நாற்காலி நண்பனா? எதிரியா?... ஆஃபீஸ் பட் என்னும் ஆபத்து!

நவீன உலகில், நம் வாழ்வின் பெரும்பகுதி நாற்காலியிலேயே கழிகிறது. வீட்டிலிருந்தாலும் சரி, அலுவலகம் சென்றாலும் சரி, வேலை என்று வந்துவிட்டால் மணிக்கணக்கில் உட்கார்ந்திருப்பது தவிர்க்க முடியாதது. ஆனால், இந்த பழக்கம் நமக்கு ஒரு ஆபத்தை விளைவிக்கலாம் என்பது உங்களுக்குத் தெரியுமா? அதுதான் "ஆஃபீஸ் பட் (Office Butt)" என்று அழைக்கப்படும் குளுட் தசை பலவீனம். 

ஆஃபீஸ் பட் என்றால் என்ன? 

எளிமையாகச் சொல்ல வேண்டுமென்றால், நமது பின்புற தசைகள் வலுவிழந்து, செயலற்றுப் போவதுதான் ஆஃபீஸ் பட். நாள் முழுவதும் உட்கார்ந்தே இருப்பதால், இந்த தசைகளுக்கு வேலை இல்லாமல் போகிறது. உடற்பயிற்சி இல்லாத வாழ்க்கை முறை இதற்கு மேலும் வலு சேர்க்கிறது. ஒரு இயந்திரத்தை நீண்ட நாட்களுக்கு இயக்காமல் விட்டால் துருப்பிடித்துப் போவது போல, நம் தசைகளும் வலுவிழந்து போகின்றன. இதனால், இடுப்பு பகுதி இறுக்கமடைந்து, கீழ் முதுகு வலி, மோசமான உடல் தோரணை போன்ற பிரச்சனைகள் உருவாகின்றன. நம் உடல் இயக்கத்திற்கு முக்கிய ஆதாரமாக இருக்கும் தசைகள் பலவீனமடைந்தால் ஒட்டுமொத்த ஆரோக்கியமும் பாதிக்கப்படும்.

ஆஃபீஸ் பட்டை தடுப்பது எப்படி?

 நல்ல செய்தி என்னவென்றால், ஆஃபீஸ் பட்டை தடுப்பது கடினம் அல்ல. சில எளிய பழக்கங்களை பின்பற்றுவதன் மூலம் இந்த ஆபத்திலிருந்து தப்பிக்கலாம். ஒவ்வொரு 30-60 நிமிடங்களுக்கு ஒருமுறை நாற்காலியை விட்டு எழுந்து நடப்பது மிகவும் முக்கியம். சில நிமிட நடைப்பயிற்சி கூட தசைகளை சுறுசுறுப்பாக்கும். ஸ்குவாட்ஸ், லஞ்சஸ் போன்ற எளிய உடற்பயிற்சிகளை செய்வது தசைகளை வலுப்படுத்த உதவும். 

முடியுமானால், ஸ்டாண்டிங் டெஸ்க் பயன்படுத்தி வேலை செய்வது நல்லது. உட்காரும் போது சரியான தோரணையை கடைபிடிப்பது மிகவும் முக்கியம். முதுகு நேராகவும், கால்கள் தரையில் படியும் படியும் வசதியாக உட்கார வேண்டும். இறுதியாக, வழக்கமான ஸ்ட்ரெச்சிங் பயிற்சிகள் தசைகளின் விறைப்பை குறைத்து நெகிழ்வுத்தன்மையை அதிகரிக்கும்.

ஏற்கனவே ஆஃபீஸ் பட் வந்துவிட்டால் என்ன செய்வது? 

கவலை வேண்டாம். யோகா, பைலேட்ஸ் போன்ற பயிற்சிகள் உடல் தோரணையை மேம்படுத்தவும், தசைகளை வலுப்படுத்தவும் உதவும். நடைப்பயிற்சி மிகச் சிறந்த மருந்து. தினமும் நடப்பதை வழக்கமாக்கிக் கொள்ளுங்கள். மசாஜ் தெரபி தசைகளில் உள்ள இறுக்கத்தை தளர்த்தி இரத்த ஓட்டத்தை மேம்படுத்தும்.

சரியான முன்னெச்சரிக்கை நடவடிக்கைகளை மேற்கொள்வதன் மூலம் இந்த ஆஃபீஸ் பட் ஆபத்தைத் தவிர்க்கலாம். சற்று முயற்சி செய்தால், நாற்காலி நமக்கு நண்பனாகவே இருப்பான், எதிரியாக மாற மாட்டான்.