![Ways to Increase Collagen Production Naturally](http://media.assettype.com/kalkionline%2F2023-12%2F9face0be-a59c-44c8-ac8f-354fbb3e2c92%2F1.jpg?w=480&auto=format%2Ccompress&fit=max)
கொலாஜன் என்பது நமது உடலில் (சருமம், எலும்புகள், தசைகள், இணைப்பு திசுக்கள் போன்றவை) இருக்கும் ஒரு புரதமாகும். இது மனித உடலில் உள்ள புரதத்தில் மூன்றில் ஒரு பங்கை உருவாக்குகிறது. வயதாகும்போது கொலாஜன் குறைகிறது. எனவே, நமது சருமம் தொய்வு மற்றும் சுருக்கம் அடையத் தொடங்குகிறது. கொலாஜனைத் தக்கவைத்து, அதன் உற்பத்தியை எவ்வாறு அதிகரிக்கலாம் என்று இந்தப் பதிவில் காண்போம்.
1. பச்சை இலை காய்கறிகளில் ஏராளமான ஆன்ட்டி ஆக்ஸிடென்ட்களும் அமினோ அமிலங்களும் உள்ளன. கீரைகள், கோஸ், அவகோடா, காலிபிளவர் போன்ற இலைக் காய்கறிகளில் வைட்டமின் ஏ, வைட்டமின் சி மற்றும் வைட்டமின் ஈ போன்ற சத்துகள் நிறைந்திருப்பதால், உடலில் கொலாஜன் உற்பத்தியை அதிகரித்து இளமையாக வைக்கும். எனவே, அவற்றை அதிகளவில் எடுத்துக்கொள்ள வேண்டும்.
2. ரெட்டினால் என்கிற பொருள் கொலாஜன் உற்பத்தியை அதிகப்படுத்தி முகச்சுருக்கங்களை தடுக்கிறது. ரெட்டினால் கிரீம்களையும் சீரங்களையும் முகத்தில் பயன்படுத்தினால் சருமம் இறுகி இளமை தோற்றத்தைத் தரும்.
3. வைட்டமின் சி உள்ள சிட்ரஸ் பழங்கள் ஆரஞ்சு, பப்பாளி, எலுமிச்சை,நெல்லிக்காய்,ஸ்ட்ரா பெர்ரி நிறைய எடுத்துக் கொண்டால் அது முகத்தை இளமையாக வைக்கும். தினமும் ஒரு கிளாஸ் எலுமிச்சை ஜூஸ் அல்லது ஒரு கப் ஆரஞ்சு மற்றும் திராட்சைப் பழங்களை தவறாமல் சாப்பிடவும்.
4. தொடர்ந்து முகத்திற்கு மசாஜ் செய்து வந்தால் அது இரத்த ஓட்டத்தை அதிகரித்து கொலாஜன் உற்பத்தியை அதிகரிக்கும்.
5. சூரிய ஒளியில் செல்லும்போது முகத்திற்கு தொப்பி அணிந்து அல்லது சன்ஸ்கிரீன் லோஷன் போட்டுச் செல்லும்போது அது வயதான தோற்றத்தைத் தடுக்கிறது. முகச் சுருக்கங்களையும் தடுக்கிறது.
பூசணி விதை: பூசணி விதையில் உள்ள துத்தநாகம் கொலாஜன் முறிவைக் கட்டுப்படுத்தவும், புதிய சரும செல்களை உற்பத்தி செய்யவும் உதவும்.
சாலமன், டுனா மீன்களில் இயற்கையாகவே கொலாஜனை உற்பத்தி செய்யும் பொருட்கள் உள்ளன. மீன் சாப்பிடாதவர் எனில், ஒமேகா3 கொழுப்பு அமிலங்களின் சப்ளிமெண்ட்ஸையும் எடுத்துக் கொள்ளலாம்.
முட்டையில் உள்ள வெள்ளை கருவும் சருமத்தில் கொலாஜனை தக்கவைத்து உற்பத்தி செய்ய உதவுகின்றன. முட்டையின் வெள்ளைக்கருவில் அதிக அளவு புரோலின் உள்ளது, இது கொலாஜன் உற்பத்திக்குத் தேவையான அமினோ அமிலங்களில் ஒன்றாகும்.
சோயா: சோயாவில் ஜெனிஸ்டீன் எனப்படும் தாவர ஹார்மோன் உள்ளது என்பதை பல ஆய்வுகள் உறுதிப்படுத்துகின்றன. இது நேரடியாக ஆக்ஸிஜனேற்றியாக செயல்படுகிறது. எனவே, உடலில் கொலாஜன் உற்பத்தியைத் தூண்டுகிறது. மேலும், சரும முதுமை நொதிகளைத் தடுக்க உதவுகிறது என்று பல நிபுணர்கள் விளக்குகிறார்கள். சோயாவின் சிறந்த ஆதாரங்கள் டோஃபு மற்றும் சோயா பால் வடிவில் உள்ளன.
தக்காளி: தக்காளியில் லைகோபீன் என்ற ஒரு அமினோ அமிலம் உள்ளது. இது சருமத்தை சூரியனின் தீங்கு விளைவிக்கும் கதிர்வீச்சிலிருந்து பாதுகாக்கிறது. இதனால் சருமம் வயதாவதைத் தடுக்கிறது. எனவே, அன்றாட உணவில் தக்காளியை ஆரோக்கியமான அளவில் சேர்க்க வேண்டும்.
இனிப்பு உருளைக்கிழங்கு: இதில் உள்ள வைட்டமின் ஏ உடலில் கொலாஜன் உற்பத்தியை அதிகரிக்க உதவுகிறது. மேலும், செல் வளர்ச்சிக்கு நேரடியாக பங்களிக்கிறது. இதனால் ஆரோக்கியமான, பளபளப்பான சருமத்தைப் பெற உதவுகிறது.
மிளகுத்தூள்: மிளகுத்தூள் உணவுக்கு மட்டுமல்ல, சருமம் மற்றும் ஒட்டுமொத்த ஆரோக்கியத்திற்கும் பெரிதும் பயனளிக்கிறது. மிளகுத்தூளில் கேப்சைசின் உள்ளது. இது சருமம் வயதாவதைத் தடுத்து மற்றும் எதிர்த்துப் போராடும். எனவே, சாலட் மற்றும் சாண்ட்விச்களில் இதைக் கலந்து உண்ணலாம்.
சூரியகாந்தி விதைகள்: உலர்ந்த வறுத்த சூரியகாந்தி விதையில் வைட்டமின் ஈ உள்ளது. மற்ற ஆன்டி ஆக்ஸிடன்ட்களைப் போலவே, வைட்டமின் ஈ செல் இறப்பைத் தடுக்க ஃப்ரீ ரேடிக்கல்களை எதிர்த்துப் போராடுகிறது.