வறுத்த கொண்டைக்கடலை vs வேகவைத்த கொண்டைக்கடலை: ஆரோக்கியத்திற்கு ஏற்றது எது?

கொண்டைக்கடலை, இந்திய சமையலில் தவிர்க்க முடியாத ஒரு உணவுப்பொருள். இதை பலவிதமாக சமைத்து நாம் சாப்பிடுவதுண்டு. அதில் வேக வைத்த கொண்டைக்கடலை மற்றும் வறுத்த கொண்டைக்கடலை ஆகியவை மிகவும் பிரபலமானவை. இருந்தாலும், உடல் நலத்திற்கு இந்த இரண்டில் எது சிறந்தது என்ற சந்தேகம் உங்களுக்கு இருக்கலாம். 

கொண்டைக்கடலையை தண்ணீரில் மட்டும் வேகவைத்து எடுக்கும்போது, அதன் இயல்பான சத்துக்கள் முழுமையாக பாதுகாக்கப்படுகின்றன. எண்ணெய் சேர்க்காமல் வேகவைப்பதால், கலோரிகள் குறைவாகவே இருக்கும். மேலும், வேகவைத்த கொண்டைக்கடலை மிகவும் இலகுவாக ஜீரணமாகும். வயிறு உப்புசம் போன்ற பிரச்சனைகள் வராமல் தடுக்கும்.

உடல் எடையைக் குறைக்க விரும்புபவர்கள் மற்றும் ஆரோக்கியமான உணவு முறையைப் பின்பற்ற நினைப்பவர்களுக்கு வேகவைத்த கொண்டைக்கடலை ஒரு சிறந்த தேர்வு என்பதில் சந்தேகமில்லை. குழந்தைகள் முதல் பெரியவர்கள் வரை அனைவரும் இதை எளிதில் சாப்பிடலாம்.

அடுத்து, கொண்டைக்கடலையை எண்ணெயில் வறுத்தோ அல்லது வெறும் கடாயில் ட்ரை ரோஸ்ட் செய்தோ தயாரிக்கலாம். வறுக்கும்போது கொண்டைக்கடலை மொறுமொறுப்பாகவும், நல்ல சுவையாகவும் இருக்கும். வறுக்கப்படும்போது, வெப்பத்தின் காரணமாக வைட்டமின்கள் மற்றும் சில தாதுக்கள் சற்றே குறைய வாய்ப்புள்ளது. எண்ணெயில் வறுக்கும்போது, கலோரிகளின் அளவும் அதிகரிக்கும். 

இருப்பினும், வறுத்த கொண்டைக்கடலையிலும் புரதம் மற்றும் நார்ச்சத்து போன்ற முக்கியமான சத்துக்கள் இருக்கத்தான் செய்கின்றன. ருசியை விரும்புபவர்கள், எப்போதாவது வறுத்த கொண்டைக்கடலை சிற்றுண்டியாக சாப்பிடுவதை வழக்கமாக்கிக் கொள்ளலாம். ஆனால், அதை அளவோடு உண்பது நல்லது.

ஒட்டுமொத்தமாகப் பார்க்கும்போது, வேகவைத்த கொண்டைக்கடலை மற்றும் வறுத்த கொண்டைக்கடலை இரண்டுமே ஆரோக்கியமான சிற்றுண்டிகள்தான். எனினும், வேகவைத்த கொண்டைக்கடலை இன்னும் சில கூடுதல் நன்மைகளை வழங்குகிறது. 

குறைந்த கலோரி மற்றும் அதிக சத்துக்கள் நிறைந்த உணவை நீங்கள் தேடுகிறீர்கள் என்றால், வேகவைத்த கொண்டைக்கடலை உங்களுக்கு மிகச் சிறந்த தேர்வு. சுவைக்கு முக்கியத்துவம் கொடுப்பவர்கள், வறுத்த கொண்டைக்கடலையை எப்போதாவது, மிதமான அளவில் எடுத்துக் கொள்ளலாம். எதுவாக இருந்தாலும், கொண்டைக்கடலை உங்கள் உணவில் சேர்ப்பது ஆரோக்கியத்திற்கு நல்லது. 

உங்கள் தனிப்பட்ட தேவைக்கும், சுவை விருப்பத்திற்கும் ஏற்ப, வேக வைத்த அல்லது வறுத்த கொண்டைக்கடலை எதுவானாலும் நீங்கள் தாராளமாகத் தேர்வு செய்து சாப்பிடலாம். முக்கியம் என்னவென்றால், கொண்டைக்கடலையை உங்கள் அன்றாட உணவில் சேர்த்துக் கொள்வது உடலுக்கு மிகவும் நல்லது.