தினைகளில் அதிகப்படியான கால்சியம், புரதம், நார்ச்சத்து, தாதுக்கள் ஆகியவை அடங்கி உள்ளன. உடல் எடையை குறைக்க விரும்பவர்கள் இந்த தினை வகைகளை உணவாகக் எடுத்துக்கொள்ளலாம். மேலும், சர்க்கரை மற்றும் இருதய நோய்கள் உள்ளவர்களும் தினை வகைகளை எடுத்துக்கொள்ளலாம். சத்து மாவு, ரொட்டிகள், தின்பண்டங்கள் ஆகியவற்றின் மூலம் தினையை நாம் தினமும் எடுத்துக்கொள்ளலாம். சிறுதானிய வகைகள் மொத்தம் ஏழு . அவற்றின் பலன்களைப் பற்றி இந்தத் தொகுப்பில் பார்ப்போம்.

தினை அரிசி (Foxtail millet): தினை அரிசியில் புரதம், வைட்டமின் A மற்றும் B, பாஸ்பரஸ் போன்ற சத்துக்கள் உள்ளன. அரிசி தினை பயன்படுத்தி அதிரசம், இட்லி, பணியாரம், பாயசம், அல்வா போன்ற உணவுகள் செய்து சாப்பிடலாம். இது இதயத்தை ஆரோக்கியமாக வைத்துக்கொள்ளவும், கண் பார்வையை தெளிவாக வைத்துக்கொள்ளவும் உதவும். குறிப்பாக, குழந்தைப் பெற்ற தாய்மார்கள் எடுத்துக்கொண்டால் தாய் பால் நன்றாக சுரக்கும்.

கேழ்வரகு: Finger millet எனப்படும் கேழ்வரகு, அரசி மற்றும் கோதுமையை விட அதிக சத்து மிக்கது. இது எலும்பு தேய்மானம், இரத்த சோகை, மலச்சிக்கல் ஆகியவற்றிற்கு நல்ல தீர்வைத் தரும். மேலும், செரிமான கோளாறு, குடல் புண், மாதவிடாய் கோளாறு பிரச்னைகளில் இருந்து நிவாரணம் பெறுவதற்கு உதவி செய்யும். கேழ்வரகில் இரும்புச் சத்து, பாஸ்பரஸ், சுண்ணாம்புச்சத்து ஆகியவை உள்ளது குறிப்பிடத்தக்கது. கேழ்வரகில் கூழ், அடை, வடை, தோசை, களி ஆகியவை செய்து சாப்பிடலாம்.

சாமை அரிசி: Little millet என அழைக்கப்படும் சாமை அரிசியில் நார்ச்சத்து அதிகம் உள்ளது. ஆகையால், இது சர்க்கரை வியாதிக்கு மருந்தாக இருக்கும். மேலும், வயிற்று கோளாறுகள், மலச்சிக்கல், இரத்த சோகை ஆகியவற்றிற்கு நல்ல பலனைத் தரும். இதில் புலாவ், உப்மா, பொங்கல் ஆகியவை செய்து சாப்பிடலாம்.

குதிரைவாலி: Barnyard Millet எனப்படும் குதிரைவாலியில் இரும்புச் சத்து, நார்ச்சத்து ஆகியவை உள்ளன. இது இதயம் தொடர்பான நோய், இடுப்பு வலி, வயிறு வலி, உயர் இரத்த அழுத்தம் ஆகியவை வரமால் இருக்க உதவும். குதிரைவாலியில் எலுமிச்சை சோறு, கிச்சடி, கொழுக்கட்டை ஆகியவை செய்து சாப்பிட்டால் ருசியாகவும் சத்துமிக்கதாகவும் இருக்கும்.

வரகு அரிசி: Kodo millet என ஆங்கிலத்தில் சொல்லப்படும் வரகு அரிசி புரதம் மற்றும் தாது உப்புக்கள் நிறைந்தவை. உடல் பருமன், இரத்த அழுத்தம், சர்க்கரை நோய் அகியவை குறைவதற்கு உதவி செய்யும். வரகு அரிசி மூலம் வரகு அடை, பாயசம், உப்புமா போன்றவை செய்து உண்டு பயன் பெறலாம்.

கம்பு அரிசி: Pearl millet எனப்படும் கம்பு அரிசியில் அதிகப்படியான வைட்டமின்கள் உள்ளன. ஆகையால் இது உடலை சுறுசுறுப்பாக வைத்துக்கொள்ள உதவும். மேலும், உடல் சூடு, வயிற்றுப்புண், சோர்வு ஆகியவற்றிற்கு கம்பு அரிசி உணவை எடுத்துக்கொள்ளலாம். இது தேவையற்ற கொழுப்புகளை நீக்கவும் உதவுகிறது. கம்பஞ்சோறு, கம்பு அடை, கம்பு தோசை ஆகியவை சுவைமிக்கது.

சோளம்: சோளம் ஆங்கிலத்தில் Sorghum என அழைக்கப்படுகிறது. சோளம் சர்க்கரை நோயை குறைக்கவும், உடல் எடை அதிகரிக்கவும், உடலில் இருக்கும் உப்பை குறைக்கவும் பயன்படுகிறது. சோளத்தில் மாவு சத்து, புரத சத்து, இரும்புச் சத்து ஆகியவை உள்ளன. மேலும் சரும அழற்சி உள்ளவர்கள் சோள உணவு சாப்பிட்டுப் பயன் பெறலாம். சோள முறுக்கு, பாப்கார்ன், சோள அரிசி சாதம் ஆகியவை குழந்தைகளுக்கும் பிடித்த உணவுகளாகும்.