ஆவி பிடிக்கும் போது இந்தப் பொருட்களை சேர்க்க மறந்துடாதீங்க! 

மாறிவரும் காலநிலையிலும், சுற்றுச்சூழல் காரணங்களாலும் சுவாசக் கோளாறுகள், தொற்றுகள் ஏற்படுவது அதிகரித்து வருகிறது. நாம் சுவாசிக்கும் காற்றின் மூலம் நுழையும் கிருமிகள் பெரும்பாலும் தொண்டையையே முதலில் பாதிக்கின்றன. எனவே, தொண்டையில் எரிச்சல் அல்லது அசௌகரியம் ஏற்படும்போதே கவனம் எடுத்துக்கொள்வது நல்லது. இந்த ஆரம்பக் கட்டத்திலேயே ஆவி பிடிப்பது ஒரு சிறந்த தீர்வாக அமையும். சாதாரண வெந்நீரில் ஆவி பிடிப்பதை விட, சில பாரம்பரிய மூலிகைப் பொருட்களைச் சேர்த்து ஆவி பிடிப்பது பல மடங்கு நன்மைகளை அளிக்கும்.

பாரம்பரிய மருத்துவ முறைகளில், ஆவி பிடித்தலுக்குப் பல முக்கியத்துவம் கொடுக்கப்பட்டுள்ளது. சில குறிப்பிட்ட இலைகள் மற்றும் மசாலாப் பொருட்களை வெந்நீரில் சேர்த்து ஆவி பிடிக்கும்போது, அவற்றின் மருத்துவ குணங்கள் நீராவியுடன் கலந்து சுவாசப் பாதைக்குள் சென்று செயல்படுகின்றன. இது தொண்டையில் உள்ள கிருமிகளை அழிக்கவும், மூக்கடைப்பை நீக்கவும், நுரையீரலில் உள்ள சளியைக் கரைக்கவும் உதவுகிறது. தலையில் கோர்த்திருக்கும் நீரையும் வெளியேற்றி, உடலுக்கு ஒருவித லேசான உணர்வைத் தரும்.

துளசி, வேப்பிலை, நொச்சி இலைகள், ஆடாதொடை இலைகள், மஞ்சள் தூள், இஞ்சி, கல் உப்பு மற்றும் கிராம்பு ஆவி பிடித்தலுக்குப் பயன்படுத்தப்படும் சில முக்கிய மூலிகைப் பொருட்கள். இந்த ஒவ்வொரு பொருளுக்கும் தனித்தனி மருத்துவ குணங்கள் உள்ளன. துளசி மற்றும் வேப்பிலை கிருமி நாசினி பண்புகளைக் கொண்டுள்ளன. நொச்சி மற்றும் ஆடாதொடை சுவாசப் பாதை பிரச்சனைகளுக்குச் சிறந்தது. இஞ்சி மற்றும் கிராம்பு நெரிசலைக் குறைக்கும். மஞ்சள் நோய் எதிர்ப்பு சக்தியை அதிகரிக்கும். கல் உப்பு தொண்டையில் உள்ள சளியைக் கரைக்க உதவும்.

இந்த மூலிகைப் பொருட்களைப் பயன்படுத்தி ஆவி பிடிக்கும் முறை எளிமையானது. ஒரு பாத்திரத்தில் தண்ணீர் எடுத்துக்கொண்டு, அதில் தோல் சீவி நசுக்கிய இஞ்சி, வேப்பிலை, துளசி, நொச்சி, ஆடாதொடை இலைகள், மஞ்சள் தூள், கல் உப்பு மற்றும் கிராம்பு ஆகியவற்றைச் சேர்த்து நன்கு கொதிக்க விட வேண்டும். கொதித்த பிறகு, பாத்திரத்தை இறக்கி வைத்து, ஒரு போர்வையால் தலையையும் பாத்திரத்தையும் மூடிக்கொண்டு, நீராவியை சுவாசிக்க வேண்டும். மூக்கின் வழியாக உள்ளிழுத்து, வாய் வழியாக வெளியிடலாம். அல்லது வாய் வழியாக உள்ளிழுத்து, மூக்கின் வழியாக வெளியிடலாம். இப்படி மாறி மாறிச் செய்வது சுவாசப் பாதையின் அனைத்துப் பகுதிகளுக்கும் நீராவியின் பலன்கள் சென்றடைய உதவும்.

தினமும் ஒரு முறை ஆவி பிடிப்பது பொதுவான ஆரோக்கியத்திற்கு நல்லது. இருப்பினும் அது மிகவும் கடினம் என்பதால், சளி, இருமல் அல்லது தொண்டை வலி போன்ற பிரச்சனைகள் இருக்கும்போது, ஒரு நாளைக்கு இரண்டு அல்லது மூன்று முறை ஆவி பிடிக்கலாம். இந்த பாரம்பரிய முறையைப் பின்பற்றுவதன் மூலம் சுவாச மண்டலத்தை ஆரோக்கியமாகப் பராமரித்து, பலவிதமான தொற்றுகளிலிருந்து நம்மைப் பாதுகாத்துக் கொள்ளலாம்.

(முக்கிய அறிவிப்பு: இக்கட்டுரையில் உள்ள தகவல்கள், பல்வேறு செய்திகளின் தொகுப்பாக மட்டுமே வழங்கப்படுகின்றன. இவை மருத்துவ நிபுணர்களின் ஆலோசனைகள் அல்ல. உடல்நலம் தொடர்பான எந்தவொரு சந்தேகத்துக்கும், பிரச்னைக்கும், அவசியம் மருத்துவரை அணுகவும்.)