சி செய்து தங்களுடைய அனிச்சைச் செயல்களையும் எதிர்வினை வேகத்தையும் மேம்படுத்துகிறார்கள். எதிராளி எப்போது தாக்குவார் என்பதை முன்கூட்டியே கணித்து சரியான நேரத்தில் விலகுவதும் தற்காப்பு செய்வதும் வெற்றிக்கான உத்திகளாகும்.

மேலும் போட்டியின்போது மனதை ஒருமுகப்படுத்துவது அவசியம்..ஒரு புள்ளியை இழந்துவிட்டாலும் பதற்றம் அடையாமல் அடுத்த வாய்ப்பில் கவனம் செலுத்த வேண்டும். உடல் வலிமையுடன் மன உறுதியும் இணைந்தால்தான் கடினமான போட்டிகளிலும் சிறப்பாகச் செயல்பட முடியும்.

உலக அளவிலான போட்டிகளில் வீரர்களின் திறமையை மேம்படுத்துவதற்காக நவீன பயிற்சி முறைகளும் காணொளி ஆய்வுகளும் பயன்படுத்தப்படுகின்றன. எதிராளியின் முந்தைய ஆட்டங்களை ஆராய்வதன் மூலம் அவருடைய பலம், பலவீனம் ஆகியவற்றை அறிந்து அதற்கேற்ப உத்திகளை வகுக்கவும் முடியும்.

வாள்வீச்சு என்பது வெறும் வேகத்தின் விளையாட்டு மட்டுமல்ல; கவனம், கட்டுப்பாடு, உடல் சமநிலை, துல்லியம், எதிராளியின் அடுத்த நகர்வைக் கணிக்கும் திறன் ஆகியவற்றின் சங்கமமாகும். சில நொடிகளில் எடுக்கப்படும் சரியான முடிவு வெற்றியைத் தீர்மானிக்கிறது. பார்ப்பதற்கு எளிதாகத் தோன்றினாலும், ஒவ்வொரு புள்ளிக்குப் பின்னாலும் கடுமையான பயிற்சியும் திட்டமிடலும் உள்ளன. இதுவே வாள்வீச்சை விறுவிறுப்பான, அறிவுத்திறன் நிறைந்த விளையாட்டாக மாற்றுகிறது.