IPL 2026: புதிதாக 5 முக்கிய விதிமுறைகளை அறிமுகப்படுத்தும் பிசிசிஐ?

இந்திய கிரிக்கெட் வர்ணனையாளரான ஆகாஷ் சோப்ரா, ஐபிஎல் போட்டிகளை இன்னும் சுவாரஸ்யமாக்க சில புதிய விதிகளைப் பரிந்துரைத்துள்ளார். ஐபிஎல் 2026-ஆம் ஆண்டு முதல் இந்த விதிகளை அமல்படுத்தலாம் என்று அவர் கூறுகிறார்.

1. அதிரடி வெற்றிக்கு போனஸ் புள்ளி:

அதிக ரன்கள் வித்தியாசத்தில் அல்லது குறைவான ஓவர்களில் இலக்கை எட்டினால், அந்த அணிக்கு ஒரு போனஸ் புள்ளி வழங்கலாம்.

உதாரணமாக: ஒரு அணி 200 ரன்கள் அடித்து, எதிரணியை 160 ரன்களுக்குள் கட்டுப்படுத்தினால், ஒரு போனஸ் புள்ளி கிடைக்கும். இதேபோல், 200 ரன்கள் இலக்கை 16 ஓவர்களுக்குள் எட்டினாலும் போனஸ் புள்ளி கிடைக்கும்.

இந்த முறை, நெட் ரன் ரேட்டைப் பார்க்காமல், ஒவ்வொரு போட்டியின் முடிவிலும் வெற்றி பெற்ற அணியை உற்சாகப்படுத்தும்.

2. காயம் அடைந்த வீரருக்கு மாற்று வீரர்:

காயம் காரணமாக வெளியேறும் வீரருக்குப் பதிலாக, அதே போன்ற திறமையுள்ள ஒரு மாற்று வீரரை களமிறக்க அனுமதிக்கலாம். இது வீரர்களின் பாதுகாப்பையும், போட்டியின் சமநிலையையும் உறுதி செய்யும். தற்போது இருக்கும் ‘கன்கசன் சப்ஸ்டிடியூட்’ (concussion substitute) விதியைப் போலவே இது செயல்படும்.

3. எளிமையான மிடில் சீசன் டிரான்ஸ்ஃபர்:

ஐபிஎல் சீசனின் நடுவில், ஒரு அணியில் விளையாட வாய்ப்பு கிடைக்காத வீரர்களை, தேவைப்படும் வேறு அணிகளுக்கு மாற்றிக்கொள்ளும் முறையை எளிமையாக்க வேண்டும். ஒவ்வொரு அணியும் தங்கள் அணியில் பயன்படுத்தப்படாத மூன்று வீரர்களை மாற்றுவதற்காக பரிந்துரைக்கலாம். இதனால், திறமையான வீரர்கள் ஒரு சீசன் முழுவதும் பெஞ்சில் அமர்ந்திருக்காமல் விளையாட முடியும்.

4. லெக் சைடு வைட் விதி:

லெக் சைடில் பந்து சற்று விலகிச் சென்றாலும் 'வைட்' என்று அறிவிப்பது அடிக்கடி நடக்கிறது. இதை மாற்ற, ஆடுகளத்தில் சில கோடுகளைப் போட்டு, அந்த கோடுகளைத் தாண்டி பந்து சென்றால் மட்டுமே 'வைட்' என அறிவிக்கலாம். இது பந்துவீச்சாளர்களுக்கு நியாயமானதாக இருக்கும்.

5. பிக் பேஷ் லீக் ‘பவர் சர்ஜ்’ விதி:

ஆஸ்திரேலியாவில் நடக்கும் பிக் பேஷ் லீக் போட்டிகளில் உள்ளதுபோல், பேட்டிங் செய்யும் அணி 10 ஓவர்களுக்குப் பிறகு, தங்களுக்குத் தேவைப்படும்போது இரண்டு ஓவர்கள் பவர் பிளே எடுக்க அனுமதிக்கலாம். இது பேட்டிங் உத்திக்கு மேலும் சுவாரஸ்யத்தைக் கொடுக்கும்.

இந்த மாற்றங்கள் ஐபிஎல் போட்டிகளை இன்னும் பரபரப்பாகவும், தந்திரமாகவும் மாற்றும் என சோப்ரா நம்புகிறார்.