இந்த 5 எண்ணெய்களுக்கும் உங்க கிச்சன்ல 'No Entry' சொல்லுங்க… காரணம் தெரியுமா?

தாளிப்பதில் இருந்து வறுப்பது வரை, எண்ணெய் இல்லாமல் நமது சமையல் முழுமை அடையாது. அது நம் உணவுக்குச் சுவையையும், மணத்தையும் கொடுக்கிறது. ஆனால், பளபளப்பான பாக்கெட்டுகளில் வரும் எல்லா எண்ணெயும் நமது இதயத்திற்கு நண்பன் என்று சொல்லிவிட முடியுமா? நிச்சயம் இல்லை. 

சில வகை எண்ணெய்கள், நமது ஆரோக்கியத்திற்கு நன்மையை விடத் தீங்கையே அதிகம் விளைவிக்கும். நமது ஒட்டுமொத்த நலனைக் கருத்தில் கொண்டு, சில எண்ணெய்களை நமது சமையலறையில் இருந்து ஒதுக்கி வைப்பதுதான் நல்லது. அப்படிப்பட்ட 5 மோசமான எண்ணெய்களைப் பற்றித்தான் இப்போது விரிவாகப் பார்க்கப் போகிறோம்.

1. வனஸ்பதி (Vanaspati)

இந்தப் பட்டியலில் முதலிடத்தில் இருப்பது வனஸ்பதி. சுவையான பலகாரங்கள் செய்ய இது பயன்படுத்தப்பட்டாலும், இது ஆரோக்கியத்தின் முதல் எதிரி. செயற்கையாக ஹைட்ரஜனேற்றம் செய்யப்பட்டு உருவாக்கப்படும் இதில், டிரான்ஸ் ஃபேட் (Trans Fat) எனப்படும் மிக மோசமான கொழுப்பு நிறைந்துள்ளது. இது ரத்தக் குழாய்களில் அடைப்பை ஏற்படுத்தி, கெட்ட கொழுப்பை அதிகரித்து, இதய நோய்களுக்கு நேரடியாக அழைப்பு விடுக்கும். எனவே, வனஸ்பதிக்கு உங்கள் சமையலறையில் நிரந்தரமாக 'No Entry' போர்டு மாட்டிவிடுங்கள்.

2. பாமாயில் (Palm Oil)

பாமாயில் பரவலாகப் பயன்படுத்தப்பட்டாலும், அதில் நிறைவுற்ற கொழுப்பு அதிகமாக உள்ளது. இதைத் தொடர்ந்து அதிக அளவில் உணவில் சேர்த்துக்கொள்ளும்போது, அது கொலஸ்ட்ரால் அளவைப் பாதிக்கக்கூடும். மேலும், கடைகளில் விற்கப்படும் வறுத்த உணவுகளில், இதே பாமாயிலை மீண்டும் மீண்டும் சூடுபடுத்திப் பயன்படுத்துவார்கள். அப்படிச் செய்யும்போது, அது மிகவும் ஆபத்தானதாக மாறுகிறது. 

3. சோயாபீன் எண்ணெய் (Soybean Oil)

சோயாபீன் எண்ணெய் போன்ற சில வெஜிடபிள் ஆயில்களில், ஒமேகா-6 கொழுப்பு அமிலங்கள் மிக அதிகமாக உள்ளன. நமது உடலுக்கு ஒமேகா-6 மற்றும் ஒமேகா-3 ஆகிய இரண்டுமே சம அளவில் தேவை. ஆனால், ஒமேகா-6 மட்டும் அதிகமாக சேரும்போது, அது உடலில் வீக்கத்தை உண்டாக்கி, பல நோய்களுக்குக் காரணமாக அமைகிறது.

4. பருத்தி விதை எண்ணெய் (Cottonseed Oil):

பருத்தி என்பது ஒரு உணவுப் பயிர் அல்ல. எனவே, அதில் பூச்சிக்கொல்லிகளின் தாக்கம் அதிகமாக இருக்க வாய்ப்புள்ளது. பருத்தி விதையிலிருந்து எடுக்கப்படும் எண்ணெய், உணவுக்கு உகந்ததாக மாற்றப்படுவதற்கு, மிகக் கடுமையான சுத்திகரிப்பு செயல்முறைக்கு உள்ளாக்கப்பட வேண்டும். 

5. பெயர் குறிப்பிடாத 'வெஜிடபிள் ஆயில்' (Blended Vegetable Oil)

கடைகளில் ‘வெஜிடபிள் ஆயில்’ என்ற பெயரில் விற்கப்படும் பல பாக்கெட்டுகளில், என்னென்ன எண்ணெய்கள் கலக்கப்பட்டுள்ளன என்ற தெளிவான விவரம் இருக்காது. பெரும்பாலும், சோயா, சோளம், பருத்தி விதை போன்ற மலிவான, அதிக சுத்திகரிப்புக்கு உள்ளாக்கப்பட்ட எண்ணெய்களின் கலவையாகத்தான் இது இருக்கும். இந்த ஒளிவுமறைவுத்தன்மைக்காகவே இதைத் தவிர்ப்பது உத்தமம்.

அப்படியானால், எதுதான் தீர்வு என்று கேட்கிறீர்களா? 

நமது பாரம்பரிய எண்ணெய்களுக்குத் திரும்புவதுதான் சிறந்த வழி. மரச்செக்கில் ஆட்டிய கடலை எண்ணெய், நல்லெண்ணெய், தேங்காய் எண்ணெய், நெய் என அந்தந்த சமையலுக்கு ஏற்ற எண்ணெயை மாற்றி மாற்றிப் பயன்படுத்துவது நமது ஆரோக்கியத்திற்குப் பல நன்மைகளைச் சேர்க்கும். இனி, விளம்பரங்கள் சொல்வதை நம்பாமல், எண்ணெயில் என்ன இருக்கிறது என்பதைத் தெரிந்து வாங்குங்கள்.

(முக்கிய குறிப்பு: இந்தத் தகவல்கள் பொதுவான விழிப்புணர்வுக்காக மட்டுமே. மருத்துவ ஆலோசனைக்கு சரியான தகுந்த மருத்துவரை அணுகவும்)