மாதாந்திர வலியா? சித்த மருத்துவம் தரும் எளிய நிவாரணம்...

பெண்களுக்கு அதிகம் சிரமத்தை தருவது மாதாந்திர வலி தான். சூதக வலி அல்லது டிஸ்மெனோரியா எனப்படும் வலியால் அவதிப்படுபவர்கள் சித்த மருத்துவத்தில் சில எளிய வழிகளில் நிவாரணம் பெறலாம்.

• மலை வேம்பு,வேர்ப்பட்டை பொடி1/4டீஸ்பூன் எடுத்து மோரில் கலந்து குடித்தால் வலி குறையும்.

• ஜாதிக்காய், திப்பிலி, சீரகம் மூன்றையும் சம அளவு எடுத்து பொடித்து 1/4டீஸ்பூன் மோரில் கலந்து குடிக்க ,வலி சட்டென குறையும்.

• முருங்கைப்பூவை நெய் விட்டு வதக்கி உண்ணலாம்.

• சதகுப்பை இலைச்சாறு 1டீஸ்பூன் எடுத்து ,தேன் கலந்து உண்ணலாம்.

• ஒரு டீஸ்பூன் தண்ணீர் விட்டான் கிழங்கு சாறை , 1/4டீஸ்பூன் மிளகு பொடி கலந்து உண்ணலாம்.

• ஓமம், கிராம்பு இரண்டையும் சம அளவு எடுத்து பொடித்து அதை 1/4டீஸ்பூன் மோரில் கலந்து உண்ணலாம்.

• மாசிப்பத்திரி இலைச்சாறு 15மிலி அருந்த வலி குறையும்.

• புதினா இலைகளை கைப்பிடி அளவு எடுத்து 2டம்ளர் நீர் சேர்த்து அரை டம்ளர் ஆக வற்ற வைத்து பின் அருந்த வலி குறைந்து நல்ல நிவாரணம் தரும்.

• கரியபோளம், பொரித்த பெருங்காயம் இரண்டையும் சம அளவு எடுத்து தேன் விட்டு அரைத்து, அதை மிளகு அளவுக்கு உண்ணலாம்.

• 1/4டீஸ்பூன் குங்குமப்பூவை எலுமிச்சை சாறு, நீர் சேர்த்து அருந்தலாம்.

• ஒரு டீஸ்பூன் வெந்தயத்தை நீரில் ஊற வைத்து மோரில் கலந்து அருந்தலாம்.

• முடக்கத்தான் இலையை விளக்கெண்ணையில் வதக்கி அடிவயிற்றில் பற்று போடலாம்.

• சிற்றாமணக்கு இலையை சிற்றாமணக்கு எண்ணையில் வதக்கி அடிவயிற்றில் பற்று போட நல்ல குணம் கிடைக்கும்.

• நொச்சி இலையை நீரில் போட்டு காய்ச்சி, இடுப்பு பகுதியில் ஒத்தடம் கொடுக்க, வலி குறைந்து நல்ல நிவாரணம் தரும்.

இந்த குறிப்புகளை சித்த மருத்துவம் படிக்கும் என் தோழியின் மகள் சொன்னதை தொகுத்து எழுதியுள்ளேன்.

முக்கிய குறிப்பு: இந்தத் தகவல்கள் பொதுவான விழிப்புணர்வுக்காக மட்டுமே. மருத்துவ ஆலோசனைக்கு சரியான தகுந்த மருத்துவரை அணுகவும்.