காலிறுதியில் பி.வி.சிந்து! அடுத்த சவாலில் சாதிப்பாரா இந்திய நட்சத்திரம்?

இந்திய பேட்மிண்டன் ரசிகர்களுக்கு மகிழ்ச்சியான செய்தி! பிரான்ஸ் ஓபன் தொடரில் இறுதிப்போட்டி வரை முன்னேறிய இந்தியாவின் நட்சத்திர வீராங்கனை பி.வி. சிந்து, தற்போது ஜெர்மனியில் நடைபெறும் ‘ஹைலோ ஓபன் பேட்மிண்டன்’ தொடரிலும் தனது வெற்றிப் பயணத்தைத் தொடர்ந்து வருகிறார். இரண்டாவது சுற்றில் பிரான்ஸ் வீராங்கனையை வீழ்த்தி காலிறுதிக்குள் நுழைந்திருக்கும் சிந்து, அடுத்த சுற்றிலும் வெற்றியைத் தொடர்வாரா என்ற எதிர்பார்ப்பு ரசிகர்களிடையே எழுந்துள்ளது. இந்தப் போட்டியில் சிந்து வெளிப்படுத்திய ஆட்டம், அவருடைய அடுத்த சவால் உள்ளிட்ட சுவாரஸ்யமான தகவல்களை இக்கட்டுரையில் தெரிந்துகொள்ளலாம்.

நேர்த்தியான ஆட்டம்… நம்பிக்கையான வெற்றி!

ஜெர்மனியின் சார்புரூக்கன் நகரில் நடைபெறும் ஹைலோ ஓபன் சூப்பர் 500 பேட்மிண்டன் தொடரில், பெண்கள் ஒற்றையர் பிரிவில் இரண்டாவது நிலை வீராங்கனையாகக் களமிறங்கிய பி.வி. சிந்து, இரண்டாவது சுற்றில் பிரான்ஸ் நாட்டைச் சேர்ந்த ரோஸி ஒக்டாவியா பன்கசாரியை எதிர்கொண்டார்.

இந்தப் போட்டியில் தொடக்கம் முதலே ஆதிக்கம் செலுத்திய சிந்து, தனது அனுபவத்தையும் வேகத்தையும் சரியாகப் பயன்படுத்தினார். எதிராளிக்கு அதிக வாய்ப்புகளை வழங்காமல் விளையாடிய அவர், முதல் செட்டை 21–9 என்ற கணக்கில் கைப்பற்றினார். இரண்டாவது செட்டிலும் தனது அதிரடியைத் தொடர்ந்த சிந்து, 21–6 என்ற புள்ளிக் கணக்கில் வெற்றி பெற்றார்.

வெறும் 26 நிமிடங்களிலேயே போட்டியை முடித்து வெற்றியைத் தன்வசப்படுத்தியது சிந்துவின் சிறப்பான ஆட்டத்துக்குச் சான்றாக அமைந்தது. இரண்டு செட்களிலும் எதிராளிக்கு அழுத்தம் கொடுத்து விளையாடிய அவர், தனது திறமையையும் அனுபவத்தையும் மீண்டும் நிரூபித்துள்ளார்.

பிரான்ஸ் ஓபனைத் தொடர்ந்து ஹைலோ ஓபனிலும் அசத்தல்!

இரண்டு முறை ஒலிம்பிக் பதக்கம் வென்றவரும், முன்னாள் உலக சாம்பியனுமான பி.வி. சிந்து, சர்வதேச பேட்மிண்டன் அரங்கில் இந்தியாவின் முக்கியமான வீராங்கனைகளில் ஒருவர். அண்மையில் நடைபெற்ற பிரான்ஸ் ஓபன் தொடரில் இறுதிப்போட்டி வரை முன்னேறி இரண்டாவது இடத்தைப் பிடித்தார்.

அந்தத் தொடரில் வெளிப்படுத்திய ஆட்டத்தால் கிடைத்த நம்பிக்கையை, ஜெர்மனியில் நடைபெறும் ஹைலோ ஓபனிலும் அவர் தொடர்ந்து வருகிறார். முதல் சுற்றில் ஐக்கிய அரபு அமீரகத்தைச் சேர்ந்த பிரகிருதி பரத்தை 21–10, 21–10 என்ற கணக்கில் வீழ்த்திய சிந்து, இரண்டாவது சுற்றிலும் நேர் செட்களில் வெற்றி பெற்றுள்ளார்.

இதனால், இந்தத் தொடரில் சிந்துவின் ஆட்டத்தின் மீது ரசிகர்களின் எதிர்பார்ப்பு அதிகரித்துள்ளது.

காலிறுதியில் காத்திருக்கும் சவால்!

காலிறுதியில் டென்மார்க் வீராங்கனை அமாலி ஷூல்ஸை சிந்து எதிர்கொள்ள உள்ளார். அடுத்த சுற்றில் வெற்றி பெற வேண்டுமானால், தனது வேகத்தையும் துல்லியமான ஷாட்களையும் தொடர்ந்து வெளிப்படுத்த வேண்டியிருக்கும்.

அதே நேரத்தில், எதிராளியின் ஆட்ட உத்தியைக் கணித்து விளையாடுவதும் முக்கியமானதாக இருக்கும்.

இந்தியாவின் மற்றொரு முன்னணி வீரரான லக்ஷ்யா சென்னும் ஆண்கள் ஒற்றையர் பிரிவில் காலிறுதிக்கு முன்னேறியுள்ளார். ஆனால், பெண்கள் ஒற்றையர் பிரிவில் மாளவிகா பன்சோட், இஷாராணி பருவா ஆகியோர் இரண்டாவது சுற்றில் தோல்வியடைந்து தொடரிலிருந்து வெளியேறியுள்ளனர்.

இந்தத் தொடரில் இந்திய வீராங்கனைகளின் செயல்பாடு கலவையான முடிவுகளைத் தந்துள்ளது..பி.வி.சிந்து காலிறுதிக்கு முன்னேறிய அதே நேரத்தில் மாளவிகா பன்சோட் கனடாவின் வென் யூ ஜாங்கிடம் 11_21,17_21என்ற கணக்கில் தோல்வி அடைந்தார்‌‌. மற்றொரு இந்திய வீராங்கனையான இஷாராணி பருவாவும் டென்மார்க்கின் லைன் ஹோய்மார்க் கியர்ஸ்ஃபெல்ட்டிடம் 14_21 ,19_21 என்ற கணக்கில் தோல்வியைத் தழுவினார்..

இதனால் பெண்கள் ஒற்றையர் பிரிவில் இந்தியாவின் நம்பிக்கை நட்சத்திரமாகச் சிந்து திகழ்கிறார்.. பிரான்ஸ் ஓபனில் இறுதிப் போட்டி வரை முன்னேறிய அனுபவம் அவருக்கு கை கொடுக்குமா என்பதும் எதிர்பார்ப்பை ஏற்படுத்தியுள்ளது.

அடுத்தடுத்த சுற்றுகளில் வலுவான எதிராளிகளைச் சந்திக்க வேண்டி இருப்பதால் ஒவ்வொரு புள்ளியையும் கவனமாகக் கையாள்வது அவசியம்.. சிந்துவின் அனுபவமும் மன உறுதியும் அடுத்த போட்டியில் முக்கிய பங்கு வகிக்கும்..

ரசிகர்களின் எதிர்பார்ப்பு!!

சர்வதேச போட்டிகளில் பல சவால்களைச் சந்தித்துள்ள சிந்து, இன்று டென்மார்க் வீராங்கனை அமாலி ஷூல்ஸ்க்கு எதிராக நடைபெறும் போட்டியில் தனது அனுபவத்தை எவ்வாறு பயன்படுத்தப் போகிறார் என்பதே அனைவரின் எதிர்பார்ப்பாக உள்ளது.

தொடர்ச்சியான வெற்றிகளால் நம்பிக்கையுடன் களம் காணும் சிந்து, ஹைலோ ஓபன் தொடரின் காலிறுதிப் போட்டியில் வெற்றி பெற்று அடுத்த சுற்றுக்கு முன்னேறுவாரா என்பதைப் பொறுத்திருந்துதான் பார்க்க வேண்டும்.

மேலும் இந்தியாவின் மூவர்ணக் கொடியை சர்வதேச பேட்மிண்டன் அரங்கில் உயர்த்திப் பிடிக்க சிந்து தொடர்ந்து சிறப்பாக விளையாட வேண்டும் என்பதே ரசிகர்களின் விருப்பமாகும்.