Wellness - புற்றுநோயைக் கண்டுபிடிக்க இனி ஸ்கேன் தேவையில்லை... காது மெழுகு ஒன்றே போதும்!

Earwax cancer detection: நாம் அனைவரும் குளித்து முடித்தவுடன் அல்லது காதில் லேசான அரிப்பு ஏற்பட்டவுடன் முதலில் தேடுவது பட்ஸ் அல்லது ஒரு சிறிய குச்சியையே ஆகும். காதுக்குள் இருக்கும் மெழுகு போன்ற பொருளை ஒரு தேவையற்ற அழுக்காகவும், அருவருப்பான விஷயமாகவுமே நாம் காலம் காலமாகப் பார்த்து வருகிறோம். அதைச் சுத்தம் செய்து வெளியேற்றிவிட்டால் தான் நமக்கு நிம்மதி. 

ஆனால், நாம் குப்பை என்று நினைத்துத் தூக்கி எறியும் அந்தப் பிசுபிசுப்பான பொருளில் நம் உயிரைக் காக்கும் மாபெரும் மருத்துவத் தகவல்கள் மறைந்திருக்கின்றன என்பது பலருக்கும் தெரியாத உண்மையாகும். ரத்தப் பரிசோதனை மற்றும் ஸ்கேனிங் முறைகளுக்கு மாற்றாக, காது மெழுகை வைத்தே பல கொடிய நோய்களைக் கண்டறிய முடியும் என்று பிரேசில் நாட்டு விஞ்ஞானிகள் நிரூபித்துள்ளனர். 

வலி இல்லாத நவீன பரிசோதனை!

வழக்கமாகச் சர்க்கரை நோய் அல்லது புற்றுநோய் போன்ற பாதிப்புகளைக் கண்டறிய ஊசி போட்டு ரத்தம் எடுப்பார்கள் அல்லது திசுக்களை வெட்டி எடுத்துப் பரிசோதனை செய்வார்கள். இவை இரண்டுமே வலி தரக்கூடியவை. ஆனால் பிரேசிலில் உள்ள கோயாஸ் பல்கலைக்கழக ஆராய்ச்சியாளர்கள் 'செருமெனோகிராம்' என்ற ஒரு புதிய முறையை அறிமுகப்படுத்தியுள்ளனர். காதில் சுரக்கும் மெழுகைச் சேகரித்துப் பரிசோதிப்பதன் மூலம் நோய்களைத் துல்லியமாகக் கணிக்க முடியும். இது மிகவும் எளிமையானது மட்டுமல்லாமல், நோயாளிக்கு எந்தவித வலியையும் தராத ஒரு சிறந்த முறையாகும்.

உடல் காட்டும் எச்சரிக்கை! 

நம் காதில் சுரக்கும் அந்த மெழுகிற்கு அறிவியல் மொழியில் 'செருமன்' என்று பெயர். இது காதின் உட்புறத்தைப் பாதுகாப்பதற்காகச் சுரக்கும் ஒரு திரவம். ஆனால் இதில் நம் உடலின் ஒட்டுமொத்த ஆரோக்கிய நிலையும் பதிவாகி இருக்கும். குறிப்பாக அல்சைமர் எனப்படும் ஞாபக மறதி நோய், இதயக் கோளாறுகள், டைப் 2 நீரிழிவு நோய் மற்றும் பல்வேறு வகையான புற்றுநோய்களுக்கான அறிகுறிகளை இந்த மெழுகில் உள்ள வேதிப்பொருட்கள் காட்டிக் கொடுத்துவிடும். ரத்தத்தில் கலந்திருக்கும் சர்க்கரை அளவைக் காட்டிலும், காது மெழுகில் உள்ள குளுக்கோஸ் அளவு மிகவும் துல்லியமான தகவல்களைத் தருவதாக ஆய்வுகள் கூறுகின்றன.

அனைத்து மனிதர்களுக்கும் காது மெழுகு ஒரே மாதிரி இருப்பதில்லை. நாம் வாழும் இடத்தைப் பொறுத்தும், நம் முன்னோர்களின் மரபணுவைப் பொறுத்தும் இது மாறுபடும். உதாரணத்திற்கு, ஐரோப்பா மற்றும் அமெரிக்காவில் வசிப்பவர்களுக்கு இந்த மெழுகு ஈரம் மிகுந்ததாகவும், மஞ்சள் அல்லது பழுப்பு நிறத்திலும் இருக்கும். ஆனால் ஆசிய நாடுகளில், குறிப்பாகச் சீனா மற்றும் ஜப்பான் போன்ற நாடுகளில் உள்ள மக்களுக்கு இது உலர்ந்ததாகவும், சாம்பல் நிறத்திலும் காணப்படும்.

எளிய தீர்வு!

சில அரிய வகை மரபணு நோய்களைக் கண்டறியச் செய்யப்படும் சோதனைகள் மிகவும் செலவு பிடிக்கும் ஒன்றாக இருக்கின்றன. ஆனால் காது மெழுகு பரிசோதனை மிகவும் மலிவானது. ஏழை எளிய மக்களும் எளிதில் செய்துகொள்ளக்கூடிய வகையில் இது அமையும். உடலில் கட்டி வருவதற்கு முன்பே, இந்த மெழுகு பரிசோதனை மூலம் புற்றுநோயின் அறிகுறிகளைக் கண்டறிந்துவிட முடியும் என்பது இதன் மிகப்பெரிய வெற்றியாகும்.

அறிவியல் தொழில்நுட்பம் வளர வளர, மருத்துவம் எளிமையாகிக்கொண்டே வருகிறது. எனவே இனி காது மெழுகை வெறும் அழுக்காகப் பார்க்காமல், அது நம் உடல்நலத்தைப் பிரதிபலிக்கும் ஒரு கண்ணாடியாகப் பார்ப்பதே புத்திசாலித்தனம்.

(முக்கிய குறிப்பு: இந்தத் தகவல்கள் பொதுவான விழிப்புணர்வுக்காக மட்டுமே. மருத்துவ ஆலோசனைக்கு சரியான தகுந்த மருத்துவரை அணுகவும்)