ஆரோக்கியமான பிளம்ஸ் பழத்தை அடையாளம் காண்பது எப்படி?

இயற்கையின் கொடையான பழவகைகளில், பிளம்ஸ் (Plum Fruit) தனித்துவமான சுவை கொண்டவை. வைட்டமின்கள் மற்றும் தாதுக்கள் நிறைந்த இந்தப் பழங்கள், குளிர்ச்சியான மலைப்பிரதேசங்களில் செழித்து வளரக்கூடியவை. ஒரு பிளம்ஸ் செடியை வளர்ப்பதை விட, அதன் பழங்கள் சரியான பக்குவத்தில் இருக்கும்போது அறுவடை செய்வது மிக முக்கியமானது; ஏனெனில், சரியான நேரத்தில் பறிக்கப்படும் பழங்களே முழுமையான சுவையையும் சத்துக்களையும் வழங்கும்.

மகரந்தச் சேர்க்கை நடைபெற பெரும்பாலான பிளம் மரங்களுக்கு, மற்றொரு பிளம் மரம் அருகில் இருப்பது அவசியமாகும். பிளம்ஸ் பழங்கள் எப்போது பறிக்கத் தயாராக உள்ளன என்பதை அறிய சில முக்கிய குறிப்புகள் இதோ:

1. அறுவடை காலம் (Harvest Season)

இந்தியாவில் மே மாதம் முதல் ஜூலை அல்லது ஆகஸ்ட் வரை பிளம்ஸ் பழங்களின் சீசன் (Plum Harvesting) இருக்கும். தமிழ்நாட்டின் மலைப்பகுதிகளில் (குறிப்பாக நீலகிரி), ஜூன் மற்றும் ஜூலை மாதங்கள் இதன் உச்சக்கட்ட சீசன் ஆகும்.

2. பழம் பழுத்துவிட்டதை அறியும் முறைகள்

பழம் பறிக்கத் தயாராக இருப்பதை அதன் நிறம், தொடுதல் மற்றும் வாசனை மூலம் தெரிந்து கொள்ளலாம்.

• நிறம்: பழத்தின் வகைக்கேற்ப அடர் சிவப்பு, ஊதா அல்லது மஞ்சள் நிறத்திற்கு மாறும். அதன் மேல் உள்ள பச்சை நிறம் முழுமையாக மறைந்திருக்க வேண்டும்.

• மென்மை: பழத்தை மெதுவாக அழுத்தினால், அது கல்லுப்போல இல்லாமல் சற்று மென்மையாக இருக்க வேண்டும். குறிப்பாக, நுனிப்பகுதி மென்மையாக இருந்தால் அது பழுத்துவிட்டது என்று அர்த்தம்.

• வாசனை: நன்கு பழுத்த பிளம்ஸ் பழங்கள் இனிய நறுமணத்தை வீசும். மணம் இல்லையென்றால் அது இன்னும் முழுமையாகப் பழுக்கவில்லை எனலாம். பழுத்த பழம் இனிப்பாகவும், லேசான புளிப்புடனும், சாறு நிறைந்ததாகவும் இருக்கும்.

3. எப்படிப் பறிப்பது?

பழத்தை மெதுவாகப் பிடித்துச் சுழற்றினால், அது காம்பிலிருந்து எளிதாகப் பிரிந்து வர வேண்டும். பழத்தின் மேல் ஒரு மெல்லிய வெள்ளை நிறப் பொடி போன்ற படலம் (Bloom) இருக்கும். இது பழம் இயற்கையாகவே தன்னைப் பாதுகாத்துக் கொள்ள உருவாக்குவது; இது இருந்தால் பழம் மிகவும் புதியது என்று பொருள்.

நீங்கள் கடையில் வாங்கும் பிளம்ஸ் சற்று கடினமாக இருந்தால், அதை அறையின் வெப்பநிலையில் 1-2 நாட்கள் வைத்தால் அது தானாகவே பழுத்துவிடும். பழுத்த பிறகு குளிர்சாதனப் பெட்டியில் (Fridge) வைத்தால் ஒரு வாரம் வரை கெடாமல் இருக்கும்.

பயன்கள் மற்றும் சிறப்புகள்

பிளம்ஸ் பழங்கள் புதியதாகவும், ஜாம் மற்றும் சாறு (Juice) தயாரிக்கவும் பயன்படுத்தப்படுகின்றன. இவை செரிமானத்திற்கு நல்லது மற்றும் உடலில் உள்ள நச்சுக்களை வெளியேற்ற உதவுகின்றன. இதன் ஆரோக்கிய நன்மைகளைப் பெற, இதை அப்படியே பச்சையாகவோ, உலர்ந்த பழமாகவோ அல்லது சாறு வடிவிலோ உட்கொள்ளலாம்.

ஆலூ புகாரா என்பது வண்ணமயமான மற்றும் சுவையான ஒரு கொட்டைப் பழமாகும். அறிவியல் ரீதியாக, பிளம் பழம் 'பிரூனஸ் டொமெஸ்டிகா' (Prunus Domestica) என்று அழைக்கப்படுகிறது. இதில் பல வைட்டமின்கள், தாதுக்கள், ஆன்டிஆக்ஸிடன்ட்கள் மற்றும் நார்ச்சத்துக்கள் நிறைந்துள்ளதால், இது ஒட்டுமொத்த ஆரோக்கியத்திற்குப் பங்களிக்கிறது.

வகைகள்

ஜப்பானிய மற்றும் ஐரோப்பிய பிளம்ஸ் என இதில் இரு முக்கிய வகைகள் உள்ளன. பிளம்ஸ் பழங்கள் செடியிலேயே முழுமையாகப் பழுக்கக்கூடியவை. இருப்பினும், விற்பனைக்காகவோ அல்லது நீண்ட தூரப் பயணத்திற்காகவோ எனில், இவை சற்று முன்னதாகவே மென்மை அடைவதற்குச் சற்று முன் பறிக்கப்படுகின்றன.

வீட்டில் வளர்ப்பவர்கள், பழம் செடியிலேயே மென்மையாகும் வரை காத்திருந்து பறிப்பது சிறந்த சுவையைத் தரும். சரியான பருவத்தில் அறுவடை செய்யப்படும் பிளம்ஸ் பழங்கள், ஆரோக்கியத்திற்கும் நாவிற்கும் இனிய விருந்தாக அமையும்.

(முக்கிய குறிப்பு: இந்தத் தகவல்கள் பொதுவான விழிப்புணர்வுக்காக மட்டுமே. மருத்துவ ஆலோசனைக்கு சரியான தகுந்த மருத்துவரை அணுகவும்)