உணவில்லாமல் உலகில் நாம் யாரும் இல்லை! ஆனால், உணவுலகில் இன்றைக்கு மசாலா இல்லாமல் பெரும்பாலான சமையலே இல்லை எனச் சொல்லும் வகையில், கறி மசாலா, கரம் மசாலா, சாம்பார் மசாலா, மசால் வடை, மசாலா தோசை என பல வடிவங்களில் 'மசாலா' - என்ற சொல் இந்தியா மட்டுமின்றி உலகம் முழுவதும் புகழ்பெற்று வழக்கத்தில் உள்ளது.
சமையலின்போது தவிர்க்க முடியாத சொல்லான 'மசாலா' - என்பது பொதுவாக ஒரு இந்தியச் சொல்லாகக் கருதப்பட்டாலும், இது தமிழ் வழங்கிய ஒரு சொல் என்பது எத்தனை பேருக்குத் தெரியும்?
மசிக்கப்பட்ட வாசனைப் பொருள் மசலைப் பொருள். அம்மியில் வைத்து அரைத்து மசிக்கப்படுவது = மசாலை.
(தொன்று தொட்டு தமிழர் வீடுகளில் சமையலுக்கான மசாலையரைக்க -தொன்மரபாக அம்மிக்கல்லைப் பயன்படுத்தி வருகிறோம்).
மசாலை - என்றால் சமையலுக்குப் பயன்படுத்தப்படும் பலசரக்கு விழுது, விழுதாக நசுக்கப்பட்ட அல்லது அரைக்கப்பட்ட குழைவான கலவை.
மசாலை என்ற தமிழ்ச்சொல் திரிந்துதான் - பிறமொழிகளில் மசாலா ஆனது.
மசி > மசலை > மசாலை.
மசிதல் = குழைதல், பசைபோலாதல்.
மசி > மசித்தல் என்றால் குழைத்தல்; கடைந்து குழையச் செய்தல், உணவுப் பொருளை நசுக்கி மாவு அல்லது கூழ் போன்ற மென்மையான நிலைக்கு வரச் செய்தல், பசை போலாக்குதல்.
என்று பொருள்.
மசியல் = குழைந்த உணவு.
தொடக்கத்தில் மசாலை என்ற சொல்
ஈரமான விழுதைக் ( Paste of Spices) குறித்துத் தோன்றினாலும், பிற்காலத்தில் 'உலர்ந்த தூள்' ( Spice powders) கலவைக்கான பொதுவான சொல்லாகவும் உருமாறி, மக்கள் வழக்கிலும் ஊடுருவி நிலைத்து விட்டது.
மசித்த பருப்பு கொண்டு செய்யப்பட்ட வடையே > மசால் வடை!
இத்தகைய சிறப்பு வாய்ந்த மசாலை - என்ற சொல் எங்ஙனம் பிறந்தது என்பதையும் நாம் விளங்கிக் கொள்வோம்.
திரட்சிக் கருத்தைக் குறிக்கும் 'மத்து' என்ற சொல்லின் வினையையொட்டி பிறந்த சொல் 'மசி' ஆகும்.
மத்து > மத்தி > மதி > மசி.
கடைதலைக் குறிக்கும் மதி என்னும் வினைச்சொல்லும், மத்து என்னும் வடிவிலிருந்தே திரிந்ததாகும்.
மத்தித்தல் - என்றால் மத்தினாற் கடைதல் (பிறவினைச்சொல்).
மதித்தல் = கடைதல்போற் கையினால் அழுத்திப் பசையாக்குதல் ( தன்வினைச் சொல்).
மதிதல் > மதியல் > மசியல்.
மசியல் = குழைவான உணவுப் பொருள்.
மசிதல் = கடைந்ததுபோல களியாதல்.
ஆக, மசி என்ற சொல் உலகிற்கு மசாலாவை மட்டும் வழங்கவில்லை, அதற்கு மேல்
Mash, Massage போன்ற ஆங்கிலச் சொற்களும் - இதே மூலத்திலிருந்து பிறந்தவை தான்!
ஆங்கிலத்தில் மசிதலைக் குறிக்கும் சொல் Mash ஆகும்.
மசி ( to mash) = to mix or crush something until it is soft. குழைவாக ஆகும் வரை ஒன்றைக் கலக்கு அல்லது மசியலாக்கு; கூழாக்கு.