கோடை வெயில் vs ஏசி குளிர்: உடல்நலம் பாதிக்கும் திடீர் மாற்றங்கள் - தவிர்ப்பது எப்படி?

கோடைக்காலம் வந்துவிட்டாலே வெயிலின் உக்கிரம் அதிகமாகிவிடும். பல இடங்களில் வெப்பநிலை நாற்பது டிகிரி செல்சியஸைத் தாண்டிச் செல்கிறது. இதுபோன்ற சமயங்களில், குறிப்பாக அலுவலகங்கள், கடைகள் போன்ற உட்புறங்களில் குளிர்சாதன வசதி ஒரு அத்தியாவசியத் தேவையாகி விடுகிறது. 

ஏசியில் இருக்கும்போது இதமாக இருந்தாலும், வெளியே உள்ள கடும் வெப்பத்துடன் ஒப்பிடும்போது இந்த வெப்பநிலை மாற்றம் நமது உடலைப் பாதிக்கிறது. தொடர்ந்து ஏசியில் இருந்துவிட்டு, திடீரென வெயிலில் செல்வது உடல் நலனுக்கு நல்லதல்ல.

குளிர்ச்சியான ஏசி சூழலிலிருந்து திடீரெனக் கடும் வெப்பமான வெளிச்சூழலுக்குச் செல்லும்போது, நமது உடல் இந்த திடீர் மாற்றத்திற்கு ஏற்பத் தன்னைச் சரிசெய்யச் சிரமப்படும். இந்த 'வெப்பநிலை அதிர்ச்சி' (Temperature Shock), உடலின் நோய் எதிர்ப்புச் சக்தியைக் பலவீனப்படுத்தி, எளிதில் நோய்த் தொற்றுக்கு ஆளாக நேரிடும். தலைவலி, சளி, இருமல், தொண்டை வலி, காய்ச்சல், உடல் சோர்வு போன்ற பிரச்சனைகள் ஏற்பட இது ஒரு முக்கியக் காரணம்.

அதுமட்டுமின்றி, குளிர்சாதன அறைகளில் நீண்ட நேரம், குறிப்பாக உடல் அசைவின்றி அமர்ந்து வேலை செய்பவர்களுக்கு, மூட்டு வலி மற்றும் தசை வலி ஏற்பட வாய்ப்பிருப்பதாகவும் நிபுணர்கள் கூறுகின்றனர். இந்தத் திடீர் வெப்ப மாற்றங்கள் இதய நலனையும் பாதிக்கக்கூடும் என்ற அச்சமும் உள்ளது. சில சமயங்களில், உடலின் வெப்பநிலை மாற்றத்திற்கு ஈடுகொடுக்க முடியாமல் போனால், 'ஹீட் ஸ்ட்ரோக்' போன்ற கடுமையான பிரச்சனைகளும் ஏற்படலாம்.

இந்த உடல்நலக் கோளாறுகளிலிருந்து நம்மைப் பாதுகாத்துக்கொள்ளச் சில எளிய வழிமுறைகளைப் பின்பற்றலாம். 

கோடைக்கு ஏற்றவாறு, காற்றோட்டமான காட்டன் ஆடைகளைத் தேர்வு செய்யுங்கள். ஏசி அதிகமாக இருக்கும் அலுவலகங்களில், குளிர் தாங்க ஒரு மெல்லிய துணியையோ அல்லது ஜாக்கெட்டையோ எடுத்துச் செல்வது நல்லது. வெளியில் செல்லும்போது நேரடி வெயிலைத் தவிர்க்கக் குடை, தொப்பி, அல்லது கண்ணாடியைப் பயன்படுத்துங்கள்.

உடலின் நீர்ச்சத்தைப் பேணுவது மிக முக்கியம். தாகம் இல்லாவிட்டாலும், சீரான இடைவெளிகளில் தண்ணீர் அருந்திக்கொண்டே இருங்கள். மோர், எலுமிச்சைச் சாறு போன்ற இயற்கை பானங்களையும் அருந்தலாம். அலுவலகங்களில் அல்லது வீடுகளில் ஏசி வெப்பநிலையை 24 முதல் 26 டிகிரி செல்சியஸ் வரை வைத்திருப்பது உடலுக்கு ஏற்றதாக இருக்கும். மிகக் குறைந்த வெப்பநிலையில் ஏசியை இயக்குவது உடலுக்குத் தீங்கு விளைவிக்கும்.

ஆரோக்கியமான உணவுப் பழக்கத்தையும், சிறிய உடற்பயிற்சிகளையும் வழக்கமாக்கிக் கொள்வது நல்லது. முக்கியமாக, குளிர்ச்சியான ஏசி அறையிலிருந்து திடீரெனக் கடும் வெயிலுக்குச் செல்வதைத் தவிர்க்கவும். சில நிமிடங்கள் ஏசி இல்லாத சாதாரண வெப்பநிலை உள்ள இடத்தில் இருந்துவிட்டுப் பிறகு வெளியில் செல்லுங்கள். இது உடலின் வெப்பநிலை மாற்றத்தைச் சீராகச் சமாளிக்க உதவும். சிலருக்குக் குளிர் காற்று மூச்சு விடுவதில் சிரமத்தை ஏற்படுத்தலாம். அவர்களுக்குப் பிராணாயாமம் அல்லது ஆழ்ந்த சுவாசப் பயிற்சிகள் நிவாரணம் அளிக்கும்.

இந்த முன்னெச்சரிக்கை நடவடிக்கைகள், உடல்நலப் பிரச்சனைகளைத் தவிர்த்து, கோடைக்காலத்தைச் சுகமாக எதிர்கொள்ள உதவும்.