ஜங்க் உணவுகளால் நுரையீரல் புற்றுநோய் ஆபத்து: புதிய ஆய்வு தரும் அதிர்ச்சி!

அன்றாட வாழ்வில் சுலபமாகவும் விரைவாகவும் தயாரிக்கக்கூடிய இன்ஸ்டண்ட் நூடுல்ஸ், சோடா போன்ற பதப்படுத்தப்பட்ட உணவுகளை நாம் விரும்பி உட்கொள்கிறோம். ஆனால், இந்த உணவுகள் நமது உடல் ஆரோக்கியத்திற்கு ஏற்படுத்தும் அபாயங்கள் குறித்து புதிய ஆய்வு ஒன்று எச்சரித்துள்ளது. 

அதிக கொழுப்பு, உப்பு, சர்க்கரை மற்றும் பல்வேறு செயற்கை சேர்க்கைகள் கொண்ட இந்த உணவுகள், உடல் பருமன், இதய நோய், நீரிழிவு நோய் போன்ற பல்வேறு உடல்நலப் பிரச்சனைகளை ஏற்படுத்துவது குறித்து மருத்துவர்கள் ஏற்கனவே எச்சரித்துள்ளனர். இந்த நிலையில், அமெரிக்காவில் நடத்தப்பட்ட ஒரு புதிய ஆய்வு, இந்த ஜங்க் உணவுகளுக்கும் நுரையீரல் புற்றுநோய்க்கும் இடையே ஒரு நேரடித் தொடர்பு இருப்பதைக் கண்டறிந்துள்ளது.

அதிகமாகப் பதப்படுத்தப்பட்ட உணவுகளான பிரட், சோடா மற்றும் இன்ஸ்டண்ட் நூடுல்ஸ் போன்றவற்றை அடிக்கடி உட்கொள்பவர்களுக்கு, நுரையீரல் புற்றுநோய் வருவதற்கான ஆபத்து 41% அதிகம் என்பது இந்த ஆய்வின் முக்கியக் கண்டுபிடிப்பு. இந்த ஆய்வு முடிவுகள், அன்றாட வாழ்வில் வசதிக்காக நாம் தேர்ந்தெடுக்கும் உணவுகள், நீண்ட கால அடிப்படையில் நமது சுவாச ஆரோக்கியத்தை எவ்வாறு பாதிக்கலாம் என்பதை அடிக்கோடிட்டுக் காட்டுகிறது. இந்த ஆய்வு, புகைபிடிக்காத நபர்களுக்குக்கூட, அதிகம் பதப்படுத்தப்பட்ட உணவுகளைச் சாப்பிடுவது நுரையீரல் புற்றுநோய் அபாயத்தை அதிகரிக்கக்கூடும் என்று கூறியுள்ளது, இது மிகவும் முக்கியமானதாகக் கருதப்படுகிறது.

பதப்படுத்தப்பட்ட உணவுகள் என்றால் என்ன?

செயற்கை வண்ணங்கள், பாதுகாப்புகள், சுவையை அதிகரிக்கும் ரசாயனங்கள் மற்றும் செயற்கை இனிப்புகள் போன்ற சேர்க்கைகளுடன் தயாரிக்கப்படும் உணவுகளே பதப்படுத்தப்பட்ட உணவுகள் என அழைக்கப்படுகின்றன. இந்த உணவுகளில் கலோரிகள் அதிகமாகவும், ஊட்டச்சத்துகள் குறைவாகவும் இருக்கும். பேக் செய்யப்பட்ட சிற்றுண்டிகள், காலை உணவு தானியங்கள், குளிர்பானங்கள், பேக்கரி பொருட்கள், இன்ஸ்டண்ட் உணவுகள் மற்றும் பதப்படுத்தப்பட்ட இறைச்சிகள் ஆகியவை இதில் அடங்கும்.

புற்றுநோய் அபாயத்தை எவ்வாறு அதிகரிக்கின்றன?

அதிகம் பதப்படுத்தப்பட்ட உணவுகளில் உள்ள செயற்கை சேர்க்கைகளும், குறைந்த ஊட்டச்சத்துகளும் உடலில் நாள்பட்ட அழற்சியையும், ஆக்சிஜனேற்ற அழுத்தத்தையும் தூண்டுகின்றன. இது உடலின் நோய் எதிர்ப்பு சக்தியைப் பாதித்து, நுரையீரல் உள்ளிட்ட உறுப்புகளுக்குப் பாதிப்பை ஏற்படுத்தக்கூடும். மேலும், இந்த உணவுகள் உடல் பருமன் மற்றும் வளர்சிதை மாற்றக் குறைபாடுகளுக்கு வழிவகுத்து, புற்றுநோய் அபாயக் காரணிகளை அதிகரிக்கச் செய்யும்.

இந்த ஆய்வில், 55 முதல் 74 வயதுடைய சுமார் 1,02,000 பெரியவர்கள் கலந்துகொண்டனர். இந்த நபர்கள் சுமார் 12 ஆண்டுகள் கண்காணிக்கப்பட்டதில், 1,706 பேருக்கு நுரையீரல் புற்றுநோய் கண்டறியப்பட்டுள்ளது. குறைவாக ஜங்க் உணவுகள் சாப்பிட்டவர்களை ஒப்பிடும்போது, அதிகமாகச் சாப்பிட்டவர்களுக்கு 41% அதிக ஆபத்து இருந்தது. இந்த ஆய்வு, உடல்நலப் பாதுகாப்பு குறித்த விழிப்புணர்வை அதிகரிப்பதுடன், நமது உணவுப் பழக்கவழக்கங்களை மறுபரிசீலனை செய்ய வேண்டியதன் அவசியத்தையும் நமக்குத் தெரியப்படுத்துகிறது.