124 வயது சீனா மூதாட்டியின் வாழ்வியல் ரகசியம் இதோ! 

மனிதனின் சராசரி ஆயுட்காலம் தொடர்ந்து குறைந்து வந்தாலும், சில தனிநபர்கள் விதிவிலக்காக நீண்ட காலம் வாழ்ந்து உலகையே வியப்பில் ஆழ்த்துகிறார்கள். அப்படிப்பட்டவர்களில் ஒருவர்தான் சீனாவைச் சேர்ந்த கியூ ஷைஷி (Qiu Chaishi). அண்மையில் தனது 124வது பிறந்தநாளைக் கொண்டாடிய இவர், பல தலைமுறைகளைக் கடந்து வாழ்ந்து வருவதுடன், ஆரோக்கியமான வாழ்க்கைக்கும் ஒரு உதாரணமாகத் திகழ்கிறார்.

தெற்கு சீனாவின் சிச்சுவான் மாகாணத்தில் வசிக்கும் கியூ, 1901ஆம் ஆண்டு கிங் வம்சத்தின் ஆட்சிக் காலத்தில் பிறந்ததாகக் கூறப்படுகிறது. அவரது குடும்பத்தில் ஆறு தலைமுறைகளைப் பார்த்த பெருமை இவருக்கு உண்டு. கியூவின் பேத்திக்கு தற்போது 60 வயது என்பது அவரது நீண்ட ஆயுளை மேலும் உறுதி செய்கிறது. சீன அரசு ஆவணங்களின்படி அவரது பிறந்த தேதி பதிவு செய்யப்பட்டுள்ள போதிலும், சர்வதேச அளவில் அவரது வயது இன்னும் அதிகாரப்பூர்வமாக உறுதி செய்யப்படவில்லை.

கியூவின் வாழ்க்கை பல்வேறு சவால்களைக் கடந்து வந்துள்ளது. தனது 40 வயதில் கணவரை இழந்த அவர், நான்கு குழந்தைகளைத் தனியாக வளர்க்க வேண்டிய கட்டாயம் ஏற்பட்டது. துரதிர்ஷ்டவசமாக, அவரது மூத்த மகனும் காலமானார். அதன் பிறகு தனது பேத்தியையும் அவரே வளர்த்து வந்தார். இத்தகைய கடினமான சூழ்நிலையிலும், கியூ தனது மன உறுதியையும் ஆரோக்கியத்தையும் கைவிடவில்லை என்பது குறிப்பிடத்தக்கது.

இன்று தனது கிராமத்தில் எளிய வாழ்க்கை வாழ்ந்து வருகிறார். அன்றாட பணிகளான தலைமுடி பின்னுதல், சமையலுக்கான நெருப்பு மூட்டுதல், வீட்டு விலங்குகளுக்கு உணவளித்தல் போன்றவற்றைத் தானே செய்து வருகிறார். மேலும், படிக்கட்டுகளில் ஏறி இறங்கும் அளவுக்கு உடல் வலிமையுடன் இருக்கிறார். இது அவரது ஆரோக்கியமான வாழ்க்கை முறைக்குச் சான்றாகும்.

கியூவின் உணவுப் பழக்கவழக்கங்களும் அவரது நீண்ட ஆயுளுக்கு ஒரு காரணமாக இருக்கலாம். அவர் தினமும் மூன்று வேளை உணவு உண்கிறார். ஒவ்வொரு வேளை உணவு உண்ட பின்பும் சிறிது தூரம் நடைப்பயிற்சி மேற்கொள்கிறார். இரவு 8 மணிக்கு உறங்கச் செல்லும் பழக்கத்தைக் கொண்டுள்ளார். பூசணி, தர்பூசணி, சோளம் மற்றும் அரிசிக் கஞ்சி போன்ற எளிமையான உணவுகளை விரும்பி உண்கிறார். மேலும், பன்றி இறைச்சிக் கொழுப்பையும் அவ்வப்போது உட்கொள்கிறார்.

நீண்ட ஆயுளுக்கான ரகசியம் குறித்து கியூவிடம் கேட்டபோது, "வாழ்க்கையில் நம்பிக்கையுடன் இருப்பதுதான் முக்கியம்" என்று கூறுகிறார். அவரது வாழ்க்கை முறை மற்றும் மனோபாவம் உண்மையிலேயே மற்றவர்களுக்கு ஒரு பாடமாக அமைந்துள்ளது. கியூவின் கதை, ஆரோக்கியமான உணவு, சுறுசுறுப்பான வாழ்க்கை முறை மற்றும் நேர்மறையான மனப்பான்மை ஆகியவை நீண்ட ஆயுளுக்கு வழிவகுக்கும் என்பதை நமக்கு உணர்த்துகிறது.