உலகின் முதல் ரோபோட் ஒலிம்பிக் போட்டி!

சீனாவில் மூன்று நாட்கள் நடைபெற்ற உலக ஹுமனாய்ட் ரோபோ விளையாட்டுப் போட்டிகள், செயற்கை நுண்ணறிவு மற்றும் ரோபோ தொழில்நுட்பத்தில் சீனாவின் அபார வளர்ச்சியை உலகிற்கு எடுத்துக்காட்டின. இந்தப் போட்டியில் 16 நாடுகளிலிருந்து 280 அணிகள் பங்கேற்றன.

இந்த நிகழ்வில் தடகளம், டேபிள் டென்னிஸ் போன்ற விளையாட்டுகளுடன், மருந்துகளைப் பிரித்தெடுத்தல், பொருட்களைக் கையாளுதல் மற்றும் சுத்தம் செய்தல் போன்ற ரோபோக்களுக்கான சவால்களும் நடத்தப்பட்டன. அமெரிக்கா, ஜெர்மனி, பிரேசில் போன்ற நாடுகளிலிருந்தும், சீனாவின் யூனிட்ரீ மற்றும் ஃபூரியர் இன்டலிஜென்ஸ் போன்ற நிறுவனங்களிலிருந்தும் அணிகள் இந்தப் போட்டியில் கலந்துகொண்டன.

ஜெர்மனியைச் சேர்ந்த ஹெச்டிடபுள்யூகே ரோபோஸ் கால்பந்து அணியின் உறுப்பினர் மேக்ஸ் போல்டர், "நாங்கள் இங்கு விளையாடவும், வெற்றி பெறவும் வந்தோம். ஆனால், ஆராய்ச்சியில் அதிக ஆர்வம் உள்ளோம். இந்த போட்டியில் பல புதிய அணுகுமுறைகளைச் சோதித்துப் பார்க்க முடியும். நாங்கள் முயற்சிக்கும் ஒன்று தோல்வியடைந்தால், அது ஒரு விளையாட்டு இழப்பு மட்டுமே. ஆனால், பல மில்லியன் டாலர்களை முதலீடு செய்து தோல்வி அடைந்த ஒரு தயாரிப்பை விட இது சிறந்தது," என்று கூறினார்.

பெய்ஜிங்கில் நடைபெற்ற இந்த 'ரோபோ ஒலிம்பிக்ஸ்' போட்டிக்கு 128 முதல் 580 யுவான் (சுமார் ₹1,500 முதல் ₹6,700) வரை டிக்கெட் கட்டணம் வசூலிக்கப்பட்டது. கால்பந்து போட்டிகளின்போது ரோபோக்கள் ஒன்றோடு ஒன்று மோதி விழுந்தன. 1500 மீட்டர் ஓட்டப் பந்தயத்தின்போது, ஒரு ரோபோ ஓடிக்கொண்டிருக்கும்போது திடீரென கீழே விழுந்தது.

இதுபோன்ற ரோபோக்களின் தடுமாற்றங்கள் பார்வையாளர்களுக்கு சுவாரஸ்யமான அனுபவத்தைக் கொடுத்தன. இந்த போட்டிகள், ரோபோக்களை தொழிற்சாலை வேலைகளுக்குத் தயார் செய்யத் தேவையான தரவுகளைச் சேகரிக்க உதவுகின்றன என்று ஏற்பாட்டாளர்கள் தெரிவித்தனர். 

சீனா, வயதான மக்கள் தொகை மற்றும் அமெரிக்காவுடனான தொழில்நுட்ப போட்டியைச் சமாளிக்க, ஹுமனாய்ட் ரோபோக்கள் மற்றும் ரோபோடிக்ஸ் துறையில் பல பில்லியன் டாலர்களை முதலீடு செய்து வருகிறது. பெய்ஜிங்கில் நடைபெற்ற உலகின் முதல் ஹுமனாய்ட் ரோபோ மாரத்தான் மற்றும் ரோபோ மாநாடு போன்ற பல உயர்நிலை நிகழ்வுகளை சீனா நடத்தியுள்ளது.

மார்கன் ஸ்டான்லி ஆய்வாளர்கள், "இந்த நிகழ்வுகளில் பொதுமக்கள் அதிக அளவில் கலந்துகொண்டது, சீனா முழுவதுமாக இந்த ரோபோ தொழில்நுட்பத்தை ஏற்றுக்கொண்டிருப்பதைக் காட்டுகிறது," என்று குறிப்பிட்டனர்.