மிக உயரமான அலுவலகக் கட்டடங்களின் வெளிப்பகுதிகள் பெரும்பாலும் கண்ணாடிகளால் அலங்கரிக்கப்பட்டிருப்பதைக் காணலாம். இதன்மூலம் அந்தக் கட்டடங்களின் தோற்றம் அழகாவது உண்மைதான். ஆனால், அந்தக் கண்ணாடிகளைத் தூய்மைப்படுத்துவது எத்தனைப் பெரிய வேலை என்று எப்போதாவது சிந்தித்திருக்கிறீர்களா?

உயர்ந்த கட்டடங்களின் கண்ணாடிகளைத் தேய்த்துக் கழுவித் தூய்மைப்படுத்துவதற்கென்று சிறப்புப் பயிற்சி பெற்ற தொழிலாளர்கள் இருக்கிறார்கள். இவர்கள் கட்டடத்தின் உச்சியில் கட்டித் தொங்கவிடப்பட்ட கயிறுகளில் தொங்கியபடி மிகுந்த திறமையுடனும் துணிச்சலுடனும் தூய்மைப் பணியில் ஈடுபடுவார்கள். அதைக் கீழிருந்து பார்க்கும்போது, ஒருவேளை அவர்களுடைய உயிருக்கு ஏதேனும் ஆபத்து வந்துவிடுமோ என்று நம் மனம் பதறும்.

வருங்காலத்தில், தொழிலாளர்கள் இப்படி உயிரைப் பணயம் வைத்துக் கண்ணாடிகளைத் தூய்மைப்படுத்தவேண்டியிருக்காது. ஒரு பொத்தானை அழுத்தினால் சில சிறப்புக் கருவிகள் சர்ரென்று பறந்து சென்று ஒவ்வொரு கண்ணாடியாகத் தூய்மைப்படுத்திவிட்டு வந்துவிடும்.

Unmanned Aerial Vehicles (ஆளில்லா வான் வண்டிகள்) எனப்படும் இந்தக் கருவிகளை டுரோன்கள் (Drones) என்று செல்லமாகவும் அழைக்கிறார்கள். தொடக்கத்தில் ராணுவப் பயன்பாட்டுக்கென உருவாக்கப்பட்ட டுரோன்கள் இப்போது பொதுமக்களுடைய, நிறுவனங்களுடைய பயன்பாட்டுக்கும் வந்துவிட்டன. புகைப்படம், வீடியோ எடுத்தல், கண்காணித்தல், பொருட்களை ஓரிடத்திலிருந்து இன்னோரிடத்துக்குக் கொண்டுசெல்லுதல், வயல்களுக்கு உரம் போடுதல், மனிதர்கள் எளிதில் செல்ல இயலாத இடங்களுக்குச் சென்று பராமரிப்புப் பணிகளில் ஈடுபடுதல் என்று பல்வேறு வகைகளில் பயன்படுகின்றன.

கொஞ்சம் எளிமையாக விளக்கவேண்டும் என்றால், டுரோன்களைச் சிறு விமானங்கள் எனலாம். ஆனால், இவற்றின் எடை குறைவு என்பதாலும், படுக்கையில் படுத்தபடி ரிமோட் கன்ட்ரோல் மூலம் தொலைக்காட்சியில் சானல் மாற்றுவதுபோல் இவற்றை நாம் விரும்பிய இடத்துக்குப் பறக்கச்செய்யலாம் என்பதாலும், பயன்பாட்டளவில் இவை விமானத்திலிருந்து முற்றிலும் வேறுபட்டிருக்கின்றன.

ஒரு டுரோனில் உள்ள மோட்டார், செலுத்தும் அமைப்பு (Propeller), கட்டுப்பாட்டு சாதனங்கள், தகவல் தொடர்பு அமைப்புகள், மின்கலன்கள் (பேட்டரிகள்), அது தூக்கிச் செல்லும் பொருட்கள் ஆகியவற்றின் எடையைப் பொறுத்து அந்த டுரோன் இயங்கக்கூடிய தொலைவும் உயரமும் வேறுபடும். பொதுமக்கள் பயன்பாட்டுக்கான டுரோன்கள் ஒரு சிறிய வட்டத்துக்குள்மட்டும்தான் பயணம் செய்யும். ஆனால், தொழில்முறைப் பயன்பாட்டுக்கான டுரோன்கள் நெடுந்தொலைவு செல்லக்கூடியவை.

பார்ப்பதற்குச் சிறியவையாக இருப்பினும், டுரோன்கள் நமக்கு மிகுந்த நேரத்தை, உழைப்பைச் சேமிக்கக்கூடியவை. எடுத்துக்காட்டாக, ஒருவர் பள்ளத்தாக்கில் விழுந்துவிட்டார் என்றால், அவர் எங்கு விழுந்திருக்கிறார் என்று கண்டுபிடிப்பதற்குப் பல ஆட்கள் மணிக்கணக்கில் தேடல் பணியில் ஈடுபடவேண்டியிருக்கும். ஆனால், அதே வேலையை ஒரு டுரோன்மூலம் செய்யும்போது சில நிமிடங்களுக்குள் அப்பகுதியை அலசி, ஆராய்ந்து, அவர் எங்கு இருக்கிறார் என்று துல்லியமாகத் தெரிந்துகொண்டு மீட்பு நடவடிக்கைகளைத் தொடங்கலாம். விரைவில் மருத்துவ உதவியை வழங்கி அவரைக் காப்பாற்றலாம்.

இன்னொரு சுவையான செய்தி, டுரோன்களை யார் வேண்டுமானாலும் உருவாக்கலாம். Drone Kits என்ற பெயரில் டுரோன் உருவாக்கத்துக்குத் தேவையான பகுதிகளையெல்லாம் மொத்தமாக விற்கிறார்கள். ஆர்வமுள்ளவர்கள் அவற்றை வாங்கி, செய்முறையைப் படித்துப் புரிந்துகொண்டு டுரோன்களை உருவாக்கிப் பறக்கவிட்டு மகிழலாம்.

பொழுதுபோக்குக்கென டுரோன்களை உருவாக்குவது ஒருபுறமிருக்க, உண்மையான உலகத் தேவைகளை நிறைவேற்றும் நோக்கத்துடன் டுரோன்களைத் தனித்துவமாக வடிவமைக்கிறவர்களும் இருக்கிறார்கள். அதனால், டுரோன்களை உருவாக்குவது, பறக்கவிடுவது ஆகியவை வருங்காலத்தில் மிகவும் நாடப்படுகிற பணிகளாக இருக்கும்.

ஆனால், இப்படி எல்லாரும் டுரோன் செய்யத் தொடங்கிவிட்டால் பாதுகாப்புப் பிரச்சனைகள் வராதா? மக்களுடைய தனியுரிமை பாதிக்கப்படாதா?

ஆம். அதனால்தான் ஒவ்வொரு நாடும் தனக்கென்று ஒரு டுரோன் கொள்கையை, விதிமுறைகளைப் பதிப்பித்துள்ளது. அதற்கு உட்பட்டுத்தான் டுரோன்கள் இயக்கப்படவேண்டும். குறிப்பாக, No Drone Zone எனப்படும் பகுதிகளில் எந்த டுரோனையும் பறக்கவிடக்கூடாது. அப்படி செய்வது அந்நாட்டின் விதிமுறைகளை, சட்டத்தை மீறுவதாகும்.