கிருமிகளின் கூடாரம்! - நம் உடலின் மிக அசுத்தமான உறுப்பிற்கு போட்டிப்போடும் இரண்டு உறுப்புகள்...

நம் உடல் நல்ல விதத்தில் இயங்குவதற்கு பல உறுப்புகள் (Organs in our body) உதவுகின்றன. அதில் தன்னை எந்நேரமும் சுத்தமாக பராமரித்துக் கொள்ளும் உறுப்பும் இருக்கிறது. அசுத்தமாக இருக்கும் உறுப்புகளும் இருக்கின்றன. அவை எது என்பதைப் பற்றி விரிவாக இந்தப் பதிவில் காண்போம்.

நம் உடலில் சுத்தமான உறுப்பு எதுவென்று கேட்டால், உடனே மூளை, இதயம் போன்ற உறுப்புகள் நினைவுக்கு வரும். ஆனால், இவை மிகவும் பாதுகாப்பாக உள்ளுக்குள் இருக்கும் உறுப்புகளாகும். ஆனால், நான் சொல்வது உடலுக்கு வெளியிலே இருந்தும் சுத்தமாக இருக்கும் உறுப்பு. ஒரு உறுப்பு வெளியிலே இருந்து சுற்றுச்சுழலில் இருந்து வரும் தூசி, மாசுக்களை சமாளித்து தன்னை சுத்தமாக வைத்துக் கொள்கிறது. அந்த உறுப்பு வேறு எதுவுமில்லை நம் கண்கள் தான்.

நம் கண்களில் லைசோசைம்ஸ் போன்ற பேக்டீரியாவை எதிர்க்கின்ற நொதிகள் இருந்துக் கொண்டேயிருக்கும். இது தொடர்ந்து நுண்ணுயிரிகளை அழித்துக் கொண்டேயிருக்கும். இதிலிருந்து சுரக்கக்கூடிய திரவம் தூசி, அழுக்கு ஆகியவற்றை வெளியேற்றிக் கொண்டேயிருக்கும்.

நம் உடலில் உள்ள அசுத்தமான உறுப்பிற்கு இரண்டு உறுப்புகள் போட்டிப்போட்டுக் கொண்டு வருகின்றன. ஒன்று தொப்புள். இது குழிப்போன்ற அமைப்பைக் கொண்டிருப்பதால் இறந்த செல்கள், வியர்வை இதுப்போன்ற பல விஷயங்கள் அதனுள் படிந்துவிடும். நாம் குளிக்கப்போகும் போது கவனம் எடுத்து தொப்புள் பகுதியை சரியாக சுத்தம் செய்யாமல் விட்டால், தொடர்ந்து அழுக்குகள் தேங்கிக்கொண்டே போகும்.

2012 ல் நடத்தப்பட்ட ஆராய்ச்சியில் இந்த தொப்புள் பகுதியில் கிட்டத்தட்ட இரண்டாயிரத்திற்கும் அதிகமான பேக்டீரியா வகைகள் இருக்கின்றனவாம். இதனால் தொப்புள் பகுதியை நாம் குளிக்கும் போது நன்றாக சுத்தம் செய்து வைத்துக் கொள்வது அவசியமாகும்.

இரண்டாவது அசுத்தமான உறுப்பு நம்முடைய வாய் தான். நம் வாய் எப்போதுமே ஈரப்பதத்துடனும், சூடாகவும் இருப்பதால் நாம் சாப்பிடும் சாப்பாட்டு துணுக்குகள் பல் இடுக்குகளில் சிக்கிக்கொண்டு அங்கேயே இருக்கும்.

இந்த சூழல் தான் பேக்டீரியாவிற்கு இனப்பெருக்கம் செய்வதற்கு ஏதுவான சூழல் என்று சொல்லப்படுகிறது. நாம் காலையில் எழும் போது வாயில் ஏற்படும் துர்நாற்றத்திற்கு காரணம் பேக்டீரியாக்கள் நம் வாயில் படிந்து இருக்கும் உணவு துகள்களை உடைத்து Volatile sulphur compounds என்ற துர்நாற்றத்தை வீசுகின்ற வாயுக்களை வெளியிடுவதே!

எனவே, நம் உடலில் உள்ள அசுத்தமான உறுப்புகளான தொப்புள் மற்றும் வாய் ஆகிய இரண்டு உறுப்புகளையும் சுத்தமாக பராமரித்து வைத்துக் கொள்வது ஆரோக்கியத்திற்கு வழிவகுக்கும்.

(முக்கிய குறிப்பு: இந்தத் தகவல்கள் பொதுவான விழிப்புணர்வுக்காக மட்டுமே. மருத்துவ ஆலோசனைக்கு சரியான தகுந்த மருத்துவரை அணுகவும்)