ஒருவர் நேரத்திற்கு சாப்பிடுவது அவசியமா? 

நாம் சாப்பிடும் உணவுகள் நம் உடலுக்கு ஆற்றலைத் தருவது மட்டுமின்றி, நம் உடல் உறுப்புகளின் சீரான இயக்கத்திற்கு முக்கியமானது. இதில் நாம் உண்ணும் நேரம் எவ்வளவு முக்கியம்? உணவு பழக்க வழக்கங்கள் நம் ஆரோக்கியத்தில் எவ்வாறு தாக்கத்தை ஏற்படுத்துகிறது? என்பது பற்றிய ஆய்வுகள் பல ஆண்டுகளாக நடைபெற்று வருகின்றன. இந்த ஆய்வுகளின் அடிப்படையில் ஒருவர் சரியான நேரத்தில் உணவு உண்பது அவசியமா? என்பதை இந்தப் பதிவில் பார்க்கலாம். 

நம் உடலில் உள்ள அனைத்து உறுப்புகளும் ஒரு குறிப்பிட்ட சுழற்சியில் செயல்படுகின்றன. இந்த சுழற்சியை உடல் சுழற்சி (Circadian Rhythm) என்று அழைக்கிறோம். உணவு நேரம் இந்த உடல் சுழற்சியை கட்டுப்படுத்துகிறது. சரியான நேரத்தில் உணவு உண்பதால், உடல் உறுப்புகள் தங்களது பணிகளை சரியாக செய்து, நம் உடலை ஆரோக்கியமாக வைத்திருக்கும். 

உணவு நேரம், நம் உடலில் சுரக்கும் ஹார்மோன்களை பாதிக்கிறது. இன்சுலின், கிரெலின் போன்ற ஹார்மோன்கள் உணவு உண்ணும் நேரத்திற்கு ஏற்ப சுரக்கின்றன. இந்த ஹார்மோன்களின் சமநிலை, நம் உடல் எடை, நீரிழிவு நோய் போன்ற பல நோய்களை கட்டுப்படுத்துகிறது. சரியான நேரத்திற்கு உணவு உண்பதால் செரிமானம் எளிதாக நடைபெறுகிறது. இதனால் நாம் உண்ணும் உணவில் உள்ள சத்துக்கள் நம் உடலில் முழுமையாக உறிஞ்சப்படுகின்றன. 

சரியான நேரத்தில் உணவு உண்பதால் கிடைக்கும் நன்மைகள்: 

சரியான நேரத்திற்கு உணவு உண்பதால் உடல் எடையை கட்டுப்படுத்த முடியும். இது உடலில் அதிக கொழுப்பு சேர்வதை தடுத்து, உடல் எடையை குறைக்க உதவுகிறது. சரியான நேரத்திற்கு உணவு உண்பதால் இன்சுலின் உற்பத்தி சீராக இருக்கும். இது நீரிழிவு நோய் வருவதற்கான வாய்ப்பை குறைக்கிறது. மேலும், சரியான நேரத்திற்கு உடலுக்கு தேவையான ஆற்றல் கிடைத்து நாள் முழுவதும் உற்சாகமாக இருக்க முடியும். சரியான நேரத்தில் உணவு உண்பதால் செரிமானம் சீராக நடைபெற்று அஜீரணம், வயிற்றுப்போக்கு போன்ற செரிமான பிரச்சனைகள் குறையும். இதனால், மனநிலை மேம்பட்டு மன அழுத்தம், பதட்டம் போன்ற மன நோய்கள் குறைகிறது. 

ஒவ்வொரு நாளும் கிட்டத்தட்ட ஒரே நேரத்தில் உணவு உண்ணும் பழக்கத்தை ஏற்படுத்திக் கொள்ளுங்கள். மூன்று வேளை உணவுக்கு இடையில் சிறிய இடைவெளியில் பழங்கள், காய்கறிகள் போன்ற ஆரோக்கியமான சிற்றுண்டிகள் உண்ணலாம். இரவு உணவை தூங்குவதற்கு மூன்று மணி நேரத்திற்கு முன் உண்ணுவது நல்லது. உணவை நன்றாக மென்று உண்ணுவதால் செரிமானம் எளிதாக நடைபெறும். இத்துடன் போதுமான அளவு தண்ணீர் குடிப்பது செரிமானத்தை மேம்படுத்துகிறது. 

ஒருவர் தினசரி சரியான நேரத்தில் உணவு உண்பது உடல் மற்றும் மன ஆரோக்கியத்திற்கு மிகவும் முக்கியமானது. இதனால், உடலுக்கு பல்வேறு ஆரோக்கிய நன்மைகள் கிடைப்பதால் சரியான நேரத்திற்கு உணவு உண்ணும் பழக்கத்தை வளர்த்துக்கொள்ள வேண்டும்.