"நம்பிக்கைக்கு முன் தடைகள் இல்லை!" - ஆசிய பாரா போட்டியில் இந்திய வீரர்களின் பிரம்மாண்ட வெற்றி!

மாற்றுத்திறன் என்பது ஒருவரின் கனவுகளுக்கோ சாதனைகளுக்கோ தடையல்ல என்பதை உலகுக்கு நிரூபித்து வருகிறார்கள் இந்திய வீரர், வீராங்கனைகள். ஜப்பானில் நடைபெற்று வரும் 2026 ஆசிய பாரா விளையாட்டுப் போட்டிகளின் முதல் நாளிலேயே இந்தியா 11 பதக்கங்களை வென்று அசத்தியுள்ளது. இவர்களின் வெற்றிப் பயணமும் விடாமுயற்சியும் ஒவ்வொருவருக்கும் ஊக்கமளிக்கின்றன.

ஜப்பானின் ஐச்சி–நகோயா பகுதியில் நடைபெறும் ஐந்தாவது ஆசிய பாரா விளையாட்டுப் போட்டிகளில் பல்வேறு நாடுகளைச் சேர்ந்த மாற்றுத்திறனாளி விளையாட்டு வீரர்கள் பங்கேற்றுள்ளனர். அக்டோபர் 19 அன்று நடைபெற்ற முதல் நாள் போட்டிகளிலேயே இந்தியா நான்கு தங்கம், ஐந்து வெள்ளி, இரண்டு வெண்கலம் என மொத்தம் 11 பதக்கங்களைக் கைப்பற்றி பதக்கப் பட்டியலில் நான்காவது இடத்தைப் பிடித்தது.

துப்பாக்கிச் சுடுதல் போட்டியில் மோனா அகர்வால் தங்கப் பதக்கத்தை வென்றதுடன், போட்டி சாதனையையும் படைத்தார். இதே பிரிவில் இந்தியாவின் அவனி லேகாரா வெள்ளிப் பதக்கத்தைப் பெற்றார். ஒரே போட்டியில் இந்திய வீராங்கனைகள் தங்கம், வெள்ளி வென்றது நாட்டுக்குப் பெருமை சேர்த்தது.

தடகளத்தில் சௌம்யா பெண்களுக்கான 1500 மீட்டர் ஓட்டத்தில் தங்கம் வென்றார். இதே போட்டியில் பங்கேற்ற ராதா வெங்கடேஷ் வெள்ளிப் பதக்கத்தைப் பெற்றார். ஈட்டி எறிதலில் ரிங்கு தங்கம் வெல்ல, அஜீத் சிங் வெள்ளிப் பதக்கத்தைக் கைப்பற்றினார். தடகளத்தில் நிஷாத் குமாரும் தங்கம் வென்று இந்தியாவின் வெற்றிக்கு வலுசேர்த்தார்.

ஜூடோ போட்டியில் கோகிலா வெள்ளிப் பதக்கத்தையும், கபில் பர்மார் வெண்கலப் பதக்கத்தையும் வென்றனர். நீச்சல் போட்டியில் ரவி கார்த்திக் வெள்ளிப் பதக்கத்தைப் பெற்றார். இவ்வாறு வெவ்வேறு விளையாட்டுப் பிரிவுகளில் இந்திய வீரர்கள் தங்கள் திறமையை வெளிப்படுத்தியுள்ளனர்.

அக்டோபர் 20 அன்றும் இந்திய வீரர்களுக்குப் பல பதக்க வாய்ப்புகள் உள்ளன. தடகளம், நீச்சல், பளுதூக்குதல், துப்பாக்கிச் சுடுதல், மேசைப்பந்து உள்ளிட்ட பிரிவுகளில் பதக்கப் போட்டிகள் நடைபெறுகின்றன. வில்வித்தை, பேட்மிண்டன், சைக்கிளிங் உள்ளிட்ட போட்டிகளிலும் இந்திய வீரர்கள் பங்கேற்கின்றனர். இன்றைய போட்டிகளின் முடிவுகளும் இந்தியாவின் பதக்க எண்ணிக்கையை உயர்த்தக்கூடும்.

இந்திய வீரர்களின் இந்தச் சாதனைகளைப் பார்க்கும் போது அவர்களுக்குப் பின்னால் இருக்கும் கடின உழைப்பையும் தியாகங்களையும் நாம் நினைத்துப் பார்க்க வேண்டும்.

ஒவ்வொரு பதக்கத்திற்குப் பின்னாலும் பல ஆண்டுகாலப் பயிற்சி, உடல் வலி, மனப் போராட்டம், தோல்வி களிலிருந்து மீண்டு வரும் துணிவு எனப் பல அனுபவங்கள் அடங்கியுள்ளன.

குடும்பத்தினரின் ஆதரவும் பயிற்சியாளர்களின் வழிகாட்டுதலும் அவர்களின் வெற்றிப் பயணத்தில் முக்கிய பங்கு வகிக்கின்றன. பாரா விளையாட்டுப் போட்டிகள், மாற்றுத் திறனாளிகளின் திறமைகளை உலகிற்கு எடுத்துக் காட்டும் சிறந்த தளமாக விளங்குகின்றன. உடல் ரீதியான சவால்கள் இருந்தாலும் சரியான பயிற்சியும் வாய்ப்புகளும் கிடைத்தால் எத்தகைய உயரத்தையும் அடைய முடியும் என்பதை இந்த வீரர்கள் நிரூபிக்கின்றனர்.

விளையாட்டு என்பது பதக்கங்களை வெல்வதற்கான களம் மட்டும் அல்ல. தன்னம்பிக்கையை வளர்க்கவும், சமத்துவத்தை வலியுறுத்தவும், சமூகத்தில் மாற்றத்தை ஏற்படுத்தவும் உதவும் சக்தியாகும்.

இந்தியாவில் பாரா விளையாட்டுகளுக்கான விழிப்புணர்வு அதிகரிப்பதுடன் இளம் தலை முறையினரும் இத்தகைய போட்டிகளில் பங்கேற்க முன் வர வேண்டும். வெற்றி பெறுபவர்களை மட்டுமின்றி இறுதி வரை போராடும் ஒவ்வொரு வீரரையும் பாராட்டுவது அவசியம். அவர்களின் சாதனைகள், வாழ்க்கையில் எந்த சவால் வந்தாலும் நம்பிக்கையுடன் எதிர் கொள்ள வேண்டும் என்ற உயரிய செய்தியை நமக்கு உணர்த்துகின்றன.

பாரா விளையாட்டு வீரர்களின் வெற்றிக்குப் பின்னால் பல ஆண்டுகாலப் பயிற்சியும், குடும்பத்தினரின் ஆதரவும் பயிற்சியாளர்களின் வழிகாட்டுதலும் உள்ளன.

இவர்களுக்குத் தேவையான விளையாட்டு வசதிகள், நவீன உபகரணங்கள், நிதியுதவி ஆகியவை தொடர்ந்து கிடைக்கவேண்டும். பள்ளி, கல்லூரி நிலையிலேயே மாற்றுத் திறனாளிகளின் விளையாட்டுத் திறமைகளைக் கண்டறிந்து ஊக்குவித்தால் எதிர்காலத்தில் இன்னும் பல சர்வதேச சாதனையாளர்கள் உருவாகுவார்கள்.

வெற்றி என்பது உடல் வலிமையால் மட்டுமே கிடைப்பதல்ல; மனஉறுதி, தொடர் பயிற்சி, தன்னம்பிக்கை ஆகியவையும் அதற்கு அடிப்படையாகும். தடைகளைத்தாண்டி சாதிக்கும் இந்திய பாரா விளையாட்டு வீரர்களின் பயணம் இளைஞர்களுக்கு சிறந்த முன்னுதாரணம். அவர்களின் ஒவ்வொரு பதக்கமும் இந்தியாவின் பெருமையை உயர்த்துகிறது. மேலும் பல வெற்றிகளைக் குவித்து, மூவர்ணக் கொடியை உலக அரங்கில் உயர்த்திப் பிடிக்க இந்திய வீரர், வீராங்கனைகளுக்கு நம் வாழ்த்துகளைத் தெரிவிப்போம்!